Chit首诗篇siōng常常hông用tī主日礼拜ê时ê「宣召」，因为这是一首呼召民众来敬拜上帝ê诗歌，用tī「宣召」ê时非常适当。Chit首诗篇ê内容kah第九十五篇真接近，亲像第九十五篇2节kah第一○○篇4节；第九十五篇7节kah第一○○篇3节等等。

第1到3节，这是呼召万民同齐来歌颂上帝。第2节ê「到伊面前」，意思是teh指带礼物（献祭用ê）到敬拜ê圣殿去。

第3节thang看出以色列人民siōng特别ê所在是kā kui个民族kah上帝之间ê关系，譬喻成羊群kah顾羊人之间ê亲密关系（参考诗篇廿三：1、八十：1）。Chit点mā是tī所有ê民族中siōng特别ê。

第4节，chia讲beh用「感谢」、「颂赞」进入敬拜上帝ê圣殿，这真清楚说明献祭ê时ê礼仪，就是一面献上祭品，一面tio̍h歌颂上帝赏赐ê恩典。

第5节，koh一pái强调上帝ê「慈爱」kah「信实」，lóng是永远存在ê。前者表示上帝永远无变ê疼，后者说明上帝坚守他kah子民之间所立ê约，永远bē改变。因为他kah子民所立ê是永远之约。因为án-ne，上帝一定会坚持到永远。