历代志下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
26:1 Iô-tah Ông U-chi-iah
( LOH 14: 21-22; 15: 1-7)
Iô-tah chèng lâng siat-li̍p U-chi-iah sòa-chiap i ê lāu-pē A-má-chiah chò ông, hit sî i cha̍p la̍k hòe.
26:2 A-má-chiah ông kah i ê chó͘-sian tâng khùn liáu-āu, U-chi-iah khí Ê-no͘k siâⁿ, hō͘ i iû-goân kui Iô-tah koán-hat.
26:3 I chē-ūi ê sî cha̍p la̍k hòe, tī Ê-lú-sa-lèm chò ông kiōng gō͘-cha̍p jī nî. I ê lāu-bú ê miâ kiò-chò E-kho-li-ah, sī Ê-lú-sa-lèm lâng.
26:4 U-chi-iah kiâⁿ Siōng-chú só͘ khòaⁿ-chò hó ê tāichì, chiàu i ê lāu-pē A-má-chiah só͘ kiâⁿ ê it-chhè.
26:5 Tng thong-ta̍t Siōng-chú khé-sī ê Cha-kha-lī-a tī-.leh ê ji̍t, U-chi-iah tiāⁿ tio̍h ì-sù beh cháu-chhōe Siōng-tè; i cháu-chhōe Siōng-chú ê sî, Siōng-tè chiū hō͘ i heng-thong.
26:6 U-chi-iah chhut-khì kong-kek Hui-lī-sū lâng, thiah-húi Gat ê siâⁿ chhiûⁿ, Iap-neh ê siâⁿ chhiûⁿ kah A-si-to͘t ê siâⁿ chhiûⁿ; tī Hui-lī-sū lâng ê tiong-kan, tī A-si-to͘t kéng lāi, khí kúi-nā-ê siâⁿ.
26:7 Siōng-tè pang-chān i kong-kek Hui-lī-sū lâng kah tòa tī Gul-ba-al ê A-la-puh lâng, í-ki̍p Mi-u-nî lâng.
26:8 Am-móng lâng chìn-kòng U-chi-iah, i ê miâ-siaⁿ thoân kàu Ai-gi̍p ê kau-kài, in-ūi i hui-siông kiông-sēng.
26:9 U-chi-iah tī Ê-lú-sa-lèm ê kak mn̂g kah soaⁿ-kok mn̂g, kah siâⁿ chhiûⁿ choán-oan ê só͘-chāi khí siâⁿ-lâu, koh sī chin kian-kò͘ ê.
26:10 Koh tī khòng-iá khí chiú-keⁿ lâu, koh tī kē ê tē kah pêng-goân khui chin chē kó͘-chéⁿ, in-ūi i ū chin chē chengseⁿ; tī soaⁿ-tē kah hó ê chhân, i koh ū choh-sit lâng kah liāu-lí phû-tô hn̂g ê, in-ūi i hoaⁿ-hí chèng-choh ê tāichì.
26:11 U-chi-iah koh ū chiàn-sū chi̍t tūi, chiàu su-kì E-i-el kah siú-léng Ma-a-se-iah só͘ tiám-sǹg ê, tī ông ê chi̍t-ê kun-tiúⁿ Ha-na-niah ê chhiú-hā, hun tūi chhut-khì kau-chiàn.
26:12 Cho̍k-tiúⁿ to̍h-sī tōa lêng-le̍k ê ióng-sū, i ê chóng-gia̍h kiōng nn̄g-chheng la̍k-pah lâng.
26:13 Tī in ê chhiú-hā ū kòe-liān ê kun-tūi, kiōng saⁿ-cha̍p-bān chhit-chheng gō͘-pah lâng, lóng sī tōa lêng-le̍k koh gâu cheng-chiàn, ē-tàng pang-chān ông kong-kek tùi-te̍k ê.
26:14 U-chi-iah ūi tio̍h in, to̍h-sī i ê kun-tūi, chún-pī tîn-pâi, chhiuⁿ, thâu-khoe, chiàn-kah kah kiong, í-ki̍p thang hìⁿ ê chio̍h-thâu.
26:15 Koh tī Ê-lú-sa-lèm chò ki-khì, sī kî-khiáu ê sai-hū só͘ hoat-bêng ê, an-tì tī siâⁿ-lâu kah siâⁿ kak-thâu, thang lâi siā chìⁿ hoat-chhut tōa tè chio̍h. U-chi-iah ê miâ-siaⁿ thoân kàu hn̄g-hn̄g, in-ūi i ū tit tio̍h te̍k-pia̍t ê pang-chān, tì-sú chin kiông-sēng.
26:16 U-chi-iah In-ūi Kiau-ngō͘ Siū Têng-hoa̍t
U-chi-iah kiông-sēng liáu-āu, sim chiū kiau-ngō͘, tì-sú hú-pāi, pōe-ge̍k Siōng-chú — i ê Siōng-tè, in-ūi i ji̍p Siōng-chú ê tiān, beh tī hiuⁿ-tôaⁿ sio hiuⁿ.
26:17 Chè-si A-cha-lí-ah chhōa Siōng-chú ê ióng-kám chè-si peh-cha̍p lâng tòe i ji̍p-.khì.
26:18 In chiū chó͘-tòng U-chi-iah ông, kā i kóng, " U-chi-iah, sio hiuⁿ hō͘ Siōng-chú m̄-sī lí ê tāichì, he sī chè-si A-lông ê kiáⁿ-sun ê tāichì, in siū siat-li̍p lâi sio hiuⁿ ê. Lí tio̍h lī-khui sèng-tiān, in-ūi lí í-keng hoān chōe. Lí kiâⁿ chit-ê tāichì, Siōng-chú — Siōng-tè bô beh hō͘ lí tit tio̍h êng-kng.
26:19 U-chi-iah chiū siū-khì, chhiú the̍h hiuⁿ-lô͘ beh sio hiuⁿ. I tùi chè-si teh siū-khì ê sî, tī Siōng-chú tiān lāi hiuⁿ-tôaⁿ piⁿ hiahê chè-si ê bīn-chêng, i ê thâu-hia̍h hut-jiân khí thái-ko.
26:20 Tōa-chè-si A-cha-lí-ah kah só͘-ū ê chè-si khòaⁿ tio̍h i thâu-hia̍h khí thái-ko, chiū kā i kóaⁿ-chhut tiān; i kakī mā kóaⁿ-kín chhut-.khì, in-ūi Siōng-chú kā i phah.
26:21 U-chi-iah ông khí thái-ko kàu i sí ê ji̍t, in-ūi i thái-ko tòa tī lēng-gōa ê chhù, kah Siōng-chú ê tiān keh-lī. I ê kiáⁿ Iô-thàm koán-lí ông-ka, tī-lí jîn-bîn.
26:22 U-chi-iah kî-tha ê tāichì, tùi-thâu kàu-bóe, A-mô͘-su ê kiáⁿ I-sá-iah sian-ti lóng ū kì-lio̍k lo̍h-.lâi.
26:23 U-chi-iah kah i ê chó͘-sian tâng khùn, in-ūi kóng i sī thái-ko ê, lâng kā i bâi-chòng tī sio̍k lia̍t ông ê bōng-tē, kah i ê chó͘-sian chò-tui. I ê kiáⁿ Iô-thàm sòa-chiap i chò ông.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。