以赛亚书 24章1节 到 24章23节   背景资料  上一笔  下一笔
Tùi第廿四章开始到第廿七章止,这四章通常lóng被称做「以赛亚式ê启示文学篇」(Isaiah Apocalypse)。Tī旧约圣经中,属tī启示文学ê作品bē少,其中包括以西结书、但以理书、撒迦利亚书、阿摩司等先知书中mā lóng有出现部分类似chit种启示作品。Tī新约圣经中以启示录siōng-kài典型。

Tī chit段经文中,作者强调当世人kah上帝ê关系修好了后,新ê时代就会来临,chit种新时代是koh khah án怎都无死亡(参考廿五:8),而且已死ê人会koh活(参考廿六:19)。M̄-koh前提一定tio̍h是:kah上帝有和好ê关系。Á这mā是使徒保罗一再强调ê,咱是藉tio̍h耶稣ê koh活kah上帝和好(参考罗马书三:22)。

第1到4节,「上主beh毁灭大地」,这kah创世记第六章所描述ê仝款。主要原因是kah人ê罪有关系。Chia讲上帝毁灭ê方式是hō͘大地「荒凉」,表示地kā不再生产五谷,人ê生存mā kā因为án-ne发生危机,ná亲像第3节所提起ê仝款。当大地荒凉到「虚空」ê状态,chit时chūn任何人lóng仝款,无人thang避免饥荒ê重创。

第5到6节,chit两节是chit段经文ê中心。Chia真清楚提起上帝会án-ne hō͘大地荒凉到虚空ê状态,就是因为上帝ê子民m̄遵守律法诫命,违背in kah上帝之间所立ê约ê结果。

第7到9节,因为上帝惩罚ê结果,就是天无koh降落雨水,所有一切变成荒凉后,hiah-ê人会因iau饿难耐,已经无法度发出任何庆祝歌唱ê声音,只有「悲伤」,而且都无受气ê现象出现。

第10到13节,iau饿siōng容易反应出来ê社会景象,就是动荡不安,抢夺四界可见,弱肉强食必定会有。因为án-ne,家家户户必定会关ân门户。因为大家lóng teh chhōe食ê食物,chhōe bē-tio̍h就会四界破坏公共建筑,城墙因为án-ne m̄免敌人来攻打就会「倒伊」,「城门」mā会hō͘摧毁,无人ē-tàng管chiah-ê事,因为大家lóng teh chhōe食物。

第14到16节a句,chia用「西方」kah「东方」,表示全世界ê意思。Chia讲「劫后余生ê人」会因为得tio̍h新性命而「快乐欢唱」,而全世界lóng kā为tio̍h án-ne而讲述上帝奇妙ê作为kah伟大。所谓「劫后余生ê人」,mā就是所谓「残存ê人」,意思是teh指tī上帝特别怜悯之下所留落来ê子民。

第16节b句,tùi chit节开始,直到第23节止,koh tńg来到前段审判ê内容。先知以赛亚发见,性命有新ê希望,是知影上帝会怜悯、赦免,伸手救助苦难中ê子民。M̄-koh若是chiah-ê苦难中ê子民m̄知悔改认错,只有期待上帝ê拯救,he是真愚戆koh不切实际ê。这就是先知以赛亚感觉非常痛苦ê原因,因为「背信ê人继续背信」,继续去做可恶ê事。

第17到20节,chit段经文讲上帝必定会采取严厉ê惩罚,hō͘ chiah-ê m̄知悔改ê人无法度逃避「恐怖、陷阱、罗网」ê惩罚。Koh khah严肃ê是会面临严酷饥荒ê打击,差不多无法度重建恢复起来。

第21到23节,「上帝惩罚ê时chūn到à」,chit句话就是teh指「到hit日」ê意思,是teh指上帝审判ê时刻。Hiah-ê平时hō͘人民供奉ê虚假之神mā会列tī惩罚ê对象中,mā包括「地上ê统治者」,因为chiah-ê君王chiah是带头hō͘人民弃sak上帝ê主要原因。当上帝ê惩罚来临ê时,连日头kah月娘lóng会感觉见笑,无面出来kah人见面,in kā家己隐藏起来。Á这mā teh表示另外一个意义,就是kui个受造物lóng已经败坏到无甚么thang hō͘人期待ê了。只有知影悔改ê人chiah会清楚上帝是一切ǹg望ê中心,只有tńg来到上帝ê面前,才能看tio̍h性命ê新希望。

重新查询 专卷研经 以赛亚书系列
错误回报,请联系