约伯记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
16:1 Io-buh ìn kóng:
16:2 Chit khoán ê ōe, góa ū thiaⁿ-kòe chin chē à; lín ê an-ùi lóng sī hō͘ lâng tian-tò kan-khó͘.
16:3 Chit khoán hàm-kó͘ ê ōe, kám ū kiông-chīn? Ū siáⁿ-mi̍h thang kek-tōng lí lâi ìn?
16:4 Góa mā ē-hiáu kóng chhin-chhiūⁿ lín chit khoán ê ōe; lín nā tiàm tī góa ê kéng-gū, góa mā ē tàu kui kōaⁿ ê ōe lâi kā lín kong-kek; koh ē tùi lín iô góa ê thâu.
16:5 Chóng-.sī, góa ē ēng chhùi hō͘ lín kian-kò͘; ēng chhùi-tûn ê an-ùi hō͘ lín kiám khin thòng-khó͘.
16:6 Góa nā kóng ōe, góa ê iu-būn iû-goân bô kiám khin; góa nā tiām-tiām, iu-būn kám chiū ē lī-khui góa?
16:7 Chóng-.sī, taⁿ Siōng-tè hō͘ góa khùn-khó͘, koh hō͘ góa ê tâng-phōaⁿ lī-khui góa.
16:8 Lí ū lia̍h tio̍h góa, sī thang chò kiàn-chèng; góa ê siau-sán khí-lâi kong-kek góa, tam góa ê bīn-chêng chò kiàn-chèng.
16:9 Siōng-tè siū-khì, thiah-li̍h góa, pek-hāi góa, I tùi góa kā khí; góa ê tùi-te̍k ba̍k-chiu kim-kim teh kā góa gîn.
16:10 In tùi góa khui in ê chhùi, siàn góa ê chhùi-phóe lâi lêng-jio̍k góa; in chū-chi̍p lâi kong-kek góa.
16:11 Siōng-tè kā góa kau hō͘ put-gī ê lâng, kā góa hiat tī pháiⁿ lâng ê chhiú.
16:12 Góa an-jiân ê sî, I kā góa at-tn̄g, lia̍p góa ê ām-kún, kā góa siak kah chhùi-chhùi; koh chhāi góa chò I ê chìⁿ-pà.
16:13 I ê chìⁿ sì-bīn ûi góa, phòa-li̍h góa ê pak-lāi, mā bô khoan-iông, kā góa ê táⁿ piàⁿ tī tē-.ni̍h.
16:14 I phah góa, phah liáu koh phah; chhin-chhiūⁿ ióng-sū cháu-lâi kong-kek góa.
16:15 Góa tī góa ê phôe-hu thīⁿ môa-pò͘, kā góa ê kak tàm lo̍h thô͘.
16:16 Góa ê bīn in-ūi lâu ba̍k-sái chiū piàn âng; tī góa ê ba̍k-chiu phôe ū sí ê ìm-ńg.
16:17 Chóng-.sī, góa ê chhiú bô pō-gio̍k; góa ê kî-tó mā sī chheng-khì.
16:18 Tē ah, m̄ thang jia-khàm góa ê hoeh; goān góa ê tōa-siaⁿ hoah bô thêng-hioh ê só͘-chāi.
16:19 Lí khòaⁿ, taⁿ góa ê kiàn-chèng tī thiⁿ-.ni̍h, góa pó-jīn ê lâng tī téng-bīn.
16:20 Góa ê pêng-iú khau-sé góa, chóng-.sī, góa ê ba̍k-chiu ǹg Siōng-tè lâu ba̍k-sái.
16:21 Goān i ǹg Siōng-tè lâi thè lâng piān-bêng, mā thè lâng ê kiáⁿ tī i ê chhù-piⁿ piān-bêng.
16:22 In-ūi koh kòe kúi nî, góa beh khì kiâⁿ hit tiâu khì bô koh tò tńg-.lâi ê lō͘.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。