约伯记 1章1节 到 1章12节   背景资料  下一笔
约伯记第一到二章是kui本约伯记ê「序文」,tī chit两章ê篇幅中,作者kā kui个故事人物做一个清楚交带,包括事件ê背景kah约伯chit-ê人ê特质。讲约伯是一个正直ê好人,敬畏上帝,m̄做任何pháiⁿ事。Tī这章ê序文中,是用上帝kah撒旦ê对话方式来进行,并且描述hiah-ê仆人一个接一个来向约伯报pháiⁿ消息ê描述,讲出约伯ê苦难,竟然是tī上帝同意之下chiah发生。

    Chit段经文是绍介「约伯」chit-ê人,以及天庭开会ê情景。Chit种天庭开会ê情景,ē-sái讲是约伯记chit本经册siōng特别ê所在。作者透过chit种方式,teh强调一个中心思想:天顶ê决策,ē-tàng变更地上ê一切。

第1到3节,chit段经文先绍介约伯ê背景。其实「约伯」chit-ê名有含「攻击者」,á是「被攻击者」ê意思。M̄-koh chit种名kah chia所绍介ê「约伯」完全无相仝。「乌斯地区」,可能是tī约旦河以东ê地区,正确地点已经bē-tàng考。作者讲「约伯」是「正直ê好人」。所讲ê「正直」指ê是:一切遵照上帝ê教导去行。Á「好人」一词,一再出现tī约伯记中,有时用「无thang指责」(参考八:20)、「清白」(参考九:20)、「无罪」(参考九:21、22)、「正直清白」(参考十二:4)。讲约伯「m̄做任何pháiⁿ事」,意思是teh指远离邪恶ê事,mā因为án-ne,chiah ē-tàng表达约伯是一个「正直ê好人」之生活态度。Kā「敬畏上帝」kah「m̄做任何pháiⁿ事」连做伙看,ná亲像摩西律法上所要求以色列人民做到ê「疼上帝」,同时mā「tio̍h疼家己ê厝边,亲像疼家己仝款」(参考利未记十九:18)。约伯chit-ê人确实是做到à chit-ê程度。

然后作者讲伊有「七个kiáⁿ,三个cha-bó͘-kiáⁿ」。圣经中ê「七」这数字,表示有含上帝ê祝福ê意思,因为伊有敬畏上帝之心。三个cha-bó͘-kiáⁿ kah七个kiáⁿ,加起来是「十个」;「七」千只羊加「三」千只骆驼mā是「十」;「一千头牛」等于是「五百加五百」等,chiah-ê数字lóng teh表示一个概念:双手伸出来就是「十」根指头,teh代表完美无缺。以色列文化中「五」kah「十」lóng teh表示「完美」ê意思。

骆驼,这是当时游牧民族siōng贵重ê「动力」,有骆驼ê人,表示家境bē-bái,而约伯有「三千只骆驼」,tú好表示伊是非常富有ê人,同时mā teh代表伊tī当时ê乌斯地区拥有极高ê社会地位。

第4到5节,chit两节经文thang看出约伯ê富有,m̄-nā是有一万一千五百头ê cheng-seⁿ,iáu有「成群ê奴仆」,并且thang不时tī厝里宴客。第5节mā是回应第1节ê所谓「敬畏上帝」,包括会tī欢宴了后省思是m̄是犯罪ê行为。Chit种反省ê功课,是深惊tī「无意中侮慢得罪上帝」,意思是teh指用无正确ê话语谈论有关上帝ê事(参考马可福音三:28—30)。

第6到7节,chit两节ē-sái讲是圣经中siōng特别ê一节,说明上帝tī天顶ê众神明前召开天庭开会,众「神子」聚集tī上帝面前,chiah-ê「众神子」,就是上帝ê奴仆,mā是teh指「天使」ê意思(参考列王记上廿二:19,诗篇八十二:1、八十九:5—7,以赛亚书六:2),in是上帝ê帮手(参考创世记三十二:2、诗篇一○三:20—21,撒母耳记下廿四:16,列王记下十九:35)。上帝召开天庭会议,mā同时teh表示上帝beh审判重大ê事务,讨论有关世间发生ê tāi-chì,á是听听各地「使者」ê 回报(参考撒迦利亚书一:8—12、六:4—7)。

注意chia ê「撒旦」,有加上「定冠词」,表示伊mā是上帝ê「奴仆」之一,它扮演ê角色是亲像「检察官」仝款,专门负责「控告」、「检举」世间人类ê行为。M̄-koh后来圣经中ê「撒旦」无koh加上「定冠词」,真可能是因为后来以色列人民看「撒旦」就是专门teh「捣蛋」,挑拨人远离上帝ê一种力量,chit种观念已经普遍,因为án-ne,就不koh加上「定冠词」,hō͘人一看就知影是「pháiⁿ ê」、「无好ê」。上帝询问chit位巡视(漫游)地上各地ê「撒旦」,问它有无看tio̍h甚么特别ê事á是物?

第8到11节,chit节是上帝teh绍介约伯hō͘撒旦认bat。上帝称呼「约伯」是他ê「奴仆」,意思是「约伯」kah上帝之间已经到à「bē-tàng分」、「非常密切」ê关系。当上帝称呼一个人是他ê「奴仆」ê时,mā teh表示chit-ê人就是上帝亲自拣选ê对象。上帝hō͘撒旦知影约伯确实是一个忠心ê奴仆。M̄-koh撒旦却反驳上帝ê讲法,认为约伯会án-ne忠心,是因为「有利可图」,撒旦chit种回应非常直接而且尖锐。Mā就是讲:上帝kah「约伯」之间关系是建立tī彼此hō͘利ê基础上。撒旦为tio̍h beh证明所观察是正确,它建议上帝tùi约伯身上撤退,并且tio̍h「the̍h走」约伯身上tùi上帝所领受ê一切财富,伊认为若是án-ne约伯一定会弃sak上帝。

第12节,kui本约伯记一再受tio̍h议论ê经文,就是chit节。一般lóng会问:为甚么上帝会允准撒旦去做chit件「pái布」约伯ê事?án-ne,上帝是真正爱约伯mah?约伯án-ne忠实tī上帝,上帝kám无koh khah应该伸手庇护约伯,hō͘撒旦远离约伯chiah-tio̍h。M̄-koh作者beh表示一个重要ê认bat:上帝对忠实tī他ê奴仆有绝对ê信心。Ná亲像约伯对上帝有绝对ê信心。因为上帝认bat约伯。Chia mā讲上帝允准撒旦对约伯进行测试,m̄-koh有限制tī一定ê范围,bē-tàng lóng无顾忌ê想beh án怎to̍h án怎。作者用chit种方式teh说明撒旦mā是tī上帝掌控ê中间,它一定tio̍h听从上帝ê命令做tāi-chì(参考哥林多前书五:5,哥林多后书十二:7)。

重新查询 专卷研经 约伯记系列
错误回报,请联系