Chit章是继续第十五章谈及摩押tú-tio̍h灾难ê问题。特别ê所在，是先知以赛亚tī chit章ê经文中讲连上帝lóng为摩押ê遭遇表示哀伤（参考第9、11节），chit种语句一般真少出现tī先知ê信息中。

第1到2节，「西拉」，chit位词有「石磐」ê意思。这是设tī死海以南，有一工然地形作屏障ê城市，是以东人ê首府。逃难ê摩押人「送一只小羊hō͘耶路撒冷当权ê人做礼物」，表示摩押chit-má需要向犹大国进贡，mā tùi chia thang知影摩押人民惊惶失措、惶恐不安ê款。

「亚嫩河」，这是南北往来ê交通要道，tùi chit种形容mā thang看出四界逃难ê摩押人民心中有真严重ê操心，ná亲像「被赶出了巢窝ê鸟á」非常不安。因为in已经无家可归，mā无所在thang去。

第3到4节，chiah-ê逃难者来要求犹大保护in。In会来走chhōe犹大ê庇护，表示当时ê犹大国势尚且强盛，因为án-ne，in请求犹大国收留in，就是请求m̄-thang驱ta̍k in离开，而hō͘ in成做「无家可归」ê人。所谓「脱离毁灭者ê手」，意思指不beh hō͘ in被「引渡」tńg去，免得遇tio̍h杀害。

第5节，chit节koh一pái重述第十一章1节、10节所提起ê「耶西ê根」tio̍h重新发出「嫩芽」、兴起「一位新王」来统治上帝ê子民。Á这新王ê统治会以「信实无变ê疼」来管理人民，这mā是第九章7节、第十一章2到5节所提起ê君王特点。

第6节，chit节是犹大国接tio̍h摩押人来走chhōe庇护ê时ê回答，意思是in拒绝提供给摩押人必要ê帮助。原因是in真「骄傲」、「狂妄自大」，chit种人到最后即使想beh走chhōe上帝ê庇护mā oh得得tio̍h回应。

第7节，互相比较过去ê辉煌日子，taⁿ摩押人ê境遇是凄惨无比。作者用「啼哭」、「哭」、「悲伤绝望」等名词来说明，摩押人民因为国家遭难陷入悲伤痛苦ê中间ê情况。

「吉珥・哈列设城」ê「佳肴好料」，因为hi̍t 所在区以出产葡萄出名，因为án-ne hit-ê城ê葡萄饼是远近出名。这「哈列设」ê字意有含「phah碎陶器ê碎片」，因为án-ne，「吉珥・哈列设」ê意思，就是「成做碎片ê城市」。先知以赛亚就是teh指出，若是不听从上帝ê话，其结果就会亲像「粉碎了陶器」仝款成做废物，hō͘人弃sak。

第8节，「西比玛」，可能tī希实本以西大约五公里远ê所在。Chia ê记载lóng提起葡萄，表示摩押地区盛产葡萄而且kek酒业非常发达。Mā因为án-ne「bat hō͘各国ê统治者醉倒了」，表示过去摩押对附近地区ê影响力，m̄-nā是外交ê，而且是充满商业利益，m̄-koh taⁿ情况是完全改变了。

第9到12节，lóng是上帝为摩押ê毁灭表示惋惜、悲哀。

「雅谢」，chit-ê地设tī死海ê北pêng地方。有可能就是今á日ê「雅纪尔」（Jazzir）城。

「西比玛」、「雅谢」、「希实本kah以利亚利」等地区，lóng是吕便kah迦得支派所在ê区域，mā就是约旦河东岸（参考约书亚记十三：15—28，《现代中文》译本圣经旧约264页地图）。

过去葡萄丰收ê时，hiah-ê人会tī「踹葡萄」kek酒ê时会唱出欢乐ê歌声，taⁿ lóng无koh存在。chit-má所听tio̍h ê，lóng是「哭」、「哀哭」、「目屎如雨下」，以及tī伤痛中ê haiⁿ-haiⁿ叫声音。因为亡国了后，人民会hō͘掠到他国去做奴隶，所累积起来ê财富lóng沦为他国ê战利品，被搜刮、掠夺殆尽。

第12节讲出几个重要ê意义，一是摩押人tī遭遇患难ê时chūn，一直teh祈求in ê神明来协助，m̄-koh都无得tio̍h任何回应。二是mā说明虚假ê神明，tī患难ê日对受难ê人民并无帮助。三是siōng重要ê一个信仰观念：若是平时不听从上帝ê话，一再做违背上帝旨意ê事，只有面临死亡关头ê时，chiah想tio̍h beh向上帝祈求帮助，án-ne是无可能得tio̍h拯救ê。Ná亲像先知以赛亚传出ê信息所讲，chit种祈祷，上帝lóng bē听（参考以赛亚书一：15），甚至上帝mā会阻止他ê奴仆为chit种人祈祷（参考耶利米书七：16—20）。

第13到14节，chia提起摩押ê遭遇teh beh tī「三年」后koh khah彻底，连恢复ê机会mā无，tio̍h完全毁灭。虽然有残存ê「少数人民」，mā会是「十分衰弱」。