约伯记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
10:1 Góa ê sim bô ài oa̍h, góa beh tōa táⁿ kóng-chhut góa ê ai-oàn; góa sim-lāi ê thòng-khó͘, góa chiah beh kóng.
10:2 Góa beh tùi Siōng-tè kóng, m̄ thang tēng góa ū chōe, tio̍h chí-sī góa, Lí ūi siáⁿ-mi̍h kah góa cheng-piān?
10:3 Lí kiâⁿ ap-chè, koh khòaⁿ-khin Lí ê chhiú só͘ chō ê, koh ēng kng chiò pháiⁿ lâng ê kè-bô͘, Lí kám lia̍h chiahê chò hó?
10:4 Lí ê ba̍k-chiu kám sī bah chò ê, á-.sī Lí teh khòaⁿ ná chhin-chhiūⁿ lâng teh khòaⁿ?
10:5 Lí ê ji̍t-chí kám chhin-chhiūⁿ lâng ê ji̍t-chí? Á-sī Lí ê nî-ji̍t chhin-chhiūⁿ lâng ê nî-ji̍t?
10:6 Lí chiah tui-kiù góa ê chōe-gia̍t, chhōe góa ê chōe-kò.
10:7 Lí kám m̄-chai góa sī bô chōe, mā bô chi̍t-ê lâng ē-tàng kiù góa thoat-lī Lí ê chhiú?
10:8 Lí ê chhiú ū chhòng-chō góa, tiau-tok góa ê sù-chi pah-thé, Lí iáu koh teh húi-bia̍t góa.
10:9 Kiû Lí kì-liām, Lí bat ná chhin-chhiūⁿ teh chhiau-thô͘ lâi chè-chō góa; Lí kám sī beh hō͘ góa koh kui tī thô͘-hún?
10:10 Lí kám m̄-sī kā góa piàⁿ-chhut chhin-chhiūⁿ leng, hō͘ góa kiat kui thoân chhin-chhiūⁿ leng-piáⁿ?
10:11 Lí ēng phôe kah bah hō͘ góa chhēng, koh ēng kut kah kin hō͘ góa liân-kiat.
10:12 Lí sù hō͘ góa oa̍h-miā kah chû-ài, Lí ê chiàu-kò͘ pó-choân góa ê sèⁿ-miā.
10:13 Chiahê tāichì Lí lóng khǹg tī Lí ê sim-lāi; góa chai Lí goân-pún to̍h ū chit-ê ì-sù.
10:14 Góa nā hoān chōe, Lí chiū chù-ì góa, mā bô beh lia̍h góa chò bô chōe.
10:15 Góa nā kiâⁿ pháiⁿ, chiū ū chai-hō, góa nā chò gī, mā m̄-káⁿ gia̍h-khí thâu; móa-sim kiàn-siàu, chhin-ba̍k khòaⁿ tio̍h góa ê kan-khó͘.
10:16 Góa nā thâu gia̍h koân, Lí chiū chhin-chhiūⁿ sai jiok óa-lâi beh lia̍h góa, koh tùi góa hián-chhut Lí ê kî-ī.
10:17 Lí koh siat Lí ê kiàn-chèng lâi kong-kek góa, tī góa ê sin chiūⁿ ke-thiⁿ Lí ê siū-khì; kun-peng chi̍t tūi kòe chi̍t tūi, beh lâi kong-kek góa.
10:18 Lí ná ē hō͘ góa chhut thai? Put-jû hit sî tn̄g-khùi, bô hō͘ lâng ê ba̍k-chiu khòaⁿ tio̍h góa.
10:19 Án-ne, góa chiū ū, ná chhin-chhiūⁿ bô; chi̍t-ē chhut-sì chiū sàng ji̍p-khì bōng lāi.
10:20 Góa ê ji̍t-chí kám m̄-sī chin chió? Kiû Lí chhiáⁿ thêng lo̍h-.lâi, kā góa pàng-khoan,
10:21 Hō͘ góa khì liáu-āu, bô koh tò tńg-.lâi, to̍h-sī khì o͘-àm kah sí-ìm ê tē ê chìn-chêng, thang lio̍h-á tit tio̍h an-ùi.
10:22 Hitê tē àm-àm chhin-chhiūⁿ o͘-ba̍k, sī sí-ìm hūn-tūn, i ê kng chhin-chhiūⁿ o͘-ba̍k.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。