第四十七到四十八chit两章有一个共同主题就是：上帝beh借用波斯帝国皇帝塞鲁士来当奴仆，差派伊去带领上帝ê子民脱离巴比伦ê辖制，hō͘ in重回故乡。为甚么上帝beh惩罚巴比伦？根据以赛亚书第十四章12到15节ê记载，是该国tùi国王到人民lóng真骄傲，甚至beh kah上帝共比高，bē记得in是上帝所徵召来当奴仆（参考耶利米书廿五：9），一定tio̍h听从上帝ê旨意，却m̄是kā家己当做上帝。

第四十七章，是用哀歌ê形式写出来。内容teh描述bat辉煌、荣耀到极点ê巴比伦帝国，taⁿ kā没落，而且teh beh面临被毁灭ê结果。

第1到4节，经文开始就是上帝直接对巴比伦讲话，ài她「落来」，而且是tùi她ê「宝座上落来，坐在地面ê土粉顶面」，chia用「土粉」形容巴比伦teh beh陷入非常卑贱之态（参考约伯记一：8），表示它ê名誉扫地ná亲像土粉一般。而且讲它kā「成做奴隶」，负责「推磨，磨面」ê工作。Á它ê妇女被迫一定tio̍h「除下底罩」、「脱掉长裙，露出腿来」ná亲像妓女一般。Á它ê人民会hō͘对待ná亲像奴隶，tú亲像过去in对待犹大人民仝款，m̄-nā是hō͘剥掉了身上ê衣物而「赤裸」，就算beh过河mā一定tio̍h是赤脚涉水而过，这lóng是上帝「报复」in ê惩罚，因为上帝beh拯救「释放」以色列人民。

第5节，chit-má上帝下命令，ài巴比伦「不准作声」，去「坐tī黑暗」ê监牢内，它已经会失去本来上帝拣选出来当奴仆ê时拥有ê光环。

第6到7节，chia真清楚指出并m̄是巴比伦帝国有甚么能力ē-tàng制伏以色列民族，却是因为上帝ê旨意，tio̍h用巴比伦来惩罚以色列人民。M̄-koh巴比伦认为家己真行，用非常惨忍ê手段对待以色列，「lóng无仁慈，对老年人mā残酷无情」，tùi「不思想chit项事ê结局」就是灭亡。

第8到9节，「听pah！」这是一句警语，而且是真严肃ê语句。Chit两节指出巴比伦灭亡ê原因，就是「自称kah上帝仝款伟大」，这teh表明巴比伦帝国人民ê心目中，根本无kā上帝khǹg tī内面，m̄-nā án-ne，统治者iáu会kā家己当做是神，ài人民崇拜伊（参考但以理书六：7）。chit-má上帝beh透过波斯帝国ê塞鲁士来惩罚它，thang想像会tio̍h ê结果就是人民会「丧夫失子」，无重新koh再起、复兴ê机会。

第10到13节，既然巴比伦自认kah上帝仝款伟大，无人thang比，而且「认为无人看见你ê恶行」，chit-má上帝表明他m̄-nā清楚看见它所有恶质ê行踏，而且beh出手严惩，就算它用尽所有「法术」，灾难照样降临到它身上，任何「咒语」lóng无法度救它。纵然国内真chē「星象家」mā bē-tàng做甚么，只有ē-tàng「按月」讲出kā beh发生ê灾难而已。

第14到15节，chiah-ê宗教师á是星象学家，看起来真有学问，thang占卜预测会发生ê事，m̄-koh却无法度保护家己免受灾难。因为上帝出手惩罚ê时chūn，任何人lóng无法度逃离。想beh óa靠家己ê知识、才能ê人，最后就是「行上末路」，无法度得tio̍h上帝ê赐福。