历代志下 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
10:1 Pak-pō͘ Chi-cho̍k ê Chō-hoán
( LOS 12: 1-20)
Lô-bo-àm khì Sī-khiàm, in-ūi I-su-la-el jîn-bîn lâi-kàu Sī-khiàm, beh kā i siat-li̍p chò ông.
10:2 Chêng Ne-bat ê kiáⁿ Ia-lô-ba-am siám-phiah Só͘-lô-móng ông ê bīn, cháu-khì Ai-gi̍p, tī hia tòa; Ia-lô-ba-am thiaⁿ tio̍h chit-ê tāichì, chiū tùi Ai-gi̍p tńg-.lâi.
10:3 In chhe lâng khì kiò i lâi, Ia-lô-ba-am chiū kah I-su-la-el jîn-bîn lâi kìⁿ Lô-bo-àm,
10:4 Kā i kóng, " Lí ê lāu-pē hō͘ goán pē kan-khó͘ ê ka-taⁿ, lí ê lāu-pē só͘ hē tī goán ê khó͘-kang kah tāng ê ka-taⁿ, kiû lí kā goán kiám khin, goán chiū lâi kā lí ho̍k-sāi. "
10:5 Lô-bo-àm kā in kóng, " Saⁿ ji̍t āu koh lâi kìⁿ góa! " Jîn-bîn chiū khì.
10:6 Lô-bo-àm ê lāu-pē Só͘-lô-móng oa̍h-.leh ê sî, ū kin-tòe tī i bīn-chêng ê lāu lâng, Lô-bo-àm ông kah in gī-lūn kóng, " Lín ū siáⁿ-mi̍h kè-chhek góa thang hôe-hok chiahê jîn-bîn? "
10:7 In kā i kóng, " Lí nā hó khoán-thāi chiahê jîn-bîn, hō͘ in hoaⁿ-hí, ēng hó ōe lâi kā in ìn-tap, in chiū ē éng-oán chò lí ê lô͘-po̍k. "
10:8 Chóng-.sī, i kī-choa̍t lāu lâng só͘ hō͘ i ê kè-chhek, khì kah hiahê khiā tī i bīn-chêng kah i pêⁿ-ûn ê siàu-liân lâng chham-siông,
10:9 Lô-bo-àm mn̄g i, " Chiahê jîn-bîn ū tùi góa kóng, ' Lí ê lāu-pē hē tī goán ê ka-taⁿ, kiû lí hō͘ goán khah khin. " Taⁿ lín ū siáⁿ-mi̍h kè-chhek, hō͘ góa thang kā in hôe-hok? "
10:10 Hiahê kah i pêⁿ-ûn ê siàu-liân lâng kóng, " Chiahê jîn-bîn tùi lí kóng, ' Lí ê lāu-pē hō͘ goán phāiⁿ tāng ê ka-taⁿ, kiû lí kā goán kiám khin. ' Lí tio̍h ánne ìn in kóng, ' Góa ê bóe-cháiⁿ pí góa ê lāu-pē ê io khah tōa,
10:11 góa ê lāu-pē hō͘ lín phāiⁿ tāng ê ka-taⁿ, góa beh ke-thiⁿ lín ê ka-taⁿ; góa ê lāu-pē ēng piⁿ kā lín kéng-kài, góa beh ēng giat-á-thâng kā lín kéng-kài. '"
10:12 Tē-saⁿ ji̍t, Ia-lô-ba-am kah chèng lâng lâi-kàu Lô-bo-àm hia, sī chiàu ông só͘ bēng-lēng ê " Tē-saⁿ ji̍t koh lâi góa chia! "
10:13 Ông ēng pháiⁿ siaⁿ-sàu ìn jîn-bîn, Lô-bo-àm ông pàng-sak lāu lâng ê kè-chhek,
10:14 chiàu siàu-liân lâng ê kè-chhek tùi in kóng, " Góa ê pē hō͘ lín taⁿ tāng ê ka-taⁿ, góa beh ke-thiⁿ lín ê ka-taⁿ; góa ê pē ēng piⁿ kā lín kéng-kài, góa beh ēng giat-á-thâng kā lín kéng-kài. "
10:15 Ông bô chun-thàn jîn-bîn, in-ūi chit-ê tāichì sī chhut tī Siōng-tè, hō͘ Siōng-chú èng-giām I thok Sī-lô lâng A-hi-iah tùi Ne-bat ê kiáⁿ Ia-lô-ba-am só͘ kóng ê ōe.
10:16 I-su-la-el chèng lâng khòaⁿ tio̍h ông bô chun-thàn in, jîn-bîn chiū tùi ông kóng, " Goán tī Ta-bi̍t ū siáⁿ-mi̍h hūn-gia̍h? Goán kah I-é-sái ê kiáⁿ bô koan-hē! I-su-la-el lâng, ta̍k lâng tńg-khì lín ê pò͘-pêⁿ! Ta-bi̍t, tio̍h kò͘ lí kakī ê chhù! " Chiū ánne, I-su-la-el jîn-bîn tńg-khì in ê pò͘-pêⁿ.
10:17 Chóng-.sī, tòa tī Iô-tah chiahê siâⁿ ê I-su-la-el lâng, Lô-bo-àm iû-goân chò in ê ông.
10:18 Lô-bo-àm ông chhe koán-lí chò khó͘-kang ê lâng Ha-to-lám khì, I-su-la-el lâng chiū ēng chio̍h-thâu kā i tìm-sí. Lô-bo-àm ông chiū kóaⁿ-kín chiūⁿ chhia, beh cháu-khì Ê-lú-sa-lèm.
10:19 Chiū ánne, I-su-la-el chō-hoán Ta-bi̍t ke, kàu kin-á-ji̍t.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。