约伯记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
28:1 Siōng-chàn Tì-hūi
Chhut gîn ū i ê khòng, só͘ toàn-liān ê kim mā ū i ê só͘-chāi teh chhut.
28:2 Thih sī tùi tē-.ni̍h chhú chhut-.lâi, tâng sī tùi chio̍h-khòng iûⁿ chhut-.lâi.
28:3 Lâng siau-bia̍t hit-ê o͘-àm, chhōe kàu chīn-té; ū o͘-àm kah sí-ìm ê chio̍h-khòng tiong.
28:4 I lī-khui lâng kià-kha ê só͘-chāi khì khui hia̍t, kiâⁿ tī hit téng-bīn ê lâng bô siūⁿ tio̍h i; in lī-khui lâng soah tūi lo̍h-khì hia̍t tiong, hàiⁿ-lâi hàiⁿ-khì.
28:5 Kóng tio̍h tē, bí-niûⁿ tùi hia chhut; i ê ē-té chhin-chhiūⁿ hō͘ hóe kā i péng khí-.lâi.
28:6 Tē ê chio̍h-khòng tiong ū nâ-pó-chio̍h, i mā ū kim-soa.
28:7 Hit tiâu lō͘ eng-chiáu m̄ bat; sió-eng ê ba̍k-chiu mā bô khòaⁿ-.tio̍h.
28:8 Ok siù m̄ bat ta̍h tio̍h i, béng sai mā m̄ bat tùi hia keng-kòe.
28:9 Siōng-tè chhun chhiú phah tēng chio̍h, tùi soaⁿ ê kin-ki kā i péng khí-.lâi.
28:10 I tī chio̍h-thâu tiong khui kau, chhin-ba̍k khòaⁿ tio̍h ta̍k chióng ê pó-bu̍t.
28:11 I kā chúi that-ba̍t hō͘ i bē tih lo̍h-.lâi; koh the̍h-chhut ún-ba̍t ê mi̍h lâi hō͘ i kìⁿ tio̍h kng.
28:12 Chóng-.sī, tùi tó-ūi ē-tàng chhōe tio̍h tì-hūi? Chhong-bêng ê só͘-chāi tī tó-ūi?
28:13 Tì-hūi ê kè-chîⁿ bô lâng chai, tī oa̍h-lâng ê tē mā bô tè chhōe.
28:14 Chhim-ian kóng: bô tī góa chia; tōa hái kóng: bô kah góa tông-chāi.
28:15 Bē-tàng ēng n̂g-kim lâi tit tio̍h i, mā bē tàng chhìn gîn chò i ê kè-chîⁿ.
28:16 O-hui ê kim bē ta̍t tio̍h i; pó-kùi ê phek-ge̍k kah nâ-pó-chio̍h mā bē tàng.
28:17 N̂g-kim kah po-lê bē pí-tit i; sûn-kim ê khì-kū bô kàu-gia̍h kah i sio ōaⁿ.
28:18 Sian-ô͘ chúi-chiⁿ lóng bô kàu-gia̍h thang kóng; in-ūi tit tio̍h tì-hūi iâⁿ-kòe chin-chu.
28:19 Kú-si̍t ê n̂g-ge̍k kah i bē pí-tit; chiok-siâⁿ ê kim mā put-jû i.
28:20 Án-ne, tì-hūi sī tùi tó-ūi lâi? Chhong-bêng ê só͘-chāi tī tó-ūi?
28:21 Kì-jiân tùi só͘-ū ê oa̍h-mi̍h ê ba̍k-chiu ún-ba̍t; tùi khong-tiong ê poe-chiáu am-khàm.
28:22 A-bat-tóng（ chù, Hi-bú-lâi bûn ê im-tha̍k, ì-sù sī "bia̍t-bông". ）kah sí-sit kóng: goán hīⁿ-khang thiaⁿ tio̍h i ê hong-siaⁿ.
28:23 Siōng-tè bêng-pe̍k tì-hūi ê lō͘, mā chai i ê só͘-chāi.
28:24 In-ūi I kàm-chhat kàu tē ê ke̍k-thâu, piàn-khòaⁿ phó͘-thiⁿ-ē.
28:25 I tiāⁿ tio̍h hong ê khin-tāng, koh niû chúi ê chē-chió.
28:26 I kā hō͘-chúi tiāⁿ tio̍h lē, kā lûi-tiān tiāⁿ tio̍h i ê lō͘.
28:27 Hit sî, I khòaⁿ tio̍h tì-hūi lâi kā i kóng bêng, I kā i chō-sêng, koh kā i cha-chhat.
28:28 I tùi lâng kóng: Lí khòaⁿ, kèng-ùi Siōng-chú to̍h-sī tì-hūi, lī-khui pháiⁿ to̍h-sī chhong-bêng.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。