约伯记 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
5:1 Taⁿ chò lí kiû-kiò, khòaⁿ ū siáⁿ lâng ē ìn lí? Chiahê sèng-.ê ê tiong-kan, lí beh ǹg siáⁿ lâng?
5:2 In-ūi siū-khì ê sim ē hāi-sí gōng lâng; oàn-tò͘ ē thâi-sí han-bān ê lâng.
5:3 Góa bat khòaⁿ tio̍h gōng lâng tèng-kin, chóng-.sī, hut-jiân-kan góa chiù-chó͘ i tòa ê só͘-chāi.
5:4 I ê kiáⁿ-jî lī-khui an-ún hn̄g-hn̄g; tī siâⁿ mn̂g siū ap-pek, mā bô lâng kā in chín-kiù.
5:5 Iau ê lâng chia̍h i só͘ siu-sêng ê, tī chhì-phè lāi mā chhiúⁿ-.khì, ū oa̍h-tauh khui chhùi thun-chia̍h i ê châi-bu̍t.
5:6 In-ūi chai-hō m̄-sī tùi thô͘-.ni̍h chhut-.lâi, hoān-lān mā m̄-sī tùi tē-.ni̍h hoat-seng;
5:7 chóng-.sī, lâng chhut-sì tiāⁿ tio̍h ū hoān-lān, chhin-chhiūⁿ hóe-chheⁿ poe chiūⁿ-koân.
5:8 Ōaⁿ-chò góa, góa beh kiû-kiò Siōng-tè; kā góa ê tāichì kau-tài Siōng-tè.
5:9 Chiū-sī hit ūi chò tāichì tōa kàu bē chhek-to̍k tit ê, kiâⁿ kî-sū sǹg bē liáu ê Siōng-tè.
5:10 I lo̍h hō͘ tī tē-bīn chiūⁿ, siúⁿ-sù chúi tī chhân-hn̂g-.ni̍h.
5:11 Ē kā pi-bî ê lâng an-tì tī koân ê só͘-chāi; ē kā ai-chhám ê lâng kí-khí tī an-ún ê tē.
5:12 I phò-hoāi káu-koài ê lâng ê kè-bô͘, tì-kàu in chhiú só͘ chò ê tāichì bē sêng-kong.
5:13 I hō͘ tì-hūi ê lâng tiòng kakī ê kúi-kè; hō͘ kúi-chà ê lâng ê kè-bô͘ chin kín sit-pāi.
5:14 In ji̍t-.sî tú tio̍h o͘-àm, tiong-tàu sî sì-kè bong, chhin-chhiūⁿ àm-sî.
5:15 I kiù sànchhiah lâng thoat-lī in ê chhùi ê to-kiàm, í-ki̍p kiông-pō ê lâng ê chhiú.
5:16 Chiū ánne, nńg-chiáⁿ ê lâng ū ǹg-bāng, put-gī ê lâng ê chhùi that-ba̍t.
5:17 Lí khòaⁿ, Siōng-tè só͘ kéng-kài ê lâng ū hok-khì; só͘-í, m̄ thang khòaⁿ-khin Choân-lêng-.ê ê tok-chek.
5:18 In-ūi I hō͘ lâng thàng-thiàⁿ, chiū kā i pau ba̍t; I siong lâng, I ê chhiú mā ē kā i i hó.
5:19 I ē tī la̍k-pái ê hoān-lān tiong kiù lí; chiū kóng nā chhit pái, chai-hāi mā bē kha̍p tio̍h lí.
5:20 Tī ki-hng ê sî, I ē kiù lí thoat-lī sí-bông; tī kau-chiàn ê sî, I ē kiù lí thoat-lī to-kiàm ê sè-le̍k.
5:21 Lí ē tit tio̍h ún-ba̍t, bián siū chhùi-chi̍h ê kong-kek; chai-eh kàu ê sî, lí mā bián-kiaⁿ.
5:22 Chai-hāi kah ki-hng, lí ē kā i chhiò; tē-chiūⁿ ê iá-siù, lí mā bián-kiaⁿ.
5:23 In-ūi lí ē kah chhân-hn̂g-.ni̍h ê chio̍h-thâu kiat iok; iá-siù mā ē kah lí hô-hó.
5:24 Lí ē chai lí ê pò͘-pêⁿ ū pêng-an; lí khì khòaⁿ lí ê iûⁿ-tiâu lóng bô khiàm-khoeh.
5:25 Lí mā ē chai lí ê kiáⁿ-sun chin chē, lí ê kiáⁿ-sun chhin-chhiūⁿ tē-chiūⁿ ê chheⁿ-chháu.
5:26 Lí ē hòe-siū boán-chiok chiah kui bōng, chhin-chhiūⁿ tiū-khún kàu-sî siu-chông.
5:27 Lí khòaⁿ, che goán ū chhâ kàu thiat-té, si̍t-chāi sī ánne; lí tio̍h thiaⁿ, tio̍h chai, thang chò lí ê lī-ek.
各圣经译本着作权如版权说明。
本画面由信望爱资讯中心之CBOL计画产生,欢迎连结,无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人,来荣耀他自己的名。