罗马书 16章1节 到 16章16节   背景资料  上一笔  下一笔
使徒保罗ê书信有另外一个特色,就是tī最后lóng用请安语作结束。像哥林多前书第十六章19到20节;腓立比书第四章21到22节;歌罗西书第四章15节;提摩太后书第四章19、21节;提多书第三章15节;腓利门书第23到24节等等。M̄-koh tī所有书信中,罗马书ê请安句ē-sái讲是siōng长ê。

罗马书可能tī第十五章33节就结束loh,因为án-ne,这第十六章有可能是因为编辑上ê需要chiah加上ê。会有chit种看法,是因为chit章同时提出beh向真chē人请安ê话。Á chiah-ê人是分散tī伊旅行传道ê各地,罗马教会ê人并无一定lóng认bat in,何况使徒保罗家己mā m̄-bat去过罗马教会。因为án-ne认为,罗马书chit本书信是托菲比带去ê,使徒保罗只要tī phoe中绍介菲比hō͘罗马教会ê信徒就ē-tàng à。

M̄-koh mā有kóa学者认为,chit章可能是寄hō͘另外一间教会ê信,后来teh编撰罗马书ê时,mā顺续kā它编辑tī-chia,做书信ê结语,以符合使徒保罗写phoe ê习惯。因为án-ne,有人认为chit章可能是写hō͘以弗所教会ê信。不过,chit种讲法mā欠缺够额ê佐证。

Chit章是使徒保罗绍介伊ê同工siōng chē ê一章,总共看tio̍h廿七个名。Thang án-ne了解:新约圣经中有记录出名ê chiah-ê人,可能tī早期教会中lóng真活跃,á是tī早期教会历史中扮演重要ê角色。虽然有kóa人只有提起名,并无留落来任何事迹thang供参考,hō͘人了解in所做ê事工。M̄-koh,in ê名会hō͘记录落来,可见in tī早期信仰团契中必定常常hông提起。Koh讲,就是tī chit份廿七个名单中,女性就占了六个,包括有菲比、亚居拉、马利亚、土非拿、土富撒、彼息等。可见女性tī早期教会福音事工上有美好ê见证。

Chit段经文是使徒保罗记念tio̍h tī伊传道工作中,kah伊同工过ê兄姊,伊m̄-nā一一提起in ê名,并简略讲chiah-ê同工tī福音事工上ê努力kah用心,肯定in。Mā用chit种方式绍介in,来方便伊日chiah-ê同工有机会去拜访其他教会ê时,大家thang因为án-ne认bat来好款待chiah-ê同工。

Koh讲,tī chit段经文中,总共出现二十七个名,其中有六个女性,可见tī早期教会中,妇女tī福音事工上贡献非常大,是bē-tàng忽略ê一股力量。Ná亲像腓利ê四个cha-bó͘-kiáⁿ,无结婚,in lóng是「传讲起帝信息」ê难得人才(参考使徒行传廿一:8—9)。使徒保罗开拓腓立比kah其它教会,就是得tio̍h卖紫色布匹ê吕底亚极大ê支持(参考使徒行传十六:14—15,腓立比书四:14—16)。

第1到2节,chit两节绍介「菲比」,伊是一位女「执事」,可见当时外邦人ê教会已经有女性参与教会管理ê事工。使徒保罗就是托伊kā chit封信带去hō͘罗马教会,因为án-ne,chiah会teh绍介上真chē所在写了,并请求该教会好款待菲比,可见伊Tī使徒保罗心中是真被肯定ê同工之一。Chia讲菲比是「坚革哩教会ê执事」,这是哥林多地区ê一个港口教会,菲比就是受使徒保罗之托,牧养该教会。

第3到5节a句,「百基拉kah亚居拉」是一对热心福音事工ê夫妻。In kah使徒保罗仝款,lóng是用织帐棚维持生活(参考使徒行传十八:1—3),而且使徒保罗tī哥林多地区福音事工ê siōng好伙伴。后来in搬家到以弗所去,就以家己ê厝作为聚会ê所在(参考哥林多前书十六:19)。使徒行传第十八章24到26节ê记载,in夫妇两人bat帮助过一位真热心传扬耶稣信息ê同工亚波罗,「koh khah准确地kā上帝ê道路向伊解释」,hō͘亚波罗后来tī教会事工上有真突出ê表现(参考哥林多前书一:12、三:6)。使徒保罗tī第4节并无说明是甚么原因,百基拉kah亚居拉chit对夫妇一定tio̍h「冒性命ê危险」保护伊ê安全。M̄-koh真有可能是kah使徒行传第十九章21到41节所记载ê以弗所城之暴动事件有关。Mā tùi chia thang看见in tī信仰上ê热心kah坚定。

第5节b句到7节,「以拜尼土,伊是亚细亚省第一个归信基督ê人」。「以拜尼土」chit种人到底是甚么人?chit-má已经chhōe bē-tio̍h资料。「亚细亚省」,这是包括了今á日ê土耳其、伊朗、伊拉克、阿拉伯、叙利亚、约旦、以及以色列等地区。第6节提起「辛苦工作ê马利亚」,chit位妇女是甚么人?无法度知影。M̄-koh thang知影她是积极投入参与福音事工ê姊妹。第7节讲和使徒保罗「同齐坐牢ê犹太同胞安多尼古kah犹尼亚」,in是比使徒保罗iáu早归属耶稣ê信徒。为甚么in会跟tòe使徒保罗「同齐坐牢」?无koh khah详细ê资料。M̄-koh thang明明确知影「安多尼古」是希腊人ê名。有人讲伊kah 犹尼亚是一对夫妇,m̄-koh是m̄是án-ne?mā无清楚。值得注意ê是,使徒保罗特别强调讲,in两位tī「使徒中有淡薄á有名望」,chit句话表示in两人确实在早期教会非常认真,而且tī福音ê事工上有淡薄á受重视。

第8到11节,chia提起「暗伯利、耳巴努、士大古、亚比利」等chit四个人ê名,chiah-ê lóng是当时奴隶普遍ê名。如果in chiâⁿ实是奴隶,则对早期教会来讲,就有真重大ê意义,这表示信徒中间mā有奴隶à。使徒保罗用「主内亲爱ê朋友」、「事奉基督ê同工」、「经历过考验、对基督头尾忠心」等等称呼in,可见chiah-ê人虽然bat是奴隶,m̄-koh tī归信基督耶稣了后,确实lóng有真好ê见证。「亚利多布一家人」,其原本ê意思是「请安亚利多布厝里ê人」,chit种话,就无包括「亚利多布」在内。这有两个意思,一是伊已经往生;二是伊并未信主。有kóa圣经学者认为,「亚利多布」chit-ê人是大希律王ê孙á,是希律亚基帕一世ê兄弟。因为án-ne,chia讲beh请安「亚利多布一家人」,有可能是teh指亚利多布厝里ê奴仆á是奴隶。Án-ne mā真有意思,伊无信主,m̄-koh却允准伊ê奴隶去听信福音ê信息,成做基督信徒。若是伊已经往生,m̄-koh,接受伊财产ê人,mā允准伊留落来ê chiah-ê奴仆(奴隶)写phoe去耶稣。「希罗天」,有可能mā是kah亚利多布仝款,同属希律家族ê奴隶之一,á是已经被tháu放成自由人。Á「拿其数一间信主ê兄弟们」,意思真清楚,就是teh指in-tau里ê奴仆。有人认为chit位「拿其数」,可能就是提庇留革老丢王ê家仆。Án-ne看起来,tī使徒保罗等人ê努力下,基督教ê福音已经进入到权贵阶层ê厝内à。

第12节,「土非拿」kah「土富撒」可能是双生á姊妹。「彼息」chit-ê名意思是「波斯妇女」。使徒保罗讲伊为传福音ê事工,真「勤劳工作」。原本chit句「为主勤劳工作」是形容chit三个妇人,可惜《现代中文译本》只有kā chit「为主勤劳工作」ê形容话句用tī「彼息」,无用tī「土非拿」kah「土富撒」身上。《中文和合本》译文比较清楚:「koh问为主劳苦ê土非拿氏kah土富撒氏安。」

第13节,chit节真重要,因为chia绍介ê chit位「鲁孚」,就是替耶稣背负十字架ê古利奈西门ê kiáⁿ(参考马可福音十五:21)。「鲁孚」chit-ê名ê意思,是teh指「红色」、「红发」ê意思。使徒保罗讲伊「是主内一位杰出ê工人」,chit句话真值得推敲,有可能就是鲁孚ê老父古利奈ê西门先受感动了后,带全家信主。然后全家lóng tī早期教会中相当活跃。另外有一种讲法,是当古利奈ê西门被罗马士兵强迫替耶稣背十字架ê时,tú好鲁孚mā tī老父ê身边,看tio̍h这情景就已经深受感动à。使徒保罗特别强调讲鲁孚ê老母,对伊真照顾,kā伊当做「像家己ê kiáⁿ仝款」看待。伊chit段话有深刻ê感恩心情。

第14到15节,chit节连续提起五个名,包括有「亚逊其土、弗勒干、乌米、八罗巴、乌马」等人。Chiah-ê lóng是奴隶ê名,á是in原本是奴隶,chit-má已经是自由身。Án-ne看起来,早期教会成员中,有bē少信徒lóng是来自奴隶ê背景,in tī当时ê社会地位并无高。M̄-koh in却kah hiah-ê有社会地位ê信徒同属一间教会,chit种现象,过去án-ne,chit-má mā是。因为tī教会中,并无mā不应该有社会地位之别。Mā tùi chia ē-tàng看出早期教会kah近代教会ê经验仝款,siōng快归信耶稣基督ê人,大部分是社会中ê低阶人民,出tī贵族ê家庭真少。

第16节,「用圣洁ê chim嘴互相请安」,这是早期教会聚会ê方式之一,表示大家lóng互相想念,彼此关系相当亲密。Chit种话句mā常出现tī使徒保罗ê书信中(参考哥林多前书十六:20、哥林多后书十三:12,帖撒罗尼迦前书五:26)。


重新查询 专卷研经 罗马书系列
错误回报,请联系