出埃及记 3章1节 到 3章10节   背景资料  上一笔  下一笔
Chit章mā是由三种文献混合编辑而成ê。第1节、第4到6节、第9到14节、第19到22节等等,是「以罗伊文献」ê资料;第2到3节、第7到8节、第16到18节等等,是「耶和华文献」ê作品;第15节是属tī「祭司」ê文献。

Chit章kah第四章lóng是记载上帝呼召摩西tńg去埃及带领以色列人民出来ê经过。M̄-koh第三章主要是解答摩西心中ê giâu疑――惊惶tńg去见伊家己ê同胞。因为tī第二章14节记载以色列人民bat质问伊讲:「啥人设立你做首领kah 审判官来管阮? 你kám 会想behphah 死我,亲像phah 死hit-ê 埃及人?(全民版)」因为án-ne,第三章以上帝teh解释家己kah以色列人民之间「约」ê关系,交带摩西怎样去kā以色列人民讲,伊是án怎领受上帝差遣ê使命。

Chit段经文是摩西hō͘ 上帝呼召ê记事,tī摩西ê记事中是非常重要ê一段。
第1节,摩西tùi原本tī埃及王宫生活,因为逃走变成一个tī旷野顾羊群ê顾羊人。Chit节讲上帝ê山是「何烈山」,原来是teh指空旷之地,无任何物件。M̄-koh tī第十九章3节,讲摩西去见上帝ê山却是「西奈山」,chit-ê意思tú好kah「何烈山」完全颠倒,指ê是丛林茂盛ê意思。其实,这是因为无仝文献传统所提供无仝ê资料所致。

第2到3节,长老教会所谓「焚á不毁」ê记号,就是tùi chit两节经文来ê。「上主ê天使」,其实chia指ê是上帝家己,mā thang讲上帝ê天使khiā tī头前,á上帝就tī火焰中出现对摩西讲话。

第4到6节,chia上帝第一pái绍介他家己hō͘摩西认bat,他是「亚伯拉罕、以撒、雅各ê上帝」,chit句话主要teh表达ê就是「约」,mā是teh回应第二章24节所讲ê。因为火焰实在siuⁿ大,hō͘摩西无法度正目睭看teh上帝,后来伊bat要求koh再看一pái,m̄-koh无成功,因为无人ē-tàng看见上帝ê面á存活落来(参考出埃及记三十三:18—23)。

第7到10节,chit段经文是上帝teh说明他beh拣选摩西去埃及带领以色列人民出来ê原因。

Tī chit段经文中,一再重复并强调上帝亲目「看见」、亲耳「听tio̍h」,已经知影以色列人民「渴望挣脱奴役ê哀号」。因为án-ne,决定beh「落来」tùi埃及人手中kā以色列人民拯救出来,带领以色列人民去一个「肥广阔、流奶kah蜜ê所在」。并tī第8节说明chit-ê肥广阔kah流奶kah蜜之地,是「迦南人」等六个民族khiā起ê所在。

所谓「流奶kah蜜」,意思除了是teh指土地肥之外,iáu有另外一个意思,是teh指会有上帝同在。只要有上帝同在,就bē有缺乏之虑(参考以赛亚书七:21—22)。

第10节,这是上帝ài摩西去带领以色列人出埃及ê命令。

重新查询 专卷研经 出埃及记系列
错误回报,请联系