出埃及记 40章1节 到 40章21节   背景资料  上一笔  下一笔
Chit章kah第三十九章有共同ê特色,就是出现七pái:「这是照上主吩咐摩西做ê。」(第19、21、23、25、27、29、32节等等)chit句话ê型态kah创世记第一章一再重复句:「一切就照伊ê命令完成。」(创世记一:6、9、15、24、30)是仝款ê句型。Thang án-ne讲,kui个出埃及运动就是tī「一切lóng照上帝吩咐摩西做」之下chiah完成ê,而且相当完美。换句话讲,如果无「照上主ê吩咐」,想beh用人ê气力来完成出埃及ê运动,he是无可能ê。特别是tī旷野四十年ê时间,ná koh khah困难。因为án-ne,后来申命记ê作者án-ne写讲:「Hō͘ 你谦卑,hō͘ 你 iau 饿,用你所m̄ -bat,你ê 祖先mā m̄ -bat ê 吗哪养饲你,hō͘ 你 thang 知人 m̄ 是 kan-taⁿ óa 靠饼来活,人是óa 靠上主ê 嘴所讲一切ê 话来活。(全民版)」(申命记 八:3)

第四十章mā ē-sái讲是tī建造圣幕ê工作上做一个总结,mā就是出埃及记后半ê一个结束。因为出埃及记全部四十章,tùi第一章到第廿四章,lóng是kah上帝呼召摩西去带领以色列人民离开埃及,以及kah以色列人民立约有关,然后tùi第廿五章开始到第四十章提起真chē关系圣幕ê tāi-chì,其中除了第三十二到三十四章,是因为以色列人民悖逆上帝去拜金牛偶像,致使上帝非常忿怒,á koh一pái提起重新立约ê事外。因为án-ne,这第四十章主要就是记载chiah-ê建造圣幕ê事,mā是结束这部分ê记事。

Chit段经文讲tio̍h建造好ê圣幕,ài如何架设起来。

第1到2节,讲出正确ê时间,是tī「正月初一」,对照第17节,提起hit一工是in「离开埃及后ê第二年正月初一」。后来以色列人民就tī每年正月初一到圣幕前敬拜上帝,感谢上帝带领in离开埃及。这就成做今á日台湾长老教会tī每年农历年初一举行新春感恩礼拜之背景。

第3到5节,chia讲tio̍h安放约柜,以及供桌、灯台、香坛,kah圣幕ê帐幕之pái设等规矩。

第6到8节,这是讲tio̍h祭坛、洗脚手ê铜盆,以及圣幕周围ê围篱kah进入圣幕前ê门帘。

第9到11节,chit三节thang参考第三十章26到28节。讲tio̍h圣幕里ê用品,包括油、香、器具等物件,lóng tio̍h kah厝里用ê区隔出来。因为用来敬拜上帝之物件,kah厝里生活用品有所区别,表明ê是「分别为圣」ê意思。

第12到15节,这几节特别讲tio̍h祭司怎样hō͘家己洁净了后,chiah thang上祭坛去执行祭司为人民办理献祭ê礼仪记事。包括穿插祭司礼服应注意ê事项lóng有提起。

第16节,每一个环节说明后,lóng会重复叙述chit句:「这一切摩西lóng照上主所吩咐做。」(第19、21、23、25、27、29、32节等等)表示做这一切lóng真慎重,绝对m̄是因个人喜好á做。

第17到21节,摩西亲自督导架设圣幕ê工作,并且tī圣幕架设好了后,由摩西亲自kā上帝颁布hō͘以色列人民ê诫命石版khǹg入约柜中。圣幕siōng主要用意,就是pái放约柜,约柜则teh表明上帝kah以色列人民同在,因为án-ne,圣幕就成做以色列人民ê中心,后来圣幕被圣殿所取代,á圣殿就是in信仰ê中心。

重新查询 专卷研经 出埃及记系列
错误回报,请联系