约伯记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
21:1 Io-buh ìn kóng,:
21:2 Lín tio̍h tì-ì thiaⁿ góa ê ōe, ēng chit-ê chò lín ê an-ùi.
21:3 Chhiáⁿ khoan-iông góa, góa beh koh kóng, góa kóng liáu, chhut-chāi lí khau-sé.
21:4 Kóng tio̍h góa, góa kám sī tùi lâng ai-oàn? Góa ê sim-sîn án-chóaⁿ bô tio̍h-kip?
21:5 Lín tio̍h khòaⁿ góa lâi tio̍h-kiaⁿ kah gāng-.khì, ēng chhiú am chhùi.
21:6 Góa nā siūⁿ tio̍h chiū kiaⁿ, kui seng-khu phi̍h-phi̍h chhoah.
21:7 Pháiⁿ lâng ná ē oa̍h-.leh, chia̍h tn̂g hòe-siū, sè-le̍k kiông-sēng?
21:8 In khòaⁿ tio̍h kiáⁿ-sun kah in pêⁿ-pêⁿ sêng-tióng; in ê kiáⁿ-sun tī in ê ba̍k-chiu chêng mā sī ánne.
21:9 In ê ka-koàn an-jiân bô kiaⁿ; Siōng-tè ê koái-á mā bô kā in phah.
21:10 In ê gû-káng put-toān seⁿ-thòaⁿ, in ê gû-bó seⁿ kiáⁿ mā bô làu-the.
21:11 In chhe gín'á chhut-khì chhin-chhiūⁿ iûⁿ-kûn, in ê kiáⁿ-jî sì-kè tiô-thiàu.
21:12 In tòe lin-long-kó͘ kah khîm lâi chhiùⁿ koa, koh in-ūi phín-siau ê siaⁿ lâi hoaⁿ-hí.
21:13 In hó kòe ji̍t-chí, sū-sū heng-thong; chi̍t-ba̍k-nih kú lo̍h im-kan.
21:14 In tùi Siōng-tè kóng: Lí tio̍h lī-khui goán, goán bô ài bat Lí ê lō͘.
21:15 Choân-lêng-.ê sī siáⁿ lâng, hō͘ goán tio̍h ho̍k-sāi I? Goán tùi I kî-kiû, ū siáⁿ-mi̍h lī-ek?
21:16 Lí khòaⁿ, in ê hok-khì m̄-sī tī in ê chhiú; goān pháiⁿ lâng ê kè-bô͘ lī-khui góa hn̄g-hn̄g.
21:17 Pháiⁿ lâng ê teng ē hoa, chai-hō ē kàu tī in; Siōng-tè ê siū-khì hō͘ in tú tio̍h kan-khó͘, ū gōa chē pái?
21:18 In chhin-chhiūⁿ hong chêng ê chháu-á-iù, chhin-chhiūⁿ kông hong chhoe-.khì ê chho͘-khng ū gōa chē pái?
21:19 Lín kóng: Siōng-tè kā i ê chōe-ok chek-chū tī i ê kiáⁿ; góa kóng: M̄ ta̍t tio̍h pò-èng i pún-sin hō͘ i kakī chai.
21:20 Hō͘ i chhin-ba̍k khòaⁿ tio̍h kakī pāi-hoāi, pún-sin lim Choân-lêng-.ê ê siū-khì.
21:21 I ê nî-ji̍t pòaⁿ tiong-tô͘ choa̍t-tn̄g, kòe-sin-.khì, i tī i ê chhù ū siáⁿ-mi̍h khoài-lo̍k?
21:22 Siōng-tè sím-phòaⁿ hiahê tī koân ūi ê lâng, siáⁿ lâng ē kā tì-sek kà-sī i?
21:23 Ū lâng kàu sí iáu khùi-la̍t chê-pī, chhiong-móa tit tio̍h pêng-chēng an-jiân.
21:24 I ê heng-khám chin pûi, i ê kut-chhóe chu-jūn.
21:25 Ū lâng chi̍t-sì-lâng sim thòng-khó͘, lóng m̄ bat tam tio̍h hok-khì.
21:26 In lóng sio-siâng tó tī thô͘-.ni̍h, hō͘ thâng khàm ba̍t.
21:27 Lí khòaⁿ, góa chai lín ê ì-sù kah lín oan-óng góa ê kè-bô͘.
21:28 In-ūi lín kóng: Pà-ông ê chhù tī tó-ūi? Pháiⁿ lâng pêng-sî tòa ê chhù tī tó-ūi?
21:29 Lín kám bô mn̄g kòe lō͘ ê lâng? Kám bē jīn-tit in ê chèng-kì?
21:30 Chiū-sī pháiⁿ lâng tī chai-hō ê ji̍t tit tio̍h lâu-.leh, tī siū-khì ê ji̍t tit tio̍h thoat-lī.
21:31 I só͘ kiâⁿ ê, siáⁿ lâng tng-bīn kóng-khí? I só͘ chò ê, siáⁿ lâng kā i pò-èng?
21:32 Chóng-.sī, i ē hō͘ lâng kng kàu bōng-á-po͘, koh ū lâng tī i ê bōng kò͘-siú.
21:33 Soaⁿ-kok ê thô͘-oân i lia̍h-chò tiⁿ; ē ū kûn-chiòng tòe tī i ê āu-bīn, chhin-chhiūⁿ tī i tāi-seng ê sǹg bē liáu.
21:34 Lín só͘ ìn-tap ê ōe kóng si̍t-chāi lóng sī ké, lín ná ē khang-khang an-ùi góa?
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。