Tī以利户ê言论中，以chit章siōng简短，只有短短16节而已。这是进一步对第三十四章9节讲「顺从上帝ê旨意对人有甚么好处？」作说明。Chit章mā是以利户对约伯过去所发表ê看法提出反驳，因为约伯bat表示：人ê存在对上帝并无甚么意义（参考七：20），以利户同时mā提出kah以利法无仝ê看法（参考廿二：2—3）。

第1到2节，以利户认为约伯坚持家己「tī上帝面前无辜」，伊认为约伯chit种讲法是错误ê，而且是「jōa-ni̍h-á无合理」ê讲词。

第3到4节，以利户认为约伯ê话中有矛盾，伊一方面认为人是m̄是犯罪对上帝来讲lóng无意义，另外一方面soah koh强调家己无犯罪，性命却tú-tio̍h苦难。以利户自认是一个有智慧ê人，m̄-nā有能力ē-tàng回答约伯ê问题，mā同时beh hō͘伊ê chit三位朋友知影真确ê答案。

第5到8节，chit-má以利户对约伯讲，ài伊「仰视天空」，看māi「天有chē高」，伊有一个错误ê观念就是认为人无论犯甚么罪，lóng无损tī上帝荣耀，相对ê，若是人有甚么美好ê行为，对上帝mā无甚么「帮助」、「利益」。因为上帝kah人之间ê距离siuⁿ远à。其实以利户chit种讲法就是引用约伯所提出ê问题（参考七：20）。以利户khah强调一点：人ê一举一动既然对上帝无甚么特别好处á是伤害，就无条件thang向上帝索取报偿，甚至tú-tio̍h苦难ê时mā无向上帝申诉ê条件，因为chiah-ê lóng kah上帝无关，是人家己ê问题。因为án-ne，人需要为家己所做ê事负责。

第9到13节，以利户强调人受tio̍h「压迫」、「被虐待」ê时，应该tio̍h走chhōe上帝ê，因为上帝chiah是性命ê ǹg望，却m̄是向人走chhōe帮助救援。既然上帝赏赐hō͘人有智慧，必定「khah赢过飞禽行兽」。Án-ne，人就应该tio̍h认bat上帝，而且知影tńg来到上帝面前走chhōe帮助chiah是正确。M̄-koh人却无走chhōe上帝，反tńg是「狂傲邪恶」，chit种人呼求上帝ê结果只有「白做无功」而已，因为上帝根本就「m̄听」、「不闻」。

以利户chit种讲词已经真清楚teh说明：约伯就是因为过去做尽pháiⁿ事，taⁿ chiah会有苦难缠身，chit-má伊无论怎样向上帝祈求lóng是无用ê。

第14节，以利户想beh kā约伯讲，ài伊「耐心thèng候」，m̄-thang心浮气躁。伊hō͘约伯知影伊ê「案情已达tio̍h」上帝ê「面前」，伊koh一pái强调：上帝是公义ê神，他一定会施行审判。伊beh指出约伯一再认为上帝lóng m̄出手「惩罚」，mā m̄-chhap「罪恶」，chit种认知是错误ê，而且是「lóng无意义」，以利户认为约伯「讲真chē话」，除了凸显家己ê无知外，并无特别意义thang讲。伊就是beh约伯静静thèng候上帝ê审判。