Chit段经文是属tī圣殿外院，以及外院ê北门kah南门ê部分。

第17到18节，chia并无说明这「三十个房间」ê功用是甚么，mā无说明确实ê地点。

「铺石ê路」是绕tio̍h外院，m̄-koh「外院比内院低」，这thang凸显出内院ê崇高kah重要性。因为内院接近圣殿，mā thang看出jú接近圣殿，地势jú高。

第19节，「内院有一个门，比外院ê门高一个台阶」，这lóng teh表示内院kah外院之间是「圣俗」之间ê无仝。内院ê门kah外院ê门距离有「五十公尺」远。

第20到21节，chia讲「通往外院朝北ê门洞」，hit-ê门洞有「甬道」，kah东门仝款，mā是「两pêng各有三间守卫房」，这lóng说明即使是beh进入圣殿ê外院，mā lóng beh经过chiah-ê守卫室警卫ê检视。然后tùi外院beh进入内院ê时，mā是仝款，tio̍h通过甬道ê守卫室。

第22节，chia讲北门tī「门廊、窗户，kah雕刻tio̍h棕树ê墙柱lóng kah东门ê仝款」，这表示tī先知以西结ê异象中，新ê圣殿是每一个门lóng仝款。
「有七个台阶上北门」，表示圣殿确实是盖tī一座小山丘上。通常会讲「上锡安山」，表示圣殿是盖tī siōng koân ê所在。

第23节，外院通往内院「两个门间ê距离，长五十公尺」，这kah东门仝款。因为án-ne，thang清楚看出，新ê圣殿是正四方形。

第24到25节，「朝南ê门洞」，这是teh指南边ê门，包括「守卫房、墙柱，kah门廊ê寸尺lóng kah其他ê门仝款」，表示这圣殿除了西边无开门外，其余东、南、北等三门，无论tī外面观kah内部方面lóng仝款。Mā就是讲，无论tùi tó一个门进入内院，lóng是仝款ê。

「甬道」ê长度kah阔度，mā是仝款kah东门、北门仝款，分别是「二十五公尺」kah「十二公尺半」（参考第13、15、21节）。

第26节，「甬道ê入口有七个台阶上南门」，这kah北门ê甬道入口仝款（参考第22节），ē-tàng看出圣殿是设tī siōng koân ê所在，表明它是神圣ê。

第27节，chit-ê带领者手上一直the̍h量尺，每道门lóng量，而且mā量了外墙ê门到内墙ê门之间ê距离，lóng是「长五十公尺」。