Tī前一段描述hiah-ê过去生活是潦倒kah落魄，而Tī chit段诗歌中，作者描述chiah-ê人taⁿ用甚么款ê态度teh嘲（sau）笑、戏弄约伯。In m̄-nā无感恩ê心，反tńg是用别人过去对待in父母ê轻视态度去对待约伯。

Chit段描述kah第廿九章11到17节记载约伯过去是好款待贫困孤寡ê人，tú好成明显对比。作者用chit种方式teh说明「善并无善报」、「恶mā无恶报」。

第9到10节，chiah-ê过去被约伯救助过ê人，taⁿ是用正khau倒削ê态度对待约伯，kā约伯当做in取笑作乐ê对象。Chia所讲ê「笑柄」一词，mā thang当做「歌曲」解释，意思是teh指约伯遭遇苦难ê事，tī街路民间已经有人kā它编成歌曲teh唱，用来侮辱约伯，甚至朝ǹg约伯ê面「吐嘴澜」，这是一种非常恶质ê方式（参考以赛亚书五十：6），kah约伯过去对待in ê态度完全颠倒（参考约伯记廿九：24）。

第11到15节，约伯认为chiah-ê人胆敢án-ne对待伊，是因为in认为约伯是受tio̍h上帝惩罚，所以in án-ne对待约伯mā是teh成全上帝ê旨意，ná亲像俗语所讲ê「替天行道」仝款。Chiah-ê人看tio̍h约伯无力tńg来击，就认为伊好欺负，就án-ne in包围约伯，然后尽情地攻击伊、侮辱伊，hō͘伊感受tio̍h ná亲像面临死亡般无法度喘过气来。Chit时chūn，约伯发见过去所有ê荣华富贵（参考廿九：3—10）lóng已经会失去。这mā说明伊过去因为敬畏上帝所得tio̍h ê一切，taⁿ mā保不住à。Tī第11节伊koh一pái提起所有tú-tio̍h ê灾难，乃是tùi上帝来ê安排á是受上帝遗弃有ê结果。

其实约伯记ê作者是透过chit种方式提出ê一个问题：如果人生ê苦、乐、祸、福等lóng是tùi上帝来ê安排，án-ne，像约伯chit种好人mā受tio̍h án-ne惨痛ê待遇，是m̄是mā是上帝「故意」安排ê？若是，这岂m̄是说明上帝「故意」hō͘好人受苦难？若m̄是，án-ne，好人为何会受苦难？