诗篇 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
139:1 Siōng-chú ê Bû-só͘ Put-ti kah Chiàu-kò͘
( Ta-bi̍t ê si, kau hō͘ ga̍k-koaⁿ. )Siōng-chú ah, Lí ū kàm-chhat góa, bat góa.
139:2 Góa chē lo̍h-.khì, góa peh khí-.lâi, Lí lóng chai; Lí tùi hn̄g-hn̄g to̍h chai góa ê liām-thâu.
139:3 Góa kiâⁿ lō͘, góa tó tī bîn-chhn̂g, Lí lóng siông-sè chai; góa it-chhè só͘ kiâⁿ só͘ chò, Lí mā lóng chai.
139:4 Siōng-chú ah, góa ê chhùi só͘ kóng ê ōe, Lí bô chi̍t kù m̄-chai.
139:5 Lí tī góa ê chêng-āu pó-hō͘ góa, hōaⁿ-chhiú tī góa ê téng-bīn.
139:6 Chit khoán ê tì-sek hiahni̍h kî-biāu, góa bē tàng chhek-to̍k; hiahni̍h ko-chhim, góa bē tàng liáu-kái.
139:7 Góa tio̍h khì tó-ūi chiah ē-tàng siám-phiah Lí ê sîn? Góa tio̍h cháu-khì tó-ūi chiah ē-tàng siám-phiah Lí ê bīn?
139:8 Góa nā chiūⁿ thiⁿ, Lí tī hia; góa nā khùn tī im-hú, Lí mā tī hia.
139:9 Góa nā thí-khui chheng-chá ê si̍t, poe kàu hái ê ke̍k-thâu lâi tòa;
139:10 Nā-sī tī hia, Lí ê chhiú mā ē ín-chhōa góa, Lí ê chiàⁿ chhiú mā ē khan góa.
139:11 Góa nā kiû o͘-àm jia-khàm góa, á-.sī sì-kho͘-ûi ê kng piàn-chò àm-mê;
139:12 O͘-àm mā bē tàng jia-khàm góa hō͘ Lí bô khòaⁿ-.tio̍h; o͘-àm mê chhin-chhiūⁿ ji̍t-sî hoat kng. O͘-àm kah kng-bêng, chāi Lí khòaⁿ khí-lâi lóng sī sio-siâng.
139:13 In-ūi góa ê pak-lāi sī Lí só͘ chhòng-chō ê; góa tī lāu-bú ê pak-tó͘ lāi, Lí ū kā góa cho͘-ha̍p khí-.lâi.
139:14 Góa beh kám-siā Lí, in-ūi góa siū chō sī kî-biāu koh thang kiaⁿ; Lí ê chok-ûi kî-biāu, Lí chhim-chhim jīn-bat góa.
139:15 Góa tī àm-tiong siū chō, tī tē-hú chin chhim ê só͘-chāi siū chiap liân khí-.lâi; hit sî, góa ê hêng-thé bô tùi Lí ún-môa.
139:16 Góa iáu-bōe chiâⁿ-hêng ê seng-khu, Lí ê ba̍k-chiu í-keng khòaⁿ-.tio̍h; Lí só͘ tiāⁿ tio̍h hō͘ góa ê ji̍t, sûi-jiân iáu-bōe keng-kòe chi̍t ji̍t, lóng í-keng kì tī Lí ê chheh.
139:17 Siōng-chú ah, Lí ê sim-su ì-liām tùi góa sī chiah pó-pòe! Hitê sò͘-gia̍h kàu chiah chē!
139:18 Góa nā beh sǹg, he pí hái soa khah chē; góa khùn cheng-sîn ê sî, iû-goân kah Lí tông-chāi.
139:19 Siōng-tè ah, Lí it-tēng ē châu-bia̍t pháiⁿ lâng; só͘-í, lín chiahê ài hō͘ lâng lâu hoeh ê lâng tio̍h lī-khui góa!
139:20 In-ūi in kóng pháiⁿ ōe lâi tú-tak Lí; Lí ê tùi-te̍k mā lāmsám chheng Lí ê miâ.
139:21 Siōng-chú ah, oàn-hūn Lí ê lâng góa kám bô oàn-hūn in? Khí-lâi kong-kek Lí ê lâng góa kám bô thó-ià in?
139:22 Góa hui-siông oàn-hūn in, lia̍h in chò góa ê tùi-te̍k.
139:23 Siōng-chú ah, kiû Lí kàm-chhat góa, chai góa ê sim-su; khó-giām góa, chai góa ê ì-liām.
139:24 Kiû Lí khòaⁿ góa ū siáⁿ-mi̍h pháiⁿ hêng-ûi á-bô, kiû Lí chhōa góa kiâⁿ éng-oán oa̍h-miā ê lō͘.
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。