诗篇 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
19:1 Siōng-tè Chhòng-chō ê Êng-iāu
( Ta-bi̍t ê si, kau hō͘ ga̍k-koaⁿ. )Chiahê thiⁿ kóng-khí Siōng-tè ê êng-kng, kiong-chhong soan-iông I ê chok-ûi.
19:2 Chit ji̍t tùi hit ji̍t kóng-ōe, chit mê tùi hit mê thoân-chhut tì-sek.
19:3 Bô giân bô gí, bô siaⁿ bô soeh.
19:4 In ê chún-chîn thoân phiàn phó͘-thiⁿ-ē, in ê giân-gí thoân kàu tī tē-ke̍k. Siōng-tè tī in tiong-kan ūi tio̍h ji̍t-thâu an-tì tiùⁿ-pâng.
19:5 Ji̍t-thâu chhin-chhiūⁿ sin-lông chhut i ê pâng, chhin-chhiūⁿ béng-ióng ê lâng hoaⁿ-hí cháu i ê lō͘.
19:6 I tùi thiⁿ ê chit pêng chhut, se̍h kàu thiⁿ ê hit pêng; ta̍k hāng mi̍h lóng tit tio̍h i ê jia̍t-khì.
19:7 Siōng-chú ê Lu̍t-hoat
Siōng-chú ê lu̍t-hoat chê-choân, ē hō͘ lâng ê sim-sîn oa̍h khí-.lâi; Siōng-chú ê kiàn-chèng khak-si̍t, ē hō͘ gōng lâng ū tì-hūi.
19:8 Siōng-chú ê kà-sī chèng-ti̍t, ē hō͘ lâng ê sim hoaⁿ-hí; Siōng-chú ê bēng-lēng chheng-kiat, ē hō͘ lâng ê ba̍k-chiu kng bêng.
19:9 Kèng-ùi Siōng-chú ê tō-lí sī chheng-khì, éng-oán chûn-chāi; Siōng-chú ê phòaⁿ-toàn chin-si̍t, it-chhè lóng sī kong-gī.
19:10 In pí kim, pí chin chē ê sûn-kim khah thang him-bō͘; pí bi̍t, pí phang-pâng tih lo̍h-.lâi ê bi̍t koh khah tiⁿ.
19:11 Jî-chhiáⁿ lu̍t-hoat hō͘ Lí ê lô͘-po̍k siū kéng-kài; siú kài-bēng chiū ē tit tio̍h tōa siúⁿ-sù.
19:12 Siáⁿ lâng ē chai i ê sit-chhò? Kiû Lí tû-khì góa bô-ì-tiong só͘ hoān ê kòe-sit.
19:13 Kiû Lí pó-siú Lí ê lô͘-po̍k bô thiau-kang hoān chōe; m̄-chún hit-ê chōe-ok koán-hat góa; góa chiū ē oân-choân, bián-tit hoān tōa chōe.
19:14 Siōng-chú — góa ê chio̍h-pôaⁿ, kiù-sio̍k góa ê Chú ah; goān góa ê chhùi só͘ kóng ê kah sim só͘ siūⁿ ê, tī Lí ê bīn-chêng tit tio̍h chiap-la̍p.
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。