耶利米书tùi第三十章起到第三十三章止，这四章mā hông称做是「安慰ê书信」，原因为chit四章lóng是讲tio̍h被掠到外国去做奴隶ê以色列民族（注：这是包括tī主前721年被亚述帝国灭亡ê北国以色列人民在内，以及tī第二pái亡国后ê南国犹大人民），会重回故乡重建家园。

这四章ê内容kah头前第廿五到廿九章所提起ê亡国预言，tú好成做一个鲜明ê对照；头前第廿五到廿九章lóng讲到亡国ê情况，是beh犹大人民好好á tī异邦生活落去。Á tī chit四章里则讲上帝会带领in重回故乡重建家园。Chit种重回家园ê信息为受掠ê以色列民族确实带来一股新ê ǹg望，无亲像头前几章hiah-ni̍h忧闷、哀痛。

Tī chit四章中两个重要ê信仰课题；其一是解释上帝惩罚他家己ê选民ê原因；其二是hō͘上帝ê选民看tio̍h新ê应允会为in带来新ê秩序，kah新ê约。

Chit段经文非常清楚指出上帝对他子民ê应允，就是上帝beh实践他对家己子民ê诺言，ài beh进行他拯救ê工作，beh kā套tī全以色列人民身上ê锁枷折断，hō͘ in脱离巴比伦帝国ê箝制，ē-tàng自由地tńg去故乡，重建家园。

第1到3节，上帝koh一pái透过先知耶利米传出他拯救ê信息。Chia讲上帝ài先知耶利米kā他「讲过ê一切话lóng写tī册上」。类似chit种话koh一pái出现tī第三十六章2节，而且是koh khah详细，时间范围koh khah真阔，beh tùi约西亚王宗教改革时代到一直到teh beh亡国ê西底家王，上帝ài先知耶利米kā他Tī chit段时间内所讲ê话全部lóng记录落来。记载chiah-ê lóng有一个重要用意，就是beh hō͘下一代ê kiáⁿ孙知影这代所发生ê各种事迹。上帝讲「时chūn会到」，他beh hō͘家己ê子民「tńg来归故土，重整家园」，mā就是上帝「赐hō͘ in祖先ê土地」，in会「重新拥有」。

第4到5节，「上主对以色列kah犹大人民讲」，他听见「战栗ê声音」，这表示「惊惶」，不「平安」，这是teh指发生战争，而且厮刣ê非常厉害。

第6到7节，chit两节用妇女临产前hit种阵痛ê样式来形容cha-po͘人tī战争中ê苦楚，因为战败所表现出来ê hit种惊惶kah不安，mā是战败者siōng-kài「痛苦ê时chūn」。M̄-koh tio̍h注意ê是，chit种战争是上帝发起ê，因为他正teh进行拯救家己子民ê工作。因为án-ne，甚么人敢抵挡上帝拯救家己子民ê工作，甚么人就会tú-tio̍h极大ê痛苦。Á tī战争ê痛苦中，上帝ê子民iáu ē-tàng幸存落去。无论境遇jōa-ni̍h-á大ê痛苦，上帝并无弃sak in，颠倒ê，上帝会kah in同在，保护in，hō͘ in tī苦难中有生机。

第8到9节，chia讲上帝拯救ê「hit一工」来到，就是上帝透过先知耶利米所讲ê，以色列民族被掠到巴比伦七十年期满时间来到ê「hit一工」，上帝「beh at断套tī in颔颈上ê枷担，斩断锁tiâu in ê铁链」，这是teh回应第廿七、廿八两章先知耶利米用象徵性ê方式，套tī颔颈上ê「枷担」，形容、teh象徵犹大人民会hō͘巴比伦帝国俘虏去做奴隶ê记号。M̄-koh taⁿ，上帝beh tī he teh beh来临ê日子里，beh kā ná「枷担」，kah箝制in行动ná亲像囚犯仝款ê「铁链」lóng总lóng phah断，beh hō͘ in得tio̍h自由，in kā「无koh作外国人ê奴隶」（参考诗篇二：3）。上帝ê子民会清楚知影，tio̍h「事奉」上帝，而且会顺服上帝拣选出来ê君王，带领in敬奉上帝，听从上帝ê旨意kah命令。

第10到11节，chit两节koh一pái出现tī第四十六章27到28节。第10节mā thang参考以赛亚书第四十三章5到7节。上帝beh以色列kah犹大ê子民「m̄免惊惶」、「m̄-thang惊惶」，因为当上帝施行他奇妙ê拯救工作ê时，mā是他teh进行审判ê时刻，必定会有大灾难降临，带来hiah-ê人恐慌kah不安。因为án-ne，chia tio̍h以色列kah犹大ê子民不要害惊、惊惶。上帝必定会kah in同在，beh「拯救in」，并kā hiah-ê统治in ê族群驱ta̍k出in khiā起ê土地。