Chit段经文描述上帝怎样保护tio̍h以色列人民，beh hō͘ in永远不koh受到敌人ê侵犯。M̄-nā án-ne，chia讲耶路撒冷城会有一个全新ê面貌出现，表示上帝特别ê意爱ê意思。

第11到12节，chia所描述新ê耶路撒冷之景况，thang参考启示录第廿一章9节后面所记载有关新ê耶路撒冷城。过去hit-ê城常常tú-tio̍h异族ê入侵、威胁，致使人民孤立无援而陷入困境，m̄-koh chit-má上帝beh用「彩色ê石头」kah「宝石」，重新「奠立」hit-ê城ê「基础」，表示上帝会看顾、庇护，并hō͘ hit-ê城有稳固ê基础，而且会发生闪烁ê光彩。

第13到14节，thang参考以赛亚书第五十章4节，mā thang参考出埃及记第三章7到8节，是上帝亲自伸出救助ê手。有上帝带领ê民族、国家，会享受「繁荣和平安」，而且是用「正义」治理in，hō͘ in「强大」起来，因为án-ne bē koh再有任何民族、国家来「侵略」、「欺凌」in。

第15到17节，chia真清楚表示：只要有上帝同在就m̄免惊惶。欺负上帝ê子民就等于是kah上帝对敌，chit种君王kah国家一定会tī战争中失败。因为去侵犯有上帝庇护ê国家，就等于是对敌上帝，上帝会亲自保护，并出手反击敌人ê攻击。