以赛亚书 14章1节 到 14章23节   背景资料  上一笔  下一笔
Chit章是teh描述bat辉煌一时ê巴比伦帝国,teh-beh面临上帝ê惩罚而灭亡。Chit对上帝ê子民以色列来讲,是一个真好ê契机,in会重新得tio̍h上帝ê拯救,成做上帝所欢喜ê子民,而且会兴旺盛起来,hō͘ hiah-ê过去bat俘虏in ê敌国,反而成为in ê奴婢,服侍in。

Chit段经文描述上帝kā ài如何毁灭巴比伦chit-ê庞(pâng)大ê帝国。当巴比伦ê领导者teh夸耀家己ê才能,而且家己认为比所有神明iáu koh khah伟大,甚至想beh kah上帝比高低ê时,上帝会tùi天顶落来毁灭chit种狂傲ê君王kah国家、人民、换句话讲,无论jōa-ni̍h-á伟大ê君王,á是国家、民族,tī chit世间lóng是仝款,lóng会有死亡毁灭ê时chūn。

第1到2节,短短两节,先知以赛亚讲强大ê巴比伦teh beh被摧毁,而上帝ê子民以色列kā重头tńg来上帝ê怀抱。开始就讲上帝beh「koh再」对以色列人民显示他ê慈爱。chit-má beh hō͘ in重回故土,tī家己ê「土地顶面定居」,而且iáu有「真chē异族tio̍h kah in tòa做伙」。上帝会赐hō͘以色列民族全新ê荣耀,ná亲像当年大卫王朝ê时仝款兴盛,其他ê国家、族群lóng来归顺。

第3节,thang参考第四十章1到2节。上帝认为以色列人民ê惩罚已经有够,时间mā到à。因为án-ne,tio̍h除去in ê「悲伤kah痛苦」,无人会koh再奴役in。

第4到8节,chia讲残暴ê统治者kan-taⁿ会「奴役人民,不断来迫害被征服者ê国家」。Taⁿ上帝出手救助chiah-ê被奴役ê人,mā就是phah倒chiah-ê奴役别人ê国家、君王。这说明一个中心思想:上帝chiah是历史ê主宰,m̄是任何君王á是统治者ē-tàng主宰世界。上帝beh重建一个全新ê世界,是「宁静kah和平;人人欢乐歌唱」ê生活社会,chit-ê全新ê世界,是无战争、无暴虐ê。Án-ne,人民chiah ē-tàng享受安kah乐利ê生活(参考以赛亚二:4)。

第9到11节chit段经文真清楚指出,任何一个世人看做伟大ê君王,lóng会死亡。无永远bē死ê君王(参考诗篇第四十九篇、八十九:48,传道书八:8)。即使被世人看做是siōng伟大ê君王,mā是仝款,死ê时chūn lóng会先下「阴间」等待审判。

值得注意ê是chia描述过去在世间非常显赫ê统治者,tī阴间ê居所反tńg是ná亲像乞丐ê床铺仝款。In过去在世间有人ta̍k工为in歌功颂德,m̄-koh tī阴间却m̄是án-ne;in ê境遇是连想beh有一个清气ê床铺mā无可能。In ê「被窝是蛆」,m̄-nā表示会发生恶臭,而且是有bē死ê虫teh咬(参考马可福音九:48),绝对是痛苦难耐。因为in bat用残酷ê手段对待hō͘ in奴役ê人民。

第12到15节,chit段经文真清楚指出巴比伦王会án-ne有悲惨ê结局,就是伊对敌上帝,而且想beh取代上帝。Chia讲出巴比伦王原本像一粒「明亮ê晨星」,因为上帝呼召伊为奴仆(参考耶利米书廿五:8)。M̄-koh伊tī上帝帮助下得胜了后,就开始骄傲、败坏,结果连伊所统治ê帝国mā tòe灭亡。灭亡ê主要原因是巴比伦王自认为是神明,甚至想beh kah上帝比高低,伊bē记得家己只不过是一个人而已。先知以赛亚tī chia真清楚指出,án-ne骄傲ê君王就是kā家己推向死亡ê「阴间」、「深渊」里,无任何人thang救伊起来。

第16到17节,重述第9到11节所讲ê。巴比伦帝国bat hō͘世间ê国家震撼、惊惶不安,是世间siōng显赫ê国家。Á巴比伦王koh khah是被尊崇siōng伟大ê君王。M̄-koh taⁿ完全无仝款了,因为伊mā难逃死亡ê来到。

第18到20节,第18到19节是相对句型。Chia指出即使siōng弱小国家ê君王,死后所埋葬ê坟墓lóng tio̍h比巴比伦王ê iáu koh khah好,因为巴比伦王最后是连坟墓mā无。意思是伊kā死无葬身之地,因为伊mā bat án-ne对待hō͘伊征服ê人民。Tī古代社会,认为这是一个人siōng悲惨ê结局。

第21节,tī摩西ê律法中真清楚规定,bē-tàng kā顶一代ê罪责hō͘下一代来承担(参考申命记廿四:16),每一个人tio̍h负担家己所犯ê罪责。先知耶利米mā提出仝款ê看法(参考耶利米书三十一:30—31)。M̄-koh实际ê社会生活经验却m̄是án-ne。顶一代ê罪过,往往会延续到下一代去承受。

第22到23节,chit两节讲出上帝惩罚巴比伦帝国ê结果,是hō͘巴比伦帝国永远bē重现。因为上帝决定kā伊完全铲除。

重新查询 专卷研经 以赛亚书系列
错误回报,请联系