诗篇 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
89:1 Kok-lān Tiong ê Si-koa
（ E-chu-la̍h lâng E-thán kà-sī ê si. ）Góa beh chhiùⁿ koa oló Siōng-chú ê chû-ài kàu tī éng-oán; beh ēng góa ê chhùi thoân Lí ê sìn-si̍t kàu bān-sè-tāi.
89:2 In-ūi góa bat kóng, Lí ê chû-ài ē siū kiàn-li̍p kàu éng-oán; Lí ê sìn-si̍t ē kian-kò͘ tī thiⁿ-.ni̍h.
89:3 Lí kóng: Góa kah góa só͘ kéng-soán ê lâng li̍p-iok, tùi góa ê lô͘-po̍k — Ta-bi̍t chiùchōa,
89:4 Góa beh hō͘ lí ê kiáⁿ-sun kian-kò͘ ti̍t-kàu éng-oán, koh kiàn-li̍p lí ê pó-chō kàu bān-sè-tāi. [Sè-la̍h]
89:5 Siōng-chú ah, chiahê thiⁿ ē oló Lí ê kî-sū; tī sèng-ê ê chū-hōe tiong ē oló Lí ê sìn-si̍t.
89:6 Tī thiⁿ-téng siáⁿ lâng ē pí-tit Siōng-chú? Tōa koân-lêng chiá ê chèng kiáⁿ tiong, siáⁿ lâng ū hoat-tō͘ chhin-chhiūⁿ Siōng-chú?
89:7 I tī sèng-ê ê gī-hōe tiong sī ū tōa ui-giâm ê Siōng-tè, pí só͘-ū tī I sì-kho͘-ûi ê koh khah thang kiaⁿ-ùi.
89:8 Bān-kun ê Siōng-tè — Siōng-chú ah, tó chi̍t-ê tōa koân-lêng ê ē-tàng kah Lí pí? Lí ê sìn-si̍t tī Lí ê sì-kho͘-ûi.
89:9 Hái chúi tiòng koân, Lí kā i koán-chè; hái-éng giâ khí-.lâi, Lí hō͘ i pêng-chēng.
89:10 Lí chi̍t-ē hē chhiú to̍h phah-chhùi hái-koài La̍h-hap, chhin-chhiūⁿ thâi-sí-lâng; Lí ēng ū khùi-la̍t ê chhiú phah-sòaⁿ Lí ê tùi-te̍k.
89:11 Thiⁿ sio̍k Lí, tē mā sio̍k Lí; sè-kài kah kî-tiong só͘ chhiong-móa ê bān-mi̍h lóng sī Lí só͘ kiàn-li̍p.
89:12 Lâm-pak sī Lí só͘ chhòng-chō; Tha-bo͘l soaⁿ kah Hel-móng soaⁿ lóng in-ūi Lí ê miâ lâi hoaⁿ-hí.
89:13 Lí ū tōa koân-lêng ê chhiú; Lí ê chhiú ū la̍t, Lí ê chiàⁿ chhiú gia̍h koân-koân.
89:14 Kong-pêⁿ kah gī-lí sī Lí pó-chō ê tē-ki; chû-ài kah sìn-si̍t kiâⁿ tī Lí ê bīn-chêng.
89:15 Ē-hiáu tùi Lí chhut hoaⁿ-hí ê siaⁿ ê lâng chin ū hok-khì! Siōng-chú ah, in beh kin-tòe Lí ê bīn só͘ hoat-chhut ê kng lâi kiâⁿ.
89:16 In ta̍k ji̍t in-ūi Lí ê miâ lâi hoaⁿ-hí, in-ūi Lí ê kong-gī lâi tit tio̍h ko-seng.
89:17 In-ūi Lí sī in khùi-la̍t ê êng-kng; Koh in-ūi Lí kah-ì goán, goán ê kak chiū ē-tàng gia̍h koân.
89:18 Goán ê tîn-pâi sio̍k tī Siōng-chú; goán ê ông sio̍k tī I-su-la-el ê sèng ê.
89:19 Siōng-chú tùi Ta-bi̍t ê Èng-ín
Chá-chêng Lí tī ī-siōng tiong hoan-hù Lí sèng ê jîn-bîn, kóng, " Góa ēng pang-chān ê la̍t hē tī hit-ê tōa koân-lêng ê sin chiūⁿ; góa tùi jîn-bîn tiong kéng-soán i, koh kā i ko-seng.
89:20 Góa chhōe tio̍h Góa ê lô͘-po̍k — Ta-bi̍t, ēng Góa ê sèng-iû kā i boah.
89:21 Góa ê chhiú beh tiāⁿtiāⁿ kah i tông-chāi; góa ê chhiú-kut mā beh hō͘ i kian-kiông.
89:22 Tùi-te̍k bē tàng iâⁿ-kòe i; hiong-ok ê lâng bô hoat-tō͘ kā i khó͘-to̍k.
89:23 Góa beh tī i ê bīn-chêng phah-chhùi i ê tùi-te̍k, kong-kek hiahê oàn-hūn i ê lâng.
89:24 Chóng-.sī, Góa ê sìn-si̍t kah Góa ê chû-ài ē kah i tông-chāi, in-ūi Góa ê miâ, i ê kak ē tit tio̍h gia̍h koân.
89:25 Góa beh hō͘ i ê chhiú chhun-kàu tōa hái, chiàⁿ chhiú chhun-kàu tōa hô.
89:26 I ē chheng-ho͘ Góa kóng: Lí sī góa ê pē, sī góa ê Siōng-tè, sī kiù góa ê chio̍h-pôaⁿ.
89:27 Góa mā beh siat-li̍p i chò tōa-kiáⁿ, chò sè-chiūⁿ siōng koân ê kun-ông.
89:28 Góa beh ūi tio̍h i chhî-siú Góa ê chû-ài kàu éng-oán; Góa kah i só͘ li̍p ê iok it-tēng bē kái-piàn.
89:29 Góa mā beh pó-siú i ê kiáⁿ-sun kàu bān-sè-tāi, hō͘ i ê pó-chō chhin-chhiūⁿ thiⁿ hiahni̍h kú.
89:30 Siat-sú i ê kiáⁿ-sun pàng-sak Góa ê lu̍t-hoat; bô chun-siú Góa ê hoat-tō͘;
89:31 ûi-pōe Góa ê lu̍t-lē, bô chun-siú Góa ê kài-bēng,
89:32 Góa chiū beh ēng koái-á chek-hoa̍t in ê kòe-sit, ēng piⁿ chhú-hoa̍t in ê chōe-ok.
89:33 Chóng-.sī, Góa it-tēng bô kā Góa ê chû-ài choân-pō͘ tùi i siu-hôe, mā it-tēng bē hùi-tû Góa ê sìn-si̍t.
89:34 Góa it-tēng bē sit Góa ê iok, mā bē kái-piàn Góa só͘ kóng ê ōe.
89:35 Góa kí kakī ê sèng-kiat lâi chiùchōa, Góa choa̍t-tùi bô tùi Ta-bi̍t kóng pe̍h-chha̍t.
89:36 I ê kiáⁿ-sun ē thoân-kàu éng-oán, i ê pó-chō tī Góa ê bīn-chêng chhin-chhiūⁿ ji̍t-thâu hiahni̍h kú-tn̂g;
89:37 chhin-chhiūⁿ goe̍h éng-oán khiā chāi, Koh chhin-chhiūⁿ thiⁿ-téng khak-si̍t ê kiàn-chèng. [Sè-la̍h]
89:38 Kun-ông sit-pāi ê Ai-ko
Chóng-.sī, Lí ū tùi Lí siū boah-iû ê siū-khì, kā i ià-siān, kā i khì-sak.
89:39 Lí í-keng thó-ià kah Lí ê lô͘-po̍k só͘ li̍p ê iok, kā i ê bián-liû chau-that tī tē-.ni̍h.
89:40 Lí í-keng thiah i só͘-ū ê lî-pa, hō͘ i ê siâⁿ-pó piàn-sêng pha-hng ê só͘-chāi.
89:41 Kòe-lō͘ lâng lóng kā i chhiúⁿ-toa̍t; keh-piah kok lóng lâi kā i lêng-jio̍k.
89:42 Lí hō͘ i ê tùi-te̍k ê chiàⁿ chhiú gia̍h koân, hō͘ i ê siû-te̍k lóng hoaⁿ-hí.
89:43 Lí hō͘ i ê to-kiàm oan-khiau bē tàng ēng, hō͘ i tī kau-chiàn ê sî khiā bē tiâu.
89:44 Lí kā i êng-hián ê koân-pèng hòe-bô, kā i ê pó-chō chhia-tó tī tē-.ni̍h.
89:45 Lí kiám-chió i chheng-liân ê ji̍t-chí, koh hō͘ i tōa-tōa kiàn-siàu. [Sè-la̍h]
89:46 Khún-kiû Siōng-chú Chín-kiù
Siōng-chú ah, Lí beh koh bih gōa kú? Kám ē kàu éng-oán? Lí ê siū-khì chhin-chhiūⁿ hóe teh to̍h ē gōa kú?
89:47 Kiû Lí ē kì-tit góa it-seng ê sî-kan hiah té, Lí chhòng-chō sè-kan lâng hiah khang-hi!
89:48 Siáⁿ lâng ē kú-tn̂g oa̍h-.leh bē sí, ē kiù i ê lêng-hûn thoat-lī im-hú ê koân-pèng? [Sè-la̍h]
89:49 Chú ah, Lí chá-chêng ê sìn-si̍t tī tó-ūi? Lí tùi Ta-bi̍t chiùchōa ê hiahê chû-ài taⁿ tī tó-ūi?
89:50 Chú ah, kiû Lí kì-liām Lí ê lô͘-po̍k só͘ siū ê lêng-jio̍k, kì-liām góa ê sim-sîn án-chóaⁿ siū tio̍h kiông-sēng ê jîn-bîn bú-jio̍k.
89:51 Siōng-chú ah, Lí ê tùi-te̍k ánne teh lêng-jio̍k, to̍h-sī put-sî tòe teh lêng-jio̍k Lí só͘ boah iû ê.
89:52 Tio̍h oló Siōng-chú ti̍t-kàu éng-oán. A-men! Koh A-men!
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。