出埃及记 12章37节 到 12章42节   背景资料  上一笔  下一笔
Chit段经文ē-sái讲是结束以色列人khiā起tī埃及ê时间,mā统计in ê人数。

第37到39节,tī第37节chia讲以色列人出埃及ê人口,「kan-taⁿ男丁,就有六十万人」。In数算人口,指男丁ê时chūn,是用年龄「二十岁以上ē-tàng作战ê cha-po͘人」计算(参考民数记一:18、20),tī第三十八章26节koh一pái说明「人数tī二十岁以上ê共计六十万三千五百五十名」,chit-ê数目是用缴交圣幕负担金来算。若koh加上「真chē外族人」,chit种话,出埃及ê人数至少高达一百五十万人以上,甚至二百万人,lóng是真有可能ê数目。

第38节讲「真chē外族人」也kah以色列人民同齐出埃及。因为án-ne,出埃及并m̄是只有以色列人而已。Chiah-ê外族人真可能是以色列人ê家仆,á是埃及人ê奴隶,趁机会跟tòe以色列人出埃及。M̄-koh,chiah-ê人后来tī旷野ê时,mā时常成做以色列人维持秩序ê头壳痛人物(参考民数记十一:4)。Á摩西kah亚伦tio̍h chhōa chit一大阵人tī旷野行动,iáu包括cheng-seⁿ在内,却m̄是一件容易ê事,若m̄是上帝引chhōa,恐惊早to̍h tī旷野结束以色列民族ê性命。

第40到42节,chia讲以色列人总共tī埃及tòa「四百三十年」。这kah创世记第十五章13节;使徒行传第七章6节等等记载ê「四百年」无仝。基本上,无论是四百三十年,á是四百年,lóng teh说明he是一段真久长ê时间,á in lóng已经bē记得祖先kah上帝之间所立ê约。

第42节讲上帝「亲自保守in,引chhōa in出埃及」,这表示是上帝带领以色列人出埃及,m̄是摩西,chit点一定tio̍h清楚。以色列人就用出埃及chit工kā前一晚ê Pôaⁿ过节当做性命更新ê记号,一定会严格遵守。



重新查询 专卷研经 出埃及记系列
错误回报,请联系