诗篇 44章1节 到 44章26节   背景资料  上一笔  下一笔
这mā是一首向上帝呼求救助ê诗歌,特别是当相战失败ê时,就会吟唱ê一首诗歌。诗人teh询问一个问题:为甚么上帝「掩面不理咱」?如果过去ê历史有辉煌ê成就是因为上帝ê带领kah赐福,chit-má ê苦难究竟是为甚么?he就是因为上帝ê惩罚所带来ê结果。

有一种看法,认为chit首诗歌是tùi主前701年就开始吟唱ê诗歌,原因是chit年tú好是亚述皇帝西拿基立率领大军包围耶路撒冷城,差不多beh攻打落来了,大家lóng非常惊惶。Hit时,希西家王率领全国人民向上帝祈求救助,果然得tio̍h上帝出手打击亚述。Mā有人认为是tī主前587到586年,hit时巴比伦帝国尼布甲尼撒大军包围耶路撒冷,城内koh因为无粮食而陷入恐慌中。后来城破、被焚,圣殿被拆毁,人民hông掠去做奴隶,chit时chūn吟唱出来ê诗歌。

第1到8节,chit段诗歌是teh讲述过去上帝怎样tī in祖先面向前行奇妙ê神迹异能。

第1到3节,圣经中若是提起上帝行大事异能,通常是用来描述上帝带领以色列人民离开埃及奴隶之地,然后经过红海,并且tī旷野漂流期间tùi天顶降落吗哪养饲in,并且最后带领in进入迦南hit-ê流奶kah蜜之地。

第4到7节,诗人一再宣告,ē-tàng享受chit种恩典,并m̄是因为in祖先有甚么能力,纯粹lóng是上帝ê气力,chiah hō͘ in有能力击败敌人ê攻击。

第8节,诗人koh一pái表示伊beh永远感谢上帝。即使chit-má是陷入困境ê时chūn,每pái想起祖先ê历史中,充满tio̍h上帝厚厚ê恩典,就ài beh特别献上感谢。

第9到16节,tùi第9节开始,相对tī出埃及、过红海、进入旷野到迦南地ê伟大神迹,是失败续接teh来,被列国讥笑ê境遇,甚至被凌辱。M̄-koh虽然tī chiah-ni̍h苦难ê日子中,诗人ê诗歌iáu是teh祈求上帝ê帮助,并无bē记得上帝,á是弃sak上帝。

值得注意ê是,Tī chit段诗歌中,诗人讲上帝无koh kah in同齐去相战。Mā因为án-ne,in tú-tio̍h凄惨ê状况,像羊被屠杀,甚至被敌人放逐到外国去做奴隶(第11到12节)。

第13到16节,这四节lóng teh叙述in被敌人侮辱ê情景,thang看出诗人是tī奴隶之地受苦而发出ê哀歌。伊teh向上帝讲述,敌人侮辱in ê镜头从来m̄-bat有间断过。

第17到22节,chit段诗歌是诗人teh向上帝告白,就算环境hit种恶质,伊iáu-koh对上帝忠实。

第17到18节,诗人真清楚表示伊对上帝绝对忠实,无bē记得上帝,mā不bat有背叛上帝ê行为。Ē-sái讲是诗人就是bē了解:为甚么上帝会hō͘ in tú-tio̍h chit种苦难。Chit种疑问mā tī咱性命旅程中一再出现。

第20到21节,诗人真清楚表示,若是伊有任何悖逆上帝ê行为,上帝一定清楚知影。伊用chit种方式koh一pái表示伊对上帝ê忠心。

第19节、第22节、第25节等等,chit三节诗歌有仝款ê意思,诗人teh表示所tú-tio̍h ê困境,ná亲像待宰ê羊羔一般,死亡就在身边。

第23到24节、第26节,chit三节诗歌lóng是teh向上帝呼求救助。若是无上帝ê拯救,in teh beh面临死亡ê来临。


重新查询 专卷研经 诗篇系列
错误回报,请联系