Chit章谈起有关假先知嚣张ê情景，先知以西结讲chit种人危害犹大人民非常大，因为in lóng是乱使用上帝ê名传达虚假ê信息。Chiah-ê假先知中m̄-nā有男ê，mā有女ê假先知。换句话讲，tī主前第六世纪时代，犹大国真正是假先知四界猖獗，án-ne chiah是真正致使犹大国灭亡ê另外一个重要因素。因为假先知传出来ê信息会误导民众偏离上帝ê道jú来jú远。

Chit段经文是谈起假先知所带来ê问题，m̄-nā无帮助犹大人民免tī灾难临身，koh khah严重ê，是带来koh khah悲惨ê结局。Chiah-ê假先知主要问题在tī in是kā家己ê意念、想法，当做是上帝ê启示。Koh讲，in是想用家己所讲ê，来「逼」上帝应验，因为án-ne，上帝绝对bē赦免、不原谅chiah-ê假先知，一定会严厉惩罚in。

第1到2节，假先知siōng the̍h手ê方法，就是「家己编造预言」，m̄-koh真先知kan-taⁿ会传达上帝ê ài in讲ê话（参考列王记上廿二：14），m̄是为tio̍h beh讨人欢喜。

第3节，「愚戆ê先知有灾祸à」，chia ê「愚戆」一词tú好kah「智慧」相对。「愚戆」是teh表示对上帝ê认bat完全无知ê意思，而「智慧」则是teh指认bat上帝（参考箴言一：7、九：10）。Chit句话已经真清楚指出对上帝m̄-bat ê假先知，就无可能会讲出上帝ê信息来指引人行正确ê道路。因为án-ne「in ê灵感是家己幻想ê；in ê异象家己编造ê」。

「灵感」、「异象」，这lóng是上帝对先知启示ê方式（参考民数记十二：6）。假先知敢做chit种事，tú好显示in ê心中根本m̄相信有上帝（参考诗篇十四：1—3）。

第4到7节，chit段话讲出假先知ê几个特色：

一是「跟tòe tī废墟内出入ê狐狸仝款无用」。圣经作者用「狐狸」来表示kan-taⁿ会破坏、践踏，一无好处（参考雅歌二：15）。Mā被用来形容是kah蛇仝款ê「奸巧」之动物。Koh讲，chia ê「狐狸」一词，mā有ê翻译本用「野狗」，in通常会集体出入，mā tī废墟中chhōe腐尸ê肉食（参考耶利米哀歌五：18）。

二是kan-taⁿ会bih起来tī废墟中四界游荡，chhōe机会图己私利。当发现「城墙ê缺口」出现ê时，bē想beh去「修补」，看见「倒落来ê低围墙」mā bē想beh去「修建」。Chia所讲「城墙ê缺口」、「倒落来ê低围墙」，lóng是teh指一个国家、社会发生了问题ê意思。

因为án-ne，「当上主ê日子来临、战事发生ê时chūn」，犹大人民只有ē-tàng眼睁睁地看tio̍h因为听从假先知ê话为家己带来ê灾难，无能力保卫家己免受灾害。因为上帝讲他「并无差派in」，in就无法度kā犹大人民讲怎样chiah ē-tàng避过灾难。

第8到9节，上帝讲beh「对敌」chiah-ê假先知。「对敌」一词，thang参考以西结书第五章8节，表示上帝kā kah chiah-ê人成做仇敌，会进行审判惩罚in。Chia mā讲出上帝beh án-ne惩罚假先知：

一是「bē-tàng参加我子民ê聚会」，表示上帝kā远离in，án-ne，in永远听bē-tio̍h上帝怜悯ê消息。Koh讲，chit句话mā表示tī敬拜上帝ê聚会场合，m̄准chit种会乱使用上帝ê人进入，beh kā chit种人当做是外族人仝款。

二是「in ê名bē-tàng登记tī以色列家ê名册上」，这意思是beh tùi族谱中kā chiah-ê人ê名hō͘删除。表示tī in ê族群中，已经无chit种人，因为是见笑ê记号。

三是「绝无法度tńg来到以色列故土」，表示in无法度成做「残存ê人民」、「劫后余生」ê子民。换句话讲，重建家园ê荣誉in无份。因为in就是残害犹大人民受难，而且是逼kah犹大人民远离上帝ê祸首。

以上三项惩罚表示kā in完全排除tī犹大人民中间，上帝ê选民m̄准有chit种人tī内面。

第10到12节，koh一pái举出假先知ê特色：

一是「哄骗」，意思讲白贼，讲不诚实ê话。

二是「讲：『平安！』，其实并无平安」，thang参考第16节，表示chit-ê信息是假ê，m̄是tùi上帝来ê信息（参考耶利米书六：13—14、八：10b—11）。

三是「用石头堆砌ê墙，先知刷上白灰」，这是一种譬喻，mā就是无真实打造起来ê墙，外面用iáu未浸过ê「白灰」涂抹tī墙面上，hō͘外表看起来亮丽，内面却是lóng无连结稳固ê气力，chit种墙真紧to̍h会倒落来。因为是假ê，当事件来临ê时，chiah-ê假墙真紧to̍h会倒落来，看见ê人就会问讲：「Lín粉刷墙有甚么路用？」是嘲（sau）笑ê意思。

第13到14节，koh一pái重复叙述第10到12节ê经文所譬喻不真实ê砌墙工程。Á其结果是倒落来ê墙会「压死」chiah-ê听从假先知话语，kah讲假信息ê众先知。。

「Lín就知影我是上主」chit句话，chit句话tī本章中一再重复出现tī第21节、第23节。Tī以西结书中共计出现有chē kah 52次ê chē，作者用这句来表示犹大人民lóng是tī受tio̍h严厉惩罚而带来苦难了后，chiah会醒悟过来。

第15到16节，thang看出上帝是会受气ê，虽然他是怜悯慈悲，不轻易受气，m̄-koh对hiah-ê专门teh假冒他ê名，传不实信息ê假先知，上帝一定会「倾倒」他ê「大受气」，用以严厉惩罚chit种人。Chit种「大受气」就是第9节所提起ê三项。

只要是假先知，无论in讲jōa-chē「平安」，都无用，m̄-nā无平安，反却是带来灭亡。