Chit段经文是针对犹大人民中间ê女假先知所讲责备ê话。Tī以色列ê历史中，有出现过女先知，亲像摩西ê阿姊美莉安（参考出埃及记十五：20）；士师时代ê底波拉 mā是（参考士师记四：4）；tī约西亚王时代mā出现户勒大女先知（参考列王记下廿二：14）；tùi巴比伦回乡了后koh一pái出现ê女假先知挪亚底（参考尼希米记六：14）；而耶稣出世ê时耶路撒冷mā出现一位女先知名叫「安娜」（参考路加福音二：36）。M̄-koh只要是先知，意思lóng是teh指上帝ê仆人，lóng应该严格遵守传达上帝启示ê话，bē-tàng有虚假、捏造ê事发生。

Tī chit段经文mā指出chiah-ê女先知，ná亲像迦南地普遍ê占卜者、女巫、行法术ê妇女。以色列人民进入迦南地后深受影响，有人学自迦南人ê chit种巫术，mā扮演tio̍h先知ê角色（参考弥迦书三：11）。

第17节，「tī民间编造预言ê妇女」，表示是假ê，m̄是tùi上帝来启示ê。照申命记ê规定，无论是男是女，只要是假先知，lóng一定tio̍h处以死刑（参考申命记十三：5）。

第18到19节，「手腕上ê魔带，制头壳顶ê魔罩」，这是迦南地妇女ê风俗，讲chiah-ê物件thang做避邪ê路用。现在女ê假先知mā用chit种方式「当做一种符咒，thang hō͘ in ē-tàng操纵人ê性命」，这就是一种邪门奇术，为tio̍h是beh迷惑别人，á是用来控制别人ê行动，in是用chit种方法tī「左右」上帝「子民生死」，为tio̍h是beh「求家己ê利益」，这是一种诈骗ê行为，bē管伊人生á是死，只追求己利，甚至mā会「为tio̍h几kā大麦，几块饼」，就会传讲一大堆假话，chit种情形tī北国以色列mā发生过（参考弥迦书三：5）。

「无应该死ê，lín刣死；该死ê，lín hō͘ in活teh」，这是teh指假借上帝ê名，进行杀害无辜ê性命，这是上帝siōng痛恨ê行为。

「Lín向我ê子民讲白贼，in竟相信了lín」，这是一句非常反讽ê话，表示上帝ê子民竟然会相信chiah-ê透过占卜、算命、观兆等法术，却m̄相信一路tùi埃及带领in祖先行出来，pôaⁿ过生存非常困境ê旷野，进入流奶kah蜜ê迦南地，这mā是令上帝感觉非常艰苦心ê原因。

第20到21节，是上帝beh处置chiah-ê犹大人民，kah tī in中间ê女先知。
上帝beh「撕下hiah-ê魔带，解救被lín控制tio̍h ê人」，表示beh kā chiah-ê女先知所用来欺骗别人óa靠为生ê法术器物lóng拆毁，这是teh指chiah-ê法术会失去效力，无任何作用。Hō͘忠实tī上帝ê子民「永远bē koh受」chiah-ê假ê女先知「控制」。

第22到23节，是上帝说明前两节审判ê理由。Chia讲上帝beh hō͘「好人」恢复对上帝ê信心，知影确实有审判。并且beh结束chiah-ê假ê女先知所讲ê一切预言。