16:1 In kng Siōng-tè ê iok-kūi, hē tī Ta-bi̍t kā i tah ê pò͘-pêⁿ lāi, mā hiàn sio-chè kah pêng-an-chè tī Siōng-tè ê bīn-chêng. 16:2 Ta-bi̍t hiàn sio-chè kah pêng-an-chè liáu-āu, chiū ēng Siōng-chú ê miâ kā jîn-bîn chiok-hok. 16:3 Koh pun hō͘ I-su-la-el ê kûn-chiòng, bô-lūn lâm-lí, ta̍k lâng hō͘ in chi̍t tè piáⁿ, chi̍t tè bah kah chi̍t tè phû-tô piáⁿ. 16:4 Ta-bi̍t phài kúi-nā-ê Lē-bī lâng tī Siōng-chú ê iok-kūi chêng ho̍k-sāi, lâi kì-liām-kám-siā, oló Siōng-chú — I-su-la-el ê Siōng-tè. 16:5 Chò-thâu ê sī A-sah, tē-jī-ê sī Che-ka-lí-ah, koh ū Ia-ji-el, Se-mi-la-mo͘t , Ia-chi-el, Mat-ta-thí-iah, E-lí-ap, Be-ná-iah, O-biat-e-tóm, E-i-el, tôaⁿ sek tôaⁿ khîm, chí ū A-sah phah tōa-siaⁿ ê nâ-poa̍h. 16:6 Chè-si Be-ná-iah kah Ia-ha-chi-el tiāⁿtiāⁿ tī Siōng-chú ê iok-kūi chêng pûn kó͘-chhoe. 16:7 Hit ji̍t, Ta-bi̍t khí-thâu tiāⁿ tio̍h ēng A-sah kah i ê hiaⁿ-tī lâi kám-siā Siōng-chú. 16:8
O-ló ê Koa
( SPh 105: 1-15; 96: 1-13; 106: 1, 47-48)
Lín tio̍h kám-siā Siōng-chú, kiû-kiò I ê miâ, tī bān-bîn ê tiong-kan soan-iông I ê só͘ chò. 16:9 Tio̍h ǹg I gîm-si, ǹg I chhiùⁿ koa oló, tâm-lūn I it-chhè kî-biāu ê só͘ kiâⁿ. 16:10 Tio̍h in-ūi I ê sèng-miâ lâi khoa-kháu; chhōe Siōng-chú ê lâng, sim-lāi tio̍h hoaⁿ-hí. 16:11 Tio̍h cháu-chhōe Siōng-chú kah I ê koân-lêng, tiāⁿtiāⁿ chhōe I lâi kìⁿ I ê bīn. 16:12 I ê lô͘-po̍k I-su-la-el ê kiáⁿ-sun, I só͘ kéng Iâ-kop ê kiáⁿ-sun, 16:13 Lín tio̍h siàu-liām I só͘ chò kî-biāu ê tāichì, kah I ê sîn-jiah, kah I ê chhùi phòaⁿ-toàn ê ōe. 16:14 I sī Siōng-chú — lán ê Siōng-tè, choân tē lóng ū I ê phòaⁿ-toàn. 16:15 Tio̍h kì-liām I ê iok, ti̍t-kàu éng-oán; I só͘ hoan-hù ê ōe, ti̍t-kàu bān tāi, 16:16 to̍h-sī kah A-bu-la-hàm só͘ li̍p ê iok, tùi Í-sak só͘ chiù ê chōa. 16:17 I koh kā chit-ê iok tùi Iâ-kop tiāⁿ tio̍h chò lu̍t-lē, tùi I-su-la-el tiāⁿ tio̍h chò éng-oán ê iok, 16:18 kóng: Góa ē kā Ka-nân tē siúⁿ-sù hō͘ lí, chò lín sán-gia̍p ê hūn-gia̍h. 16:19 Tong-sî, lín ê jîn-teng iú-hān, sò͘-gia̍h chió-chió, koh tī hia chò chhut-gōa lâng; 16:20 in tùi chit cho̍k kiâⁿ kàu hit cho̍k, tùi chit kok kiâⁿ kàu pa̍t-ê jîn-bîn. 16:21 I bô iông-ín siáⁿ lâng khi-hū in, ūi tio̍h in ê iân-kò͘ khián-chek kun-ông, 16:22 kóng: M̄-thang bong tio̍h góa siū boah-iû ê, mā m̄ thang pháiⁿ khoán-thāi góa ê sian-ti! 16:23 Choân tē lóng tio̍h ǹg Siōng-chú chhiùⁿ koa! Ji̍t-ji̍t thoân-pò I ê kiù-un. 16:24 Tī lia̍t pang ê tiong-kan kóng-khí I ê êng-kng, tī bān-bîn ê tiong-kan kóng-khí I kî-biāu ê só͘ chò. 16:25 In-ūi Siōng-chú chò tōa, eng-kai siū ke̍k tōa ê oló; I tī chèng sîn-bêng ê téng-bīn, eng-kai siū kèng-ùi. 16:26 In-ūi lia̍t pang ê sîn-bêng lóng sī hi-ké, to̍k-to̍k Siōng-chú chhòng-chō chiahê thiⁿ. 16:27 Tī I ê bīn-chêng ū chun-kùi kah ui-giâm, tī I ê só͘-chāi ū koân-lêng kah hoaⁿ-hí. 16:28 Jîn-bîn tiong ê ta̍k cho̍k, lín tio̍h kā koân-lêng êng-kng, kui hō͘ Siōng-chú, kui hō͘ Siōng-chú! 16:29 Kā I ê miâ só͘ eng-kai tit tio̍h ê êng-kng kui hō͘ Siōng-chú, tòa lé-mi̍h lâi-kàu I ê bīn-chêng; tio̍h ēng sèng-kiat ê táⁿ-pān kèng-pài Siōng-chú. 16:30 Choân tē tī I ê bīn-chêng phi̍h-phi̍h chhoah, sè-kài kian-kò͘ bē iô-tāng. 16:31 Goān thiⁿ hoaⁿ-hí, tē khoài-lo̍k; tī lia̍t pang tiong tio̍h kóng: Siōng-chú chò ông! 16:32 Goān hái kah kî-tiong só͘ chhiong-móa ê lóng chhut tōa-siaⁿ; goān chhân-hn̂g kah kî-tiong só͘-ū ê lóng khoài-lo̍k. 16:33 Hit sî, chhiū-nâ lāi ê chhiū-ba̍k ē tī Siōng-chú ê bīn-chêng chhut hoaⁿ-hí ê siaⁿ, in-ūi I lâi beh sím-phòaⁿ choân tē. 16:34 Lín tio̍h kám-siā Siōng-chú; in-ūi I sī hó, I ê chû-ài éng-oán tī-.leh. 16:35 Tio̍h kóng: Chín-kiù goán ê Siōng-tè, kiû Lí kiù goán, chū-chi̍p goán, kiù goán thoat-lī lia̍t pang ê lâng, thang hō͘ goán chiok-siā Lí ê sèng-miâ, lia̍h Lí ê siū oló chò tōa hoaⁿ-hí. 16:36 Tio̍h oló Siōng-chú, I-su-la-el ê Siōng-tè, tùi éng-oán kàu éng-oán. Jîn-bîn lóng kóng: A-men! Koh oló Siōng-chú. 16:37
Tī Ê-lú-sa-lèm kah Gi-bóng Kèng-pài
Ta-bi̍t lâu A-sah kah i ê hiaⁿ-tī tī Siōng-chú ê iok-kūi chêng, tiāⁿtiāⁿ ho̍k-sāi tī iok-kūi chêng, chiàu ta̍k ji̍t ê kang só͘ tio̍h chò ê. 16:38 Koh lâu O-biat-e-tóm kah in ê hiaⁿ-tī la̍k-cha̍p peh lâng, í-ki̍p E-to-tòng ê kiáⁿ O-biat-e-tóm kah Ho-sah chò kò͘-mn̂g ê; 16:39 mā lâu chè-si Cha-tok kah i ê hiaⁿ-tī só͘-ū ê chè-si, tī Gi-bóng koân ê só͘-chāi, Siōng-chú ê hōe-bō͘ chêng; 16:40 thang tī sio-chè ê tôaⁿ téng, ta̍k ji̍t chá-àm hiàn sio-chè hō͘ Siōng-chú, chiàu Siōng-chú bēng-lēng I-su-la-el lâng ê lu̍t-hoat it-chhè só͘ kì-chài ê. 16:41 kah in chò-tīn ê ū He-mán, E-to-tòng kah kî-tha siū kéng-soán kì miâ ê, thang kám-siā Siōng-chú, in-ūi I ê chû-ài éng-oán tī-.leh. 16:42 Kah in chò-tīn ê ū He-mán kah E-to-tòng, sī ēng kó͘-chhoe kah nâ-poa̍h, í-ki̍p Siōng-chú ê ga̍k-khì, lâi hô hiahê chhiùⁿ koa ê. E-to-tòng ê kiáⁿ-sun sī chò kò͘-mn̂g ê. 16:43 Chiū ánne, chèng lâng ta̍k lâng tńg-khì in ê ke; Ta-bi̍t mā tńg-.khì, kā i ê ke chiok-hok.