犹大书 1章1节 到 1章25节   背景资料
Tùi使徒保罗ê书信开始到犹大书,lóng会看tio̍h早期教会所发生ê严重问题,就是有所讲ê「假先知」、「假教师」进入教会传播假ê信息,影响tio̍h真chē信徒弃sak了真理,跟tòe这假使者去à。犹大书mā是为chit-ê问题而写ê一封书信,特别ê是chit封书信一开始无jōa久,就谈及有关chiah-ê假教师「曲解」了上帝「恩典ê信息来掩盖(khàm)家己腐败ê行为」。Ná亲像使徒保罗写hō͘加拉太教会ê书信有真类似ê所在,伊Tī该封书信中,用真严厉ê词句责骂hit-ê教会偏离了真理之道(参考加拉太书一:6—9)。原因是有人进入加拉太教会去传「另外一种福音」,使徒保罗讲he是kah in过去传hō͘ hit-ê教会ê福音无仝。使徒保罗认为福音就是「耶稣基督kah伊死tī十字架上ê事」(参考哥林多前书二:2),chit点就是福音ê中心,mā是siōng重要而且无法度改变ê信息。

第1节,chit节开始作者就讲家己是「雅各ê兄弟」。

犹大,chit-ê名tī犹太人中真普遍,因为án-ne,当做者讲伊是「雅各ê兄弟」ê时,而这「雅各」真可能就是耶稣基督ê兄弟雅各(参考马可福音六:3)。这mā就是讲chit位犹大mā是耶稣基督ê兄弟之一。Á伊无明确说明家己是耶稣基督ê兄弟ê原因,是早期教会tī耶稣基督koh活升天了后,就无koh以地上血缘关系来看耶稣基督,因为是他上帝ê kiáⁿ,所有ài耶稣基督做见证ê人,lóng是他ê「奴仆」,而无koh用它tī拿撒勒ê家庭之兄弟关系来看家己。

	作者讲伊写chit张phoe是hō͘所有基督徒看ê,因为án-ne并无说明范围是toh一kóa教会。M̄-koh thang来确定ê是当时基督徒lóng是属tī犹太人基督徒,因为chit时chūn ê基督教会之重镇,是tī耶路撒冷,却m̄是使徒保罗ê外邦地区。

	第2节,mā是一般书信一定有ê请安语。Chia强调「丰丰富富地赐hō͘」,这是teh表示ài tī本来ê chiah-ê恩典之上,koh加添入去,hō͘伊tī「怜悯、平安,kah慈爱」ē-tàng koh khah丰富起来。

    第3到4节,chit封书信原本是beh讨论有关耶稣基督ê「救恩问题」,mā就是有关耶稣基督ê死kah koh活之恩典,因为耶稣基督降生到世界上,是为tio̍h beh拯救所有ê世人(参考路加福音二:10,罗马书一:16)。因为这救恩只tī耶稣基督身上出现,因为án-ne,作者特别强调讲「只一pái」,mā就是只有tī耶稣基督内面chiah有ê救恩。M̄-koh因为教会内部有发生严重ê事,就是有假教师传讲错误ê信息。因为án-ne,作者认为有「马上」向大家「提出苦劝」ê必要。Chiah-ni̍h紧急是有人kā错误ê信息带入教会中,chiah-ê人「曲解上帝恩典ê信息」,而in「曲解」ê目的是为tio̍h beh「掩盖(khàm)家己腐败ê行为」。是teh指有人强调只要信了耶稣基督,上帝ê恩典ē-tàng盖过所有ê罪过,因为án-ne,无论怎样ê犯罪,lóng thang hō͘ 上帝ê恩典所接纳。因为án-ne,tī生活上就有放纵情欲方面ê行为出现。

第5到7节,作者提出三项kah历史有关ê事件,包括:一是出埃及ê事件、二是堕落天使ê事件、三是上帝毁灭所多玛kah蛾摩拉chit两个城ê事件等。
第一件事是记载tī民数记第十四章,提起上帝带领以色列出埃及tī旷野漂流期间,因为in对tī beh进入迦南地产生giâu疑,就án-ne上帝决定凡年满二十岁以上ê人,lóng无法度进入迦南地,lóng会死tī旷野里(参考民数记十四:26—29)。

第二件事可能kah创世记第六章1到4节所提起ê堕落天使之记事有关。

第二件事kah创世记第十九章有关系,所多玛kah蛾摩拉chit两个城市ê人mā是m̄相信上帝,人民生活tī淫乱罪恶中,结果上帝ê惩罚就是毁灭chit两个城市,毁灭之状ē-sái讲是寸草不留,只有罗得kah伊ê两个cha-bó͘-kiáⁿ逃离出来而已(创世记十九:30)。

第8节,是继续teh讲述第4节所提起ê「不敬虔ê人」是一个怎样ê型态;chia指出chit种人就是思想上有「淫秽ê幻想驱使 in犯罪,污损家己ê身躯」,这就是所谓思想ê「淫乱」,是意念上ê行为,mā ē-sái讲是对上帝无够忠实。因为一个对上帝忠实ê人,一定tio̍h是心灵洁净ê人,因为án-ne chiah ē-tàng面对上帝(参考马太福音五:8),mā只有án-ne chiah ē-tàng坦然无惊惶地面对上帝ê审判(参考约翰一书二:28、三:21、五:14)。

第9节,kah申命记第三十四章5到6节记载摩西往生,却无人知影伊埋葬ê所在。早期教会有一本流传甚广ê经典名叫「摩西升天记」,tī chit本册中提起摩西死后,是由「天使长米迦勒」协助埋葬ê,了后无久就升天à。当天使长米迦勒准备ài带伊升天ê时,却被「魔鬼」阻扰,因为魔鬼坚持「摩西ê尸体」由伊管理,理由是摩西teh带领以色列人出埃及入旷野后,刣死了真chē人。Chia作者讲为tio̍h抢夺摩西ê尸体,天使长米迦勒非常受气,ē-sái讲是mā无用「侮辱ê话」谴责魔鬼。因为洁净ê人bē讲pháiⁿ话,免得家己mā被pháiⁿ话污秽了心灵。

第10节,kah第9节相对照;如果连天使lóng bē用「侮辱ê话」,chiah-ê不敬虔ê人所表现出来ê,m̄-nā是思想上有淫乱不洁ê念头,讲出来ê话koh khah是lah-sap难听,甚至连家己「所bē了解ê事」,mā会用lah-sap ê话去解读。Chit种行为就「像野兽仝款跟tòe本ē-tàng去做hiah-ê毁灭家己ê事」,就是bē用慈悲、怜悯之心看待性命ê尊严。

第11节,连续提起三个旧约中非常顶港有名声下港有出名ê人物,其一是该隐,二是巴兰,三是可拉。作者tī chia清楚指出chit三个人物所代表ê,就是不敬虔ê人ê特性,有极高ê嫉妒心、对钱财有贪婪ê欲望,kah对权势有迷惑ê心。

作者tī chia用该隐、巴兰、可拉等三人做譬喻。该隐因为嫉妒小弟亚伯,就kā家己ê亲小弟亚伯刣死(参考创世记四:7);巴兰则为tio̍h钱财,竟然会违背上帝ê旨意,作无应该做ê事、讲无应该讲ê话(参考民数记第廿二到廿四章);而可拉ê例thang参考民数记第十六章,清楚记载伊mā是利未族人,却对摩西kah亚伦ê带领不满意,想beh取代in两人ê地位,故意藐视摩西kah亚伦两人hō͘ 上帝委任ê权威。

第12节,指出顶面所讲chit三种型态ê人竟然出现tī当时教会ê「爱筵」,koh khah pháiⁿ看ê是,in竟然kā爱筵看做是「狂欢」宴乐ê场合。In kan-taⁿ想beh满足口腹之欲,心灵ná亲像lian去ê人仝款。

第13节,真清楚讲出chit种人ê行为,是上帝所讨厌、bē祝福ê对象,甚至会带来上帝忿怒ê惩罚。

	第14到15节ê「亚当ê第七代孙以诺」,chit-ê资料thang参考创世记第五章18到24节。以诺,在世间ê日子kah上帝有「密切ê交往」,因为án-ne,tī伊往生ê时,「上帝kā伊接去,伊就phah m̄见去」。

作者tī chia引用第一世纪教会中非常众信徒所kah意ê以诺册,Tī该册ê第一章9节讲上帝会kah以诺「带千万ê圣天使同齐来」,到这世间来审判所有ê人。Chit种认为天顶ê天使mā thang来审判世间ê人ê观念,tī犹太人ê观念中是非常普遍ê,mā自然ê流传到早期教会中。Á马太福音第十六章27节记载耶稣基督所讲ê话:「人子beh tī in老父ê荣耀中,kah他 ê天使同齐来临。Hit时,他beh按照各人ê行为施报应。」tī chia,犹大书ê作者讲上帝会kah以诺带众天使来审判chiah-ê「行为不敬虔,koh用不敬虔ê话冒犯上帝」ê人。

	第16节,犹大书作者tī chia指出chiah-ê不敬虔ê人ê行为,就是kan-taⁿ会「埋怨别人,责怪别人,而且in ê行为是「随从家己邪恶ê欲望,讲夸张ê话」,甚至koh khah严重ê是会「为tio̍h家己ê利益谄媚别人」。Chia讲「为tio̍h家己ê利益谄媚别人」,chit句话真清楚讲出chit种人讲ê话根本就是讲白贼、不诚实ê,就是为tio̍h图谋家己利益。因为谄媚ê意思,是讨人ê欢喜,并m̄是取悦上帝。

第17节,作者tī chia ê意思是beh hō͘读者知影,耶稣基督ê教示已经透过他ê门徒传达出来,因为án-ne,若有人无照耶稣基督ê教导,hit种ê教导就m̄是真实ê。

第18到19节,提起「历史ê末期」,lóng是会有一kóa人传讲错误ê信息,chiah-ê人siōng欢喜讲白贼,讲kóa不实ê话,而in却过「邪恶kah敬虔」ê生活。Mā会用引诱而且带有「欲念」ê话语来「嘲弄」谨守信仰规律ê信徒。Chiah-ê人其实kan-taⁿ会制造教会ê纷争,tī信仰生活上并无见证thang讲。

第20到21节,ē-sái讲是作者对众信徒最后ê劝勉,伊希望众信徒有三项坚持:

一是坚守神圣ê信仰,并且会藉tio̍h「圣神ê气力祈祷」。Chit-ê意思就是无私欲ê心kah上帝交往。因为上帝是神圣ê,beh kah上帝交往mā一定tio̍h用圣洁ê心灵kah上帝对话。

二是beh「常常生活tī上帝ê疼里」。上帝ê疼是圣洁ê,活tī上帝ê疼里,就是过圣洁ê生活,无法度随便。

三是「仰望咱ê主耶稣基督」ê怜悯。基督徒siōng大ê荣幸,就是有耶稣基督成做救主,并且因为耶稣基督ê koh活,hō͘所有信靠伊ê人lóng跟tòe享受koh活ê福气。Chia ê「怜悯」,表示耶稣基督ê救恩。

第22节,tú好kah坚守信仰到底ê人成做对比;chiah-ê tī信心上「憢疑不定ê人」,mā ē-sái讲是信心软弱ê人,有坚定信心ê人会「怜悯」chit种人,因为in对信仰ê认知无够,chiah会造成信心软弱、不足,因为án-ne,bē-tàng笑in。

第23节,则解释了第22节所提起ê tī信仰上憢疑不定者ê款。作者讲beh「tùi火中抢救in」,chia ê「火」,这是teh指审判ê意思。有kóa人已经到à面临严重惩罚之审判ê地步了,另外有kóa人则需要用怜悯ê态度来看待in,m̄-koh有时为tio̍h beh怜悯in,就一定tio̍h kah in做伙,陪同in,hō͘ in感受tio̍h真爱ê流露。Ē-sái讲是,一定会特别小心(戒惧),一定tio̍h避免家己无法度救人而被感染。作者引用癞ko病患ê衫裤作隐喻,说明若beh避免被癞ko病感染,甚至连衫裤mā tio̍h弃sak。意思就是beh提防,免得被感染了家己却iáu m̄知。

第24到25节,经文被看做是新约圣经中siōng美ê颂赞词句,kah使徒保罗所写ê罗马书第十六章25到27节,以及以弗所书第三章20到21节真类似。Chia第24节是teh回应第20节ê话,ài信徒有坚定ê信心,持守tio̍h信仰无变,án-ne就会得tio̍h上帝ê保守「bē致使跋倒」,án-ne tī终末审判来临ê时chiah ē-tàng「欢欢喜喜」ê心tńg来到上帝「荣耀ê面前」。Mā就是约翰书信ê作者所强调ê坦然无惊惶面对上帝审判仝款。

第25节真清楚强调讲,上帝乃是「独一无二ê上帝」,无其他ê神能用来比并创造ê上帝(参考出埃及记二十:23,申命记五:7、三十二:39)。上帝是「藉tio̍h咱ê主耶稣基督拯救咱」,这mā有表示无其他拯救ê途径。「威严」,chit-ê词只有tī chia出现,表示上帝是伟大ê、而且真神圣有权威ê。

重新查询 专卷研经 犹大书系列
错误回报,请联系