约伯记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
32:1 E-li-hu ê Ōe
Chiū ánne, chit saⁿ-ê lâng chiū thêng-chí kóng-ōe, bô koh ìn Io-buh, in-ūi i kakī khòaⁿ-chò sī gī.
32:2 Hit sî, ū Bu-chih lâng, sio̍k tī Lâm ê cho̍k, Ba-la-khiah ê kiáⁿ E-li-hu, chin siū-khì; i siū-khì Io-buh, in-ūi i lia̍h kakī pí Siōng-tè khah ū gī.
32:3 I mā siū-khì i saⁿ-ê pêng-iú, in-ūi in siūⁿ bô ōe thang ìn, iáu koh gí-tiāⁿ Io-buh ū chōe.
32:4 E-li-hu beh kah Io-buh kóng-ōe, iáu teh thèng-hāu; sī in-ūi in pí i khah chē hòe.
32:5 E-li-hu khòaⁿ tio̍h chit saⁿ lâng chhùi lāi bô ōe thang ìn, chiū tōa siū-khì.
32:6 Bu-chih lâng Ba-la-khiah ê kiáⁿ E-li-hu ìn kóng: Góa siàu-liân, lín nî-lāu; só͘-í, góa thè-niū, m̄-káⁿ tùi lín pâi-lia̍t góa ê ì-kiàn.
32:7 Góa siūⁿ, ji̍t-chí chē ê lâng tio̍h kóng, hòe-siū koân ê lâng tio̍h ēng tì-hūi kà-sī lâng.
32:8 M̄ koh, lâng ê lāi-bīn ū sim-sîn, Choân-lêng-.ê ê khùi mā hō͘ lâng chhong-bêng.
32:9 Khah sī-tōa ê bô tútú lóng ū tì-hūi, khah ló-liân ê bô tútú lóng ē bêng-pe̍k kong-pêⁿ.
32:10 Só͘-í, góa kóng: Lín tio̍h thiaⁿ góa ê ōe, góa mā beh pâi-lia̍t góa ê ì-kiàn.
32:11 Lí khòaⁿ, góa í-keng thèng-hāu lín ê ōe, jî-chhiáⁿ hīⁿ-khang ū thiaⁿ lín ê lí-lūn; thèng-hāu lín chhōe tio̍h thang kóng ê ōe.
32:12 Góa chù-ì thiaⁿ lín kóng. Lí khòaⁿ, lín tiong-kan bô chi̍t-ê lâng kā Io-buh piān-tó, mā bô chi̍t-ê lâng ìn i ê ōe.
32:13 Lín m̄ thang kóng, goán tú tio̍h tì-hūi; Siōng-tè ē iâⁿ-kòe tì-hūi, lâng bē tàng.
32:14 Io-buh bô ēng ōe kah góa piān-lūn; góa mā bô beh ēng lín ê ōe ìn i.
32:15 In gāng-gāng bô koh ìn, bô ōe thang kóng.
32:16 In bô kóng-ōe, tiāⁿtiāⁿ khiā-teh bô koh ìn, góa kám tio̍h koh thèng-hāu?
32:17 Góa mā beh chīn góa ê hūn-gia̍h lâi ìn, pâi-lia̍t góa ê ì-kiàn.
32:18 In-ūi góa ū ōe móa pak-tó͘, góa lāi-bīn ê sim-sîn kek-tōng góa.
32:19 Lí khòaⁿ, góa ê pak-tó͘ lāi chhin-chhiūⁿ hong ba̍t ba̍t ê chiú, mā chhin-chhiūⁿ sin ê phôe-tē teh beh piak-li̍h.
32:20 Góa beh kóng-chhut, hō͘ góa tháu khùi; góa beh khui chhùi lâi ìn.
32:21 Góa bô beh khòaⁿ lâng ê sin-hūn, mā bô beh phô͘-tháⁿ lâng.
32:22 In-ūi góa bē hiáu kā lâng phô͘-tháⁿ; góa nā ū ánne chò, chhòng-chō góa ê Siōng-tè ē chin kín kā góa tû-bia̍t.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。