利未记 27章14节 到 27章29节   背景资料  上一笔  下一笔
Chit段经文讲tio̍h关系下愿不动产ê时,该án怎还愿ê问题。

第14到15节,这是关系厝,需要由祭司去审察厝ê好bái来决定。估价了后,就确定。若是beh赎回,就需要照估价出来ê价码koh加上五分之一。

第16到21节,chit段是关系继承祖先留落来ê土地tio̍h献hō͘上帝。祭司审核该土地ê价钱方式,就是用thang掖种jōa-chē量来估价。Chia讲以「thang掖二十公斤大麦种ê土地值十块银á」为基础单位。若是tī禧年后马上就献出来,chit种价码siōng koân,若是tī禧年了后,而且经过一段时间chiah献出来,土地ê价钱相对ê会照年份降低。M̄-koh下愿ê人,若是需要赎tńg去,就一定tio̍h加上原价ê五分之一chiah thang赎回。若是无赎回土地,就卖hō͘别人,就永远无赎回ê机会。即使是到à禧年mā仝款,完全无机会。

第22到25节,chia讲ê m̄是继承之土地,却是购买得来ê土地献hō͘上帝,祭司tio̍h先估算tùi奉献之年到禧年ê时间是几年,chit种人一定tio̍h hit工就付出价钱。Tī禧年ê时,土地就还hō͘伊á是伊ê后代。

顶面所讲所有ê价钱,lóng是照圣所ê规定á定。

第26到27节,chia讲tio̍h头胎ê动物,原本就是归属上帝ê。M̄-koh若是因为有残缺就无法度当做洁净ê牲畜奉献,á一定tio̍h用祭司核定ê价码加上五分之一赎回。M̄-koh若是不赎回,thang kā它卖掉,kā卖掉ê钱作奉献。

第28到29节,chit段经文是讲tio̍h「无条件奉献」,无论是人,á是物件,lóng无法度用任何代价赎回。Chit种所谓「无条件」,mā表示「切割」、「舍去」ê意思。这通常用tī战争ê时,亲像kā战利品全lóng奉献hō͘上帝,表示所有得tio̍h ê动物、人等,lóng tio̍h tī祭坛前刣死。Chit种情形tī早期宗教信仰中非常chē。后来mā发展到用tī一般生活上,表示he是已经分别为圣ê对象,lóng m̄准koh再使用。牲畜就一定tio̍h完全烧化掉。人ê部分,原本thang用银á代替,chit部分则bē-tàng。

重新查询 专卷研经 利未记系列
错误回报,请联系