约伯记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
33:1 Io-buh, taⁿ chhiáⁿ lí thiaⁿ góa ê ōe, chù-ì thiaⁿ góa só͘-ū ê giân-gí.
33:2 Lí khòaⁿ, góa taⁿ khui góa ê chhùi, góa ê chi̍h tī chhùi lāi teh kóng.
33:3 Góa ê ōe beh kóng-chhut góa sim-lāi ê chèng-ti̍t, góa ê chhùi-tûn beh láu-si̍t kóng-chhut góa só͘ chai ê tāichì.
33:4 Siōng-chú ê Sèng Sîn chhòng-chō góa; Choân-lêng-.ê ê khùi hō͘ góa tit tio̍h oa̍h-miā.
33:5 Lí nā ē, chiū tio̍h ìn góa, khí-lâi khiā, pâi-lia̍t tī góa ê bīn-chêng.
33:6 Lí khòaⁿ, góa tī Siōng-tè ê bīn-chêng kah lí sio-siâng, mā sī ēng thô͘ lia̍p-chiâⁿ ê.
33:7 Lí khòaⁿ, góa bô ēng ui-giâm hō͘ lí kiaⁿ, mā bô ēng góa ê sè-le̍k teh lí.
33:8 Lí só͘ kóng ê, góa si̍t-chāi ū thiaⁿ-.tio̍h, mā ū thiaⁿ tio̍h lí ê ōe ê siaⁿ, kóng:
33:9 " Góa sī chheng-khì, bô kòe-sit, góa sī chheng-pe̍h, tī góa sim-lāi mā bô chōe.
33:10 Lí khòaⁿ, Siōng-tè chhōe khang-khiah lâi kong-kek góa, kā góa lia̍h-chò sī I ê tùi-te̍k.
33:11 I ēng kha-liâu chhiú-khàu khàu góa ê kha-chhiú, tì-ì khòaⁿ góa só͘-ū ê lō͘.
33:12 Lí khòaⁿ, kóng-kàu che, lí sī put-gī, góa beh ìn lí; in-ūi Siōng-tè pí lâng khah tōa.
33:13 Lí ná ē kah I sio-chèⁿ? In-ūi I ê tāichì I lóng bô kái-bêng.
33:14 In-ūi Siōng-tè kóng chi̍t pái koh chi̍t pái, chóng-.sī, lâng lóng bô tì-ì.
33:15 Lâng tó tī bîn-chhn̂g teh khùn, kàu i khùn tāng-bîn ê sî, tī bîn-bāng tiong, tī àm-sî ê ī-siōng tiong,
33:16 Siōng-tè khui in ê hīⁿ-khang, khàm ìn tī in só͘ siū ê kà-sī.
33:17 beh hō͘ lâng kái-ōaⁿ só͘ kè-ōe ê tāichì, chó͘-chí lâng ê kiau-ngō͘.
33:18 Chó͘-chí i ê oa̍h-miā bô lo̍h chhim kheⁿ, i ê sèⁿ-miā mā bô tùi to-kiàm lâi sí.
33:19 Lâng tī bîn-chhn̂g téng siū thàng-thiàⁿ ê kéng-kài; tī i ê kut lāi chhin-chhiūⁿ teh kau-chiàn bô soah.
33:20 Tì-sú i ê oa̍h-miā thó-ià chia̍h-mi̍h, i ê sim-sîn thó-ià hó-bī.
33:21 I ê bah siau-sán, bô thang khòaⁿ-.tio̍h; pêng-siông sî bô khòaⁿ-.tio̍h ê kut, taⁿ lóng thóng chhut-.lâi.
33:22 I ê sèⁿ-miā chiap-kīn chhim kheⁿ; i ê oa̍h-miā kīn tī hiahê bia̍t-bông sèⁿ-miā ê.
33:23 Nā ū chi̍t-ê sù-chiá kah i tông-chāi, to̍h-sī chi̍t-chheng-ê tiong-kan ê chi̍t-ê, thè i kóng-ōe ê, kā lâng só͘ tio̍h chò ê kā i chí-sī,
33:24 Siōng-tè chiū si un hō͘ i, kóng: Kiù i bián-tit lo̍h chhim kheⁿ, góa í-keng chhōe tio̍h kā i sio̍k-hôe ê.
33:25 I ê bah pí gín'á ê bah khah iù-nńg; i ē hôe-ho̍k siàu-liân ê ji̍t-chí.
33:26 I ē tùi Siōng-tè kî-tó, Siōng-tè hoaⁿ-hí i; i kìⁿ tio̍h Siōng-tè ê bīn lâi hoaⁿ-hí, Siōng-tè koh sǹg hit-ê lâng chò gī.
33:27 I tī lâng ê bīn-chêng chhiùⁿ koa kóng: Góa ū hoān chōe, tian-tò sī-hui, bô lī-ek góa.
33:28 Siōng-tè kiù-sio̍k góa ê sèⁿ-miā, bián lo̍h chhim kheⁿ; góa ê oa̍h-miā mā ē khòaⁿ tio̍h kng.
33:29 Lí khòaⁿ, chiahê só͘-ū ê tāichì, Siōng-tè kiâⁿ tī lâng, nn̄g pái, saⁿ pái,
33:30 ūi tio̍h beh tùi chhim kheⁿ kiù i ê sèⁿ-miā tò tńg-.lâi, hō͘ i tit tio̍h oa̍h-miā ê kng chiò i.
33:31 Io-buh, lí tio̍h àⁿ hīⁿ-khang thiaⁿ góa ê ōe, tio̍h tiām-tiām, góa chiū beh kóng.
33:32 Lí nā ū ōe thang kóng, chiū ìn góa; chò lí kóng, in-ūi góa ài lia̍h lí chò gī.
33:33 Nā bô, lí tio̍h thiaⁿ góa kóng; lí tio̍h tiām-tiām, góa beh kà lí tì-hūi.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。