历代志上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
23:1 Ta-bi̍t nî lāu, ji̍t-chí boán-chiok, chiū siat-li̍p i ê kiáⁿ Só͘-lô-móng chò I-su-la-el ông.
23:2 Lē-bī Lâng ê Chit-chek
Ta-bi̍t chū-chi̍p I-su-la-el ê chèng siú-léng kah hiahê chè-si, í-ki̍p Lē-bī lâng.
23:3 Lē-bī lâng tùi saⁿ-cha̍p hòe í-siōng ê, lóng keng-kòe tiám-sǹg, chiàu só͘ tiám-sǹg chapo͘ lâng ê gia̍h-sò͘, kiōng saⁿ-bān peh-chheng.
23:4 Kî-tiong nn̄g-bān sì-chheng lâng teh koán-lí Siōng-chú tiān ê kang, ū la̍k chheng lâng chò chit-oân kah sū-su.
23:5 Ū sì chheng lâng chò kò͘-mn̂g ê, koh ū sì chheng lâng kā Ta-bi̍t chò ēng lâi oló Siōng-chú ê ga̍k-khì.
23:6 Ta-bi̍t chiàu Lē-bī ê kiáⁿ: Kel-sióng, Ko-hat, Me-la-lih, lâi pun in ê kiáⁿ-sun ê pan-lia̍t.
23:7 Sio̍k Kel-sióng ê lâng: La-tán kah Si-mí.
23:8 La-tán ê kiáⁿ: tōa ê sī Ia-chi-el, koh ū Che-thàn kah Iô-el, kiōng saⁿ lâng.
23:9 Si-mí ê kiáⁿ: Si-ló-mi̍t, Ha-cha-el, Khal-lân, kiōng saⁿ lâng, che sī La-tán cho̍k ê cho̍k-tiúⁿ.
23:10 Si-mí ê kiáⁿ: Ia-hat, Chi-ná, E-ú-sih, Bê-lô-ia, chit sì lâng to̍h-sī Si-mí ê kiáⁿ.
23:11 Ia-hat sī tōa-kiáⁿ, tē-jī-ê sī Chi-chah. Chóng-.sī, E-ú-sih, Bê-lô-ia ê kiáⁿ-sun bô gōa chē, só͘-í, sǹg-chò chi̍t cho̍k.
23:12 Ko-hat ê kiáⁿ sī Àm-lâm, I-chu-hal, He-bú-lông, U-chi-el, kiōng sì lâng.
23:13 Àm-lâm ê kiáⁿ, A-lông, Mô͘-se. A-lông kah i ê kiáⁿ-sun sī hun-pia̍t kàu tī éng-oán, lâi hun-pia̍t chì-sèng ê mi̍h chò sèng, tī Siōng-chú ê bīn-chêng sio hiuⁿ, lâi ho̍k-sāi I, hōng I ê miâ chiok-hok, ti̍t-kàu éng-oán.
23:14 Kóng tio̍h Siōng-tè ê lô͘-po̍k Mô͘-se, i ê kiáⁿ miâ-jī kì tī Lē-bī ê chi-cho̍k lāi-té.
23:15 Mô͘-se ê kiáⁿ sī Kel-sióng kah E-lí-e-chel.
23:16 Kel-sióng ê kiáⁿ, tōa ê sī Si-pu-el.
23:17 E-lí-e-chel ê kiáⁿ Le-ha-biah sī tōa ê, E-lí-e-chel bô pa̍t-ê kiáⁿ, chóng-.sī, Le-ha-biah ê kiáⁿ chin chē.
23:18 I-chu-hal ê kiáⁿ, tōa ê sī Si-ló-mi̍t.
23:19 He-bú-lông ê kiáⁿ, tōa ê sī Ia-li-iah, tē-jī ê sī A-ma-li-ah, tē-saⁿ ê sī Ia-ha-chi-el, tē-sì ê sī Ia-ka-màm.
23:20 U-chi-el ê kiáⁿ, tōa ê sī Mi-ka, tē-jī ê sī I-si-siah.
23:21 Me-la-lih ê kiáⁿ: Mak-lī kah Mu-sih. Mak-lī ê kiáⁿ: Ê-lī-a-chal kah Ki-si.
23:22 Ê-lī-a-chal sí, bô kiáⁿ, chí ū chabó͘ kiáⁿ, in ê hiaⁿ-tī Ki-si ê kiáⁿ chhōa in.
23:23 Mu-sih ê kiáⁿ sī Mak-li, E-tel, E-le-mo͘t, kiōng saⁿ lâng.
23:24 Téng-bīn só͘ kì lóng sī Lē-bī ê kiáⁿ-sun, chiàu in lāu-pē ê ke lâi chò cho̍k-tiúⁿ, ūi Siōng-chú ê tiān lâi chò chhe-ēng ê kang, ta̍k lâng tùi jī-cha̍p hòe í-siōng siū tiám-sǹg, lóng chiàu in ê miâ ê sò͘-gia̍h lâi keng-kòe tiám-sǹg.
23:25 In-ūi Ta-bi̍t kóng, " Siōng-chú — I-su-la-el ê Siōng-tè, í-keng hō͘ I ê chú-bîn pêng-an, I koh beh éng-oán tòa tī Ê-lú-sa-lèm.
23:26 Lē-bī lâng mā m̄-bián koh kng hōe-bō͘ kah kî-tiong só͘ ēng só͘-ū ê khì-kū.
23:27 In-ūi chiàu Ta-bi̍t lîm-chiong ê sî só͘ hoan-hù ê, Lē-bī lâng tùi jī-cha̍p hòe í-siōng lóng siū tiám-sǹg.
23:28 In-ūi i ê chit sī kin-tòe A-lông ê kiáⁿ-sun lâi chò Siōng-chú tiān ê kang, to̍h-sī tī chiahê īⁿ kah chiahê pâng lâi chò-kang, mā hō͘ chiahê sèng-mi̍h chheng-khì, lâi chò Siōng-chú tiān ê kang,
23:29 Liāu-lí pâi-lia̍t ê piáⁿ, sò͘-chè ê mī-hún, á-.sī bô kàⁿ ê po̍h piáⁿ kah tiáⁿ lāi só͘ piak ê, í-ki̍p tiâu-hô ê mi̍h, koh koán-lí chhìn kah niû ê tāichì.
23:30 Ta̍k chá-khí khiā-teh lâi kám-siā oló Siōng-chú, ta̍k ê-hng mā sī ánne.
23:31 Koh tī An-hioh-ji̍t, goe̍h ê chhe-it kah cheh-kî, hiàn chiahê sio-chè hō͘ Siōng-chú, chiàu mi̍h ê sò͘-gia̍h, chiàu só͘ tiāⁿ tio̍h ê lē, tiāⁿtiāⁿ hiàn tī Siōng-chú ê bīn-chêng.
23:32 Koh hō͘ i kò͘-siú hōe-bō͘ kah sèng-só͘ ê chek-jīm, í-ki̍p i ê hiaⁿ-tī A-lông ê kiáⁿ-sun só͘ hō͘ i chò ê chek-jīm, lâi ho̍k-sāi tī Siōng-chú ê tiān.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。