马可福音 11章1节 到 11章11节   背景资料  上一笔  下一笔
马可福音tùi第十一章开始到第十五章,是记载耶稣最后一礼拜tī耶路撒冷ê事迹,所谓「受难周」就是tùi第十一章开始算起。

前段讲耶稣kah跟tòe ê门徒、群众离开了耶利哥,chit-má in开始「行入耶路撒冷」,来到「橄榄山ê伯法其kah伯大尼」。Chia距离耶路撒冷大约只有三公里ê路程而已。

第2到3节,耶稣先派两位门徒去准备。吩咐in到头前庄头去牵一匹「无人骑过ê驴á-kiáⁿ」来,并且交带讲若有人问,就讲「主要用它」án-ne就ē-tàng。Chit句「主要用它」其实就是耶稣事先向人借用驴á ê暗语。用「无人骑过」chit句话,表示hō͘耶稣使用ê,lóng是siōng好ê,象徵tio̍h圣洁ê意思(参考民数记十九:2,撒母耳记上六:7)。

第4到6节,耶稣因为事先有联系好,原因是tī犹太、耶路撒冷等地lóng有耶稣认bat ê人(参考马可福音三:7—8)。因为án-ne,门徒去到hit-ê庄头,所tú-tio̍h ê情景lóng kah耶稣对in交带ê事完全相符。就án-ne,in顺利地kā驴á-kiáⁿ牵来hō͘耶稣骑tio̍h入城(第7节)。

第8节,chia讲有人the̍h衫裤「铺tī路上」,这kah迎接君王来临ê风俗á是传统有关(参考列王纪下九:13)。而且「有kóa人the̍h田野里锉来ê树枝铺tī路上」,约翰福音第十二章13节讲是「棕树枝」,这就是今á日基督教会ê「棕树节」由来,mā是受难周ê第一工。

第9到10节,是民众歌唱欢呼ê颂赞声音,chiah-ê歌颂ê诗歌是引用诗篇第一一八篇25到26节。Án-ne看起来,群众kah-ná认bat耶稣就是拯救者ê款。这kah后来in tī彼拉多审问耶稣ê时所呼喊ê完全无仝。

第11节,chit节讲耶稣进入耶路撒冷城后,马上到圣殿去「各所在察看一下」,chit句话为第15到17节洁净圣殿ê事件预留了伏笔。耶稣kah门徒并无tòa tī城内,却是离开到伯大尼去。

重新查询 专卷研经 马可福音系列
错误回报,请联系