约伯记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
39:1 Soaⁿ-.ni̍h ê soaⁿ-iûⁿ tang-sî seⁿ, lí kám chai? Lo̍k-bú seⁿ kiáⁿ, lí kám ū khòaⁿ-chhut?
39:2 In ê hoâi-īn tang-sî kàu-goe̍h, lí kám ē-hiáu sǹg? In tang-sî seⁿ, lí kám ē liáu-kái?
39:3 In khut-sin seⁿ kiáⁿ, pàng-chhut in ê lô-khó͘.
39:4 In ê kiáⁿ chiām-chiām pûi-phauh, tī soaⁿ-iá tióng-tōa; in chhut-.khì, chiū bô koh tò tńg-.lâi.
39:5 Siáⁿ lâng pàng iá-lî chhut-khì chū-iû? Siáⁿ lâng tháu soaⁿ-lî ê soh?
39:6 Góa ēng khòng-iá chò i ê chhù, ēng kiâm tē chò i tòa ê só͘-chāi.
39:7 I thí-chhiò siâⁿ lāi ê soan-hoa, kóaⁿ chengseⁿ ê teh hoah, i mā m̄-thiaⁿ.
39:8 Piàn soaⁿ sī i ê chháu-tiûⁿ; i mā chhōe ta̍k chióng chheⁿ-chhùi ê chia̍h-mi̍h.
39:9 Iá-gû kám khéng ho̍k-sāi lí? Á-sī hioh tī lí ê chô piⁿ?
39:10 Lí kám ē ēng soh kā iá-gû pa̍k tī lê-kau? I kám ē tòe lí pê soaⁿ-kok?
39:11 Kám thang in-ūi i la̍t tōa, chiū óa-khò i? Kám thang kā lí ê khang-khòe kau-tài i?
39:12 Lí kám thang sìn-khò i ē kā lí ê chéng-chí tòa tńg-.lâi? Jî-chhiáⁿ siu-khioh lí ê tiūⁿ-tiâⁿ?
39:13 Tô-chiáu ê si̍t hoaⁿ-hí teh ia̍t; chóng-.sī, i ê si̍t kah mn̂g kám ū chû-ài?
39:14 In-ūi i kā i ê nn̄g pàng tī tē-.ni̍h, hō͘ i tī thô͘-soa tit tio̍h sio-lō;
39:15 Ι bô siūⁿ tio̍h kha ē lap tio̍h, iá-siù ē ta̍h tio̍h.
39:16 I bô khó-liân i ê kiáⁿ, ná chhin-chhiūⁿ m̄-sī i ê kiáⁿ; i ê lô-khó͘ khang-khang, i mā bô chhau-hoân.
39:17 In-ūi Siōng-tè bô hō͘ i tì-hūi, mā bô hō͘ i ū lêng-khiàu.
39:18 I théng-sin koân-koân ê sî, chiū biáu-sī bé kah khiâ bé ê lâng.
39:19 Bé ê la̍t kám sī lí hō͘ i ê? Lí ēng ē chhàng khí-.lâi ê chang moa i ê ām-kún?
39:20 Lí kám ē hō͘ i tiô-thiàu chhin-chhiūⁿ chháu-meh? I tián-ui phǹg-phǹg háu chin thang kiaⁿ.
39:21 I tī soaⁿ-kok tiong ēng tê pê thô͘, kakī hoaⁿ-hí i ê la̍t; i chhut-khì gêng-chiap peng-khì.
39:22 I biáu-sī thang kiaⁿ ê tāichì, mā bô lún, mā bô in-ūi to-kiàm lâi oa̍t tò-tńg.
39:23 Chìⁿ-tē kah kng nà-nà ê chhiuⁿ, í-ki̍p chhiú-pio, tī I ê sin chiūⁿ khiang-khiang háu ū siaⁿ.
39:24 I hoat sèng-tē kah tōa siū-khì, kā thô͘ thun lo̍h-.khì; chi̍t-ē thiaⁿ tio̍h sàu-kak ê siaⁿ, chiū m̄ tiāⁿtiāⁿ khiā-.leh.
39:25 Kiàn-nā sàu-kak tân, I chiū kóng, Ā-hah, i tùi hn̄g-hn̄g phīⁿ tio̍h kau-chiàn kah kun-tiúⁿ chhin-chhiūⁿ lûi ê siaⁿ, í-ki̍p hán-hoah ê siaⁿ.
39:26 Lāu-eng teh poe, thí-khui i ê si̍t, ǹg lâm khì, kám sī khò lí ê tì-hūi?
39:27 Eng-chiáu chhèng koân tī koân ê só͘-chāi chò siū, kám sī chiàu lí ê bēng-lēng?
39:28 I tiàm tī chio̍h-phiâⁿ, tòa tī kiā-piah kah kian-kò͘ ê só͘-chāi.
39:29 Tùi hia chhōe chia̍h-mi̍h, ba̍k-chiu kim-kim khòaⁿ hn̄g-hn̄g.
39:30 I ê kiáⁿ teh suh hoeh; si-thé tī tó-ūi, i mā tī hia.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。