约伯记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
7:1 Lâng tī sè-kan kám m̄-sī lô-khó͘ ê sî-kî? I ê ji̍t-chí kám m̄-sī chhin-chhiūⁿ chhiàⁿ-kang ê ji̍t-chí?
7:2 Chhin-chhiūⁿ lô͘-po̍k pek-chhiat him-bō͘ ji̍t lo̍h ê iáⁿ, chhin-chhiūⁿ chhiàⁿ-kang ǹg-bāng kang-chîⁿ;
7:3 góa mā ánne it-tēng ē keng-kòe chin chē khang-hi ê goe̍h, koh ū ià-siān ê mê-sî kā góa tiāⁿ tio̍h.
7:4 Góa tó-.leh ê sî, chiū kóng, tang-sî thang khí-.lâi? Mê-sî ná ē hiahni̍h tn̂g? Góa hoan-lâi hoan-khì, ti̍t-ti̍t kàu thiⁿ-kng.
7:5 Góa kui seng-khu lóng sī thâng kah kui tè ê thô͘; góa phôe-hu ê liàp-á siu chhùi chiū koh chhut-lâng.
7:6 Góa ê ji̍t-chí pí so khah kín, ti̍t-ti̍t kòe-.khì, bû-só͘ ǹg-bāng.
7:7 Tio̍h ē kì-tit góa ê oa̍h-miā ná chhoán chi̍t-ē khùi; góa ê ba̍k-chiu bē koh khòaⁿ tio̍h hó kong-kéng.
7:8 Khòaⁿ góa ê lâng, i ê ba̍k-chiu ē bô koh khòaⁿ tio̍h góa; lí ê ba̍k-chiu ē siòng góa, chóng-.sī, góa bô tī-.leh.
7:9 Hûn siau-sòaⁿ chiū kòe-.khì, lâng lo̍h im-kan mā bē koh khí-.lâi.
7:10 I bô koh tńg-lâi kakī ê chhù, pún só͘-chāi mā bô koh jīn-tit i.
7:11 Só͘-í, góa bô beh iok-sok góa ê chhùi; góa ê sim-sîn iu-khó͘, góa beh ánne kóng chhut-.lâi; góa ê sim thòng-khó͘, góa beh ánne piān-kái.
7:12 Góa kám sī tōa hái á-.sī hái-koài? Lí kèng-jiân siat-hông lâi kài-pī góa?
7:13 Góa nā kóng, góa ê bîn-chhn̂g ē kā góa an-ùi, góa ê chhn̂g-pho͘ ē kái góa ê iu-būn;
7:14 lí chiū ēng bîn-bāng hō͘ góa kiaⁿ, ēng ī-siōng hō͘ góa lún.
7:15 Tì-sú góa ē hông chhui-sí, ài sí-bông, khah iâⁿ chhun chiahê kut.
7:16 Góa iàm-hūn sèⁿ-miā, bô ài éng-oán oa̍h-.leh; goān lí chhut-chāi góa, in-ūi góa ê ji̍t-chí lóng sī khang-hi.
7:17 Lâng sī siáⁿ-mi̍h, tì-sú Siōng-tè lia̍h i chò tōa, tì-sú Siōng-tè kā i khòa tī sim-.ni̍h,
7:18 tì-sú Siōng-tè ta̍k chá-khí kàm-chhat i, sî-khek kā i khó-giām?
7:19 Siōng-tè beh kàu tang-sî chiah ē oa̍t tńg-sin mài khòaⁿ góa, pàng góa chi̍t-sî-á chū-iû, hō͘ góa thun chi̍t-ē-á nōa?
7:20 Kàm-chhat lâng ê Siōng-tè ah, góa nā ū chōe, gāi tio̍h Lí siáⁿ-mi̍h? Lí ná ē kā góa chò Lí ê chìⁿ-pà? Tì-sú góa khòaⁿ kakī chò tāng-tàⁿ.
7:21 Lí ná ē m̄ sià-bián góa ê kòe-sit, tû-khì góa ê chōe-kò? In-ūi góa taⁿ beh tó tī tîn-ai, Lí ē tì-ì chhōe góa, chóng-.sī, góa í-keng bô tī-.leh.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。