历代志上 线上收听:中文和合本 现代中文译本修订版 现代台语 台语圣经 客语 福州话 希伯来文读经 下载档案 关于语音圣经
15:1 Chún-pī Khì Gêng-chiap Iok-kūi
Ta-bi̍t chiū ūi kakī tī Ta-bi̍t ê siâⁿ khí kúi-nā keng chhù, koh ūi tio̍h Siōng-tè ê iok-kūi chún-pī chi̍t-ê só͘-chāi kā i tah pò͘-pêⁿ.
15:2 Hit sî, Ta-bi̍t kóng, " Tû-khì Lē-bī lâng í-gōa, bô lâng thang kng Siōng-tè ê iok-kūi, in-ūi Siōng-chú kéng in lâi kng Siōng-chú ê iok-kūi, koh ho̍k-sāi I ti̍t-kàu éng-oán. "
15:3 Ta-bi̍t chū-chi̍p I-su-la-el jîn-bîn lâi-kàu Ê-lú-sa-lèm, ài kā Siōng-chú ê iok-kūi kng kàu i só͘ kā I chún-pī ê só͘-chāi.
15:4 Ta-bi̍t koh chū-chi̍p A-lông ê kiáⁿ-sun kah Lē-bī lâng.
15:5 Ko-hat ê kiáⁿ-sun tiong-kan ū thâu-lâng U-li-el, kah i ê hiaⁿ-tī chi̍t-pah jī-cha̍p lâng.
15:6 Me-la-lih ê kiáⁿ-sun tiong-kan ū thâu-lâng A-sa-iah, kah i ê hiaⁿ-tī nn̄g-pah jī-cha̍p lâng.
15:7 Kel-sióng ê kiáⁿ-sun tiong-kan ū thâu-lâng Iô-el, kah i ê hiaⁿ-tī chi̍t-pah saⁿ-cha̍p lâng.
15:8 E-li-cha-hoán ê kiáⁿ-sun tiong-kan ū thâu-lâng Si-má-iah, kah i ê hiaⁿ-tī nn̄g pah lâng.
15:9 He-bú-lông kiáⁿ-sun tiong-kan ū thâu-lâng E-li-el, kah i ê hiaⁿ-tī peh-cha̍p lâng.
15:10 U-chi-el ê kiáⁿ-sun tiong-kan ū thâu-lâng A-mí-ná-tap, kah i ê hiaⁿ-tī chi̍t-pah cha̍p-jī lâng.
15:11 Ta-bi̍t tiàu Cha-tok chè-si kah A-bi-a-thal, í-ki̍p Lē-bī lâng U-li-el, A-sa-iah, Iô-el, Si-má-iah, E-li-el kah A-mí-ná-tap chiahê lâng lâi.
15:12 Tùi in kóng, " Lín sī Lē-bī lâng ê cho̍k-tiúⁿ, lín kah lín ê hiaⁿ-tī tio̍h kakī chheng-khì, chiah thang kā Siōng-chú — I-su-la-el Siōng-tè ê iok-kūi, kng kàu góa só͘ kā I chún-pī ê só͘-chāi.
15:13 In-ūi lín chá-chêng bô ánne chò, lán ê Siōng-tè — Siōng-chú í-keng kā lán chek-hoa̍t, in-ūi lán bô chiàu tiāⁿ tio̍h ê lē cháu-chhōe I. "
15:14 Chiū ánne, chè-si kah Lē-bī lâng chheng-khì kakī, beh kā I-su-la-el ê Siōng-tè — Siōng-chú ê iok-kūi kng-.lâi.
15:15 Lē-bī ê kiáⁿ-sun chiū ēng kǹg kng Siōng-tè ê iok-kūi tī keng-kah-thâu, chiàu Mô͘-se chun-thàn Siōng-chú ê ōe só͘ bēng-lēng ê.
15:16 Ta-bi̍t kah Lē-bī ê cho̍k-tiúⁿ, hun-phài in chhiùⁿ koa ê hiaⁿ-tī chàu ga̍k, ēng sek kah khîm, kah nâ-poa̍h, hoaⁿ-hí chhut siaⁿ lâi chhiùⁿ.
15:17 Chiū ánne, Lē-bī lâng hun-phài Iô-el ê kiáⁿ He-mán kah i hiaⁿ-tī tiong Be-lé-kiah ê kiáⁿ A-sah, kah in kâng cho̍k ê hiaⁿ-tī Me-la-lih ê kiáⁿ-sun tiong-kan ê Ku-sia-iah ê kiáⁿ E-thán.
15:18 Koh ū tē-jī pan ê hiaⁿ-tī Che-ka-lí-ah, Ia-ji-el, Se-mi-la-mo͘t , Ia-chi-el, Un-nî, E-lí-ap, Be-ná-iah, Ma-a-se-iah, Mat-ta-thí-iah, E-li-phe-le-hō, Mik-ne-iah, í-ki̍p kò͘-mn̂g ê O-biat-e-tóm kah E-i-el.
15:19 Án-ne, phài chhiùⁿ koa ê He-mán, A-sah, E-thán, phah nâ-poa̍h chhut tōa-siaⁿ.
15:20 Phài Che-ka-lí-ah, Ia-ji-el, Se-mi-la-mo͘t , Ia-chi-el, Un-nî, E-lí-ap, Ma-a-se-iah kah Be-ná-iah tôaⁿ sek, i ê siaⁿ-im chheng-liāng.
15:21 Koh phài Mat-ta-thí-iah, E-li-phe-le-hō, Mik-ne-iah, O-biat-e-tóm, E-i-el kah A-cha-chiah chò thâu tôaⁿ khîm, tiāu ēng tē-peh tiāu.
15:22 Lē-bī lâng ê thâu-lâng Ke-na-niah sī koán-lí chhiùⁿ koa ê, koh kà lâng chhiùⁿ koa, in-ūi i cheng-thong chit-ê.
15:23 Be-lé-kiah kah El-ká-nah sī iok-kūi chêng kò͘-mn̂g ê.
15:24 Chè-si Si-ba-niah, Iô-sa-hoat, Nâ-than-nâ-el, A-má-sái, Che-ka-lí-ah, Be-no-a, I-lī-í-siā, tī Siōng-chú ê iok-kūi chêng pûn kó͘-chhoe. O-biat-e-tóm kah Iâ-hi-a mā sī iok-kūi chêng kò͘-mn̂g ê.
15:25 Gêng-chiap Iok-kūi Lâi-kàu Ê-lú-sa-lèm
( SMH 6: 12-22)
Chiū ánne, Ta-bi̍t kah I-su-la-el ê tiúⁿ-ló í-ki̍p iâⁿ-tiúⁿ, lóng khì O-biat-e-tóm ê ke, hoaⁿ-hí kng Siōng-chú ê iok-kūi tùi hia khí-.lâi.
15:26 Siōng-tè pang-chān kng Siōng-chú iok-kūi ê Lē-bī lâng, in chiū hiàn kang ê gû chhit chiah kah kang ê iûⁿ chhit chiah.
15:27 Ta-bi̍t chhēng iù-tē pò͘ ê tn̂g-saⁿ, kng iok-kūi ê Lē-bī lâng kah chhiùⁿ koa ê, í-ki̍p koán-lí chhiùⁿ koa ê Ke-na-niah, liân chhiùⁿ koa ê lâng lóng sī ánne; Ta-bi̍t koh chhēng iù-tē pò͘ ê chè-si ho̍k.
15:28 Án-ne, I-su-la-el jîn-bîn chhut tōa-siaⁿ, pûn sàu-kak, pûn kó͘-chhoe, phah nâ-poa̍h, tôaⁿ khîm kah sek, kng Siōng-chú ê iok-kūi kòe-.lâi.
15:29 Siōng-chú ê iok-kūi lâi-kàu Ta-bi̍t siâⁿ ê sî, Sàu-lô ê chabó͘ kiáⁿ Mi-kal tùi thang-á lāi teh khòaⁿ, khòaⁿ tio̍h Ta-bi̍t ông tiô-thiàu teh thiàu-bú, sim-lāi chiū kā i khòaⁿ-khin.
各圣经译本着作权如版权说明。
本画面由信望爱资讯中心之CBOL计画产生，欢迎连结，无须申请。CBOL计画之资料版权宣告采用GNU Free Documentation License。愿上帝的话能建造每一位使用这系统的人，来荣耀他自己的名。