以西结书 40章28节 到 40章49节   背景资料  上一笔  下一笔
Chit段经文谈及内院ê南门、东门、北门,以及厢房kah圣殿ê部分。

第28节,「内院ê南门,大细kah外院ê仝款」。既然有门,就会有围墙,若无,这门就无存在ê意义à。因为án-ne,thang理解tī外院beh进入内院ê时,koh有一道围墙区隔tio̍h内院kah外院。因为外院是外邦人mā thang进入ê所在,若是内院无围墙,就真容易hō͘外邦人tī无注意之下误闯内院而造成冲突。

第29到30节,tùi chia thang看出内墙kah外墙ê墙间之设施lóng仝款,包括有「守卫房、门廊,kah墙柱」等。而且四周lóng有「小窗」,而且甬道mā仝款「长二十五公尺,阔十二公尺半」。

第31节,上内院tio̍h爬「八个台阶」,表示内院比外院koân出「八个台阶」。这mā teh暗示beh进入外院chìn前,就一定tio̍h有敬畏ê心,ná亲像beh登上上帝ê殿仝款。

第32节,「内院ê东门,大细kah kah其他仝款」,chit句话已经说明东门、南门、北门等三个门,无论tī设施、造型等lóng仝款。东门并无因为是属tī正门就比较khah特别。

第33节,墙壁顶ê设施包括有「守卫房、门廊、kah墙柱」等,mā有「小窗」。甬道ê长阔度mā kah外院ê墙仝款,「长二十五公尺,阔十二公尺半」。

第34节,「上这门有八个台阶」,tùi围墙ê外面beh进入外院,就beh peh上七个台阶,koh来tùi外院beh进入内院则是beh爬「八个台阶」,án-ne,就共计tio̍h爬十五个台阶。Ná亲像头前讲过ê,表示jú来jú高,jú接近至圣所ê意思。

第35节,「北门,大细kah外院ê仝款」,当然也kah其它ê门仝款。

第36节,每道门ê设施lóng仝款,有「守卫房、墙柱,kah门廊」等。因为有守卫房,因为án-ne,需要开「小窗」透光。「甬道长二十五公尺,阔十二公尺半」,chit句话mā teh表明内墙ê厚度,kah外墙仝款。

第37节,tùi北门chia beh进入这到内墙,仝款是需要爬「八个台阶」。

第38节,「外院有一间厢房」,而这厢房是tī「通往内院ê北门」ê所在,chia主要是用来「清洗烧化祭ê祭牲ê」,原因是祭坛在内院处。因为án-ne,靠近内院ê所在mā有两种用意,一是比较khah接近,m̄-koh m̄是在内院,因为内院真接近至圣所,án-ne chiah bē造成内院污秽,致使至圣所mā连带受tio̍h污秽。

第39到41节,thang看tio̍h共计「有八张桌á」,lóng是为tio̍h beh用来宰杀献祭用ê cheng-seⁿ,包括有「烧化祭、赎罪祭,kah赎过祭ê祭牲」,lóng tī这八张桌á处理。奇怪ê是无写出「平安祭」,而且chit种祭是含有节期庆祝ê内容(参考申命记廿七:7,撒母耳记上十一:15,列王记上三:15、八:63,历代志下三十:23、三十一:2)。

先知以西结无嫌费气讲述chiah-ê,mā有一个用意,beh hō͘ tńg去故乡重建家园ê以色列人民知影tio̍h用信仰重建生活秩序,hō͘一切lóng tùi信仰开始,而信仰就是bē-tàng随便,一切lóng得按照规矩来。

第42到43节,chiah-ê桌á是「石头凿成ê,高五十公分,桌面七十五公分正方」,然后tī桌á ê「四边有七公分半阔ê槽」,宰杀动物流出来ê血thang顺chit-ê槽流来收集,了后kā它洒tī祭坛ê四周。

第44到46节,chia说明设立chiah-ê厢房ê作用,就是为tio̍h提供给办理献祭礼仪ê祭司用ê,特别分开坐北朝南ê厢房,是为tio̍h「tī圣殿供职ê祭司用」,而坐南朝北ê厢房是专为「tī祭坛前供职ê祭司用」,án-ne,就bē有混乱,因为祭司各执无仝ê工作,mā有专门歌唱kah专门宰杀牲祭等无仝ê工作。

「所有祭司lóng是撒督ê后代」,这kah tī摩西时代规定所有祭司lóng一定tio̍h是出tī利未支派亚伦ê kiáⁿ孙(参考出埃及记第廿八到廿九章),已经有差别。会改变是tī大卫王时代,因为亚伦kiáⁿ孙ê大祭司亚比亚他参与大卫宫廷争权内斗(参考列王记上一:5—8)。因为án-ne,当所罗门掌握了王权了后,随时kā亚比亚他大祭司ê职位kā伊废除(参考列王记上二:26—27),然后任命撒督取代亚比亚他ê职位(参考列王记上二:35)。

第47节,「内院,是五十公尺正方,圣殿坐落西边」,外院是正方形,内院mā是。Á圣殿则坐西朝东,因为án-ne,正门就是东门,只要tùi东门进入,就会直接看见圣殿,hō͘人心生敬畏。

第48节,「圣殿ê前堂」,一般来称呼祭司院,是只有祭司chiah thang进入ê所在。根据所量出来ê尺度,chit-ê前厅并m̄是真大,只有「深两公尺半,阔七公尺」而已,颠倒是两pêng ê墙壁真厚,有「一公尺半」。

第49节,chit节讲出beh上圣殿,一定tio̍h peh上台阶,chia虽然无标示有jōa-chē台阶,m̄-koh《七十人译本》kā希伯来文ê「asher」这字翻译做「台阶」。Án-ne,「台阶阔十公尺」,就成做有十个台阶。M̄-koh《现代中文译本》ê翻译认为是一个台阶,而且是真大ê一个台阶,有「阔十公尺,深六公尺」之大。

若是以「台阶」来看,这就thang看出圣殿比内院高了十个台阶。Mā tùi chia thang看出先知以西结心中ê概念:敬拜上帝ê所在,是siōng崇高ê所在,koh khah ài有敬畏ê心。
 

重新查询 专卷研经 以西结书系列
错误回报,请联系