罗马书 1章1节 到 1章17节   背景资料  下一笔
Tùi第一章到第四章,使徒保罗kā重点khǹg tī hō͘人kah上帝和好ê恩典,就是tī耶稣ê身上,á这是lóng无代价ê恩典。圣经一讲tio̍h恩典,意思是m̄是用任何条件á是代价ē-tàng来换得tio̍h ê。因为这是上帝赏赐ê,而且白白赏赐hō͘人。Koh khah特别ê所在是:使徒保罗强调上帝ê恩典是普世性ê,m̄是只针对犹太人,全世界ê人lóng是上帝拯救ê对象。因为上帝不偏待人。

Chit段经文ē-sái讲是chit本罗马书ê导言。Tī chit段经文中thang分做四个部分,一是收phoe人(第1到6节);二是致请安语(第7节);三是祈祷kah颂赞上帝(第8到15节);四是chit本书信ê中心主题:福音-就是上帝拯救ê大能(第16到17节)。

第1节,使徒保罗欢喜自称是耶稣ê「奴仆」,而且「使徒」,伊写书信ê踏话头,差不多lóng用chit种方式自我绍介,mā因为án-ne ê时常hō͘当时一kóa人质疑,因为伊ê条件并无符合初代教会选「使徒」ê要件(参考使徒行传一:21—22),ē-sái讲是伊讲家己作「使徒」,「m̄是因为人ê选召,mā m̄是受人ê委派,却是耶稣基督kah Hit位hō͘他tùi死里koh活ê父上帝指派ê。」(加拉太书一:1)

Chia所讲ê「奴仆」,chit-ê词ê意思是teh指奴仆ê意思。使徒保罗kā家己看做是耶稣ê奴仆,伊甘愿成做福音ê奴仆。耶稣就是伊ê主人,是伊性命ê主。Á这福音,tùi先知时代就开始了,就是为tio̍h讲耶稣就是上帝ê Kiáⁿ,á使徒保罗受tio̍h呼召,就是beh传扬这拯救ê信息。Mā因为án-ne,伊讲家己若是无传福音就有祸了(参考哥林多前书九:16),伊用án-ne teh表达一个重要信念:传福音是伊成做奴仆ê使命,责无旁贷。

第2到4节,使徒保罗先tī chia说明福音ê中心就是tī耶稣ê身上,á耶稣thang tùi两方面来看,一是tùi人ê身世来看,伊是属tī大卫ê kiáⁿ孙,chit点mā是马太福音作者ê写法(参考马太福音一:1),á路加福音作者teh绍介耶稣ê家谱ê时,用「tī人ê眼中,伊是约瑟ê kiáⁿ」(参考路加福音三:23)。二是tùi「圣洁ê神性」来看耶稣ê时,耶稣是上帝ê Kiáⁿ。

第5到6节,chit两节使徒保罗表明家己传福音ê立场kah异象,就是beh kā耶稣绍介hō͘各国ê人听,hō͘所有ê人知影耶稣就是上帝救恩ê记号。使徒保罗bat teh写hō͘加拉太教会书信中表明,这是耶路撒冷使徒会议后ê结论(参考加拉太书二:9)。Mā因为使徒保罗致力tī外国地区ê福音事工,chiah hō͘福音会得thang广传开来,hō͘ koh khah chē ê人ē-tàng认bat耶稣,并tùi án-ne信耶稣。伊特别强调chiah-ê外国人当然是包括了tī罗马教会ê信徒。

第7节,这是一节请安句,mā祝福罗马教会ê信徒得tio̍h上帝赏赐ê平安。

第8到9节,罗马教会m̄知是甚么人开设ê,使徒保罗o-ló该教会信徒有真好ê信仰见证。该教会ê信徒必定经过主后65年罗马皇帝尼禄烧hit-ê城á嫁祸hō͘基督徒ê惨痛经历,m̄-koh,ná事件显然无击倒in,因为án-ne,使徒保罗tī chia o-ló in,讲in ê信心已经传遍到所有信tùi耶稣救恩ê人中间。使徒保罗mā表示伊常tī祈祷中记念该教会,而且无论gōa chē传福音lóng会记念tio̍h该教会,hō͘ koh khah chē ê信徒分享该教会美好见证。

第10到12节,是甚么原因促成使徒保罗有kúi-nā-pái计画去访问in,咱m̄知,有可能是因为罗马是当时西方世界ê中心,mā是影响力siōng大ê所在,有可能伊想如果ē-tàng改变罗马,án-ne就koh khah容易kā福音传到世界各地。Á chit种理想beh tī主后第四世纪,mā就是君士坦丁大帝统一罗马帝国了后终其尾实现。M̄-koh Tī使徒保罗ê时代却m̄是án-ne,he是一个迫害基督徒ê时代。因为án-ne,使徒保罗真想beh去罗马教会kah大家分享福音ê信息,希望藉tio̍h彼此分享福音ê信息,hō͘大家tī信心上koh khah坚强。

第13到14节,chia真清楚讲出使徒保罗一直希望ē-tàng去访问罗马教会,m̄-koh头尾无成功。伊无讲出是甚么原因阻碍了chit-ê心愿。M̄-koh伊表示想beh去罗马访问,是希望ē-tàng hō͘ koh khah chē人信耶稣。伊认为无论是对甚么款ê人,伊lóng有传福音hō͘ in ê责任,伊讲chit种未完成ê责任,ná亲像一种负债仝款,是欠福音ê「债」,这mā充分显示出使徒保罗对福音事工ê使命感。

Chia所谓「开化ê,无开化ê」,是用当时西方世界ê了解:接受希腊文化教育思想ê,就是「开化ê」,反之则「无开化ê」。Á当时西方ê世界siōng通俗ê语文就是希腊文。

第16到17节,chit两节ē-sái讲是罗马书siōng中心ê经文。为甚么使徒保罗会讲伊无用福音为耻?这必定是当时有人以福音为耻。所谓「福音」,意思是teh指好消息,是关系上帝拯救ê好消息。

Chit句话mā有另外一个意思,teh说明使徒保罗认为伊是用福音为光荣。Á甚么款ê人会以福音做见笑?咱thang理解,就是hiah-ê一直teh迫害基督徒ê人,包括犹太当局,mā包括罗马政府。使徒保罗chit句「我无用福音为耻」,其实mā是伊ê信仰告白。因为tī当时ê世界,kā十字架看做siōng大ê耻辱,he是罗马政府专门teh对付看做siōng恶质ê犯人。Á使徒保罗却讲伊「除了耶稣基督kah伊死tī十字架顶ê事以外,甚么lóng m̄提」(参考哥林多前书二:2)。伊会án-ne有chit种信仰告白,是因为有耶稣死tī十字架顶ê功劳,chiah hō͘人会得thang kah上帝有和好ê机会。M̄是因为人有甚么值得上帝垂怜ê,却是因为耶稣为人ê罪献上家己ê性命ê缘故。
Koh讲,福音是beh拯救所有信耶稣是救主ê人,因为耶稣降生tī犹太人中间,因为án-ne,就tùi犹太人开始,然后传到外邦人中间去。相对ê,上帝ê审判mā是先tùi犹太人开始,然后chiah到外邦人(参考罗马书二:9)。

重新查询 专卷研经 罗马书系列
错误回报,请联系