诗篇 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
104:1 O-ló Chhòng-chō ê Chú
Góa ê sim-sîn ah, lí tio̍h oló Siōng-chú. Siōng-chú — góa ê Siōng-tè ah, Lí sī chì-tōa! Lí ēng chun-êng, ui-giâm chò saⁿ lâi chhēng.
104:2 Lí chhēng kng-bêng chhin-chhiūⁿ gōa-saⁿ; thí-khui thiⁿ chhin-chhiūⁿ pò͘-pêⁿ.
104:3 Siōng-tè tī chúi tiong an-tì I lâu-koh ê thong-îⁿ, ēng hûn chò I ê chhia, ēng hong ê si̍t lâi kiâⁿ.
104:4 I ēng hong chò I ê sù-chiá, ēng hóe-iām chò I ê chhe-ēng.
104:5 I kā tē hē tī tē-ki téng-bīn, hō͘ i éng-oán bē iô-tāng.
104:6 Lí ēng chhim-ian chhin-chhiūⁿ saⁿ-khò͘ jia-khàm tē bīn, chiahê chúi im-kòe soaⁿ-niá.
104:7 Lí chi̍t-ē hoah, chúi chiū kóaⁿ-kín lâu cháu; Lí ê lûi chi̍t ē tân, chúi chiū kóaⁿ-kín lâu.
104:8 In chhèng kàu soaⁿ-thâu, lo̍h kàu soaⁿ-kok, lâu kàu Lí kā in tiāⁿ tio̍h ê só͘-chāi.
104:9 Lí tiāⁿ tio̍h kài-hān hō͘ chúi bē tàng pôaⁿ-kòe, bô koh tò tńg-lâi jia-khàm tē bīn.
104:10 Lí hō͘ chúi-chôaⁿ tùi soaⁿ lāi chhèng chhut-.lâi, lâu ji̍p-khì soaⁿ-kok,
104:11 Hō͘ soaⁿ-.ni̍h ê cháu-siù lóng ū thang lim, mā hō͘ iá-lî ē-tàng chí chhùi-ta.
104:12 Lí hō͘ khong-tiong ê poe-chiáu hioh tī chúi piⁿ, tī chhiū-ki téng chhiùⁿ koa.
104:13 Lí tùi Lí ê lâu-koh tiong koàn-ak soaⁿ-niá; tùi Lí só͘ chò ê hāu-kó, tē chiū tit tio̍h chhiong-chiok.
104:14 Lí hō͘ chháu seng-tióng, hō͘ chengseⁿ ū thang chia̍h, mā ū chhài-se chò lâng ê lō͘-ēng, hō͘ chia̍h-mi̍h tùi tē-.ni̍h seⁿ-chhut;
104:15 Koh ū chiú hō͘ lâng ê sim hoaⁿ-hí, ū iû thang chu-jūn lâng ê bīn, ū chia̍h-mi̍h pó͘-ióng lâng ê ióng-chòng.
104:16 Siōng-chú ê chhiū lóng tit tio̍h chhiong-chiok ê chu-jūn, to̍h-sī I só͘ chai Le-ba-nòng ê pek-hiuⁿ chhiū.
104:17 Poe-chiáu chò siū tī hit lāi-bīn; ū ho̍h tòa tī siông chhiū ê tiong-kan.
104:18 Koân soaⁿ sī hō͘ iá soaⁿ-iûⁿ tòa; chio̍h-pôaⁿ sī soa-hoan siám-bih ê só͘-chāi.
104:19 Siōng-tè ēng goe̍h-niû lâi tiāⁿ tio̍h sî-cheh; ji̍t-thâu mā chai thang lo̍h soaⁿ.
104:20 Lí hō͘ ji̍t àm chò àm-sî, hit sî, chhiū-nâ lāi ê pah-siù chiū lóng pê chhut-.lâi.
104:21 Sai-á-thûn háu beh jiàu mi̍h chia̍h, tùi Siōng-tè thó in ê chia̍h-mi̍h.
104:22 Ji̍t-thâu chi̍t-ē chhut, in chiū cháu-khì bih, tó tī in ê tōng lāi hioh-khùn.
104:23 Lâng chhut-khì chò-kang, thoa-bôa kàu ê-hng sî.
104:24 Siōng-chú ah, Lí só͘ chō ê ná ē hiah chē! In lóng sī Lí ēng tì-hūi chō-sêng ê; choân tē chhiong-móa Lí ê hù-jū.
104:25 Hia ū hái, tōa koh khoah; lāi-bīn ū sǹg bē liáu ê tōng-bu̍t, tōa-sè ê oa̍h-mi̍h lóng ū.
104:26 Tī hia ū chûn teh kiâⁿ, ū Lí só͘ chhòng-chō ê tōa hî siû lâi siû khì.
104:27 Chiahê lóng teh thèng-hāu Lí, thang chiàu-sî hō͘ in chia̍h-mi̍h.
104:28 Lí hō͘ in, in chiū khioh khí-.lâi; Lí chi̍t ē thí-khui chhiú, in chiū tit tio̍h hó mi̍h thang chia̍h kàu pá.
104:29 Lí am Lí ê bīn, in chiū chhau-hoân; Lí kā in ê khùi siu-hôe, in chiū sí-bông lâi kui tī thô͘-hún.
104:30 Lí hoat-chhut Lí ê lêng, in chiū siū chhòng-chō; Lí hō͘ tē-bīn ōaⁿ chò sin.
104:31 Goān Siōng-chú ê êng-kng éng-oán chûn-chāi! Goān Siōng-chú ūi tio̍h I só͘ chhòng-chō ê lâi hoaⁿ-hí!
104:32 I khòaⁿ tē, tē chiū tín-tāng; I bong soaⁿ, soaⁿ chiū chhut ian.
104:33 Góa beh chi̍t-sì-lâng ǹg Siōng-chú gîm-si! Góa iáu oa̍h-.leh ê sî beh ǹg góa ê Siōng-chú chhiùⁿ koa oló!
104:34 Goān I kā góa ê tiām-tiām lia̍h-chò sī kah-ì! Góa beh in-ūi Siōng-chú lâi hoaⁿ-hí!
104:35 Goān chōe-jîn tùi sè-chiūⁿ siau-bia̍t! Goān pháiⁿ lâng lóng sí-.khì! Góa ê sim-sîn ah, tio̍h oló Siōng-chú! Lín tio̍h oló Siōng-chú!
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。