出埃及记 10章1节 到 10章20节   背景资料  上一笔  下一笔
Chit章主要是由「耶和华文献」ê资料形成,kan-taⁿ有第1节b句到2节是「祭司文献」ê资料,以及第12到13节a句、第14节a句、第15节b句、第20到23节、第27节等等是「以罗伊文献」ê作品,其余lóng是属tī「耶和华文献」ê资料。

Chit章主要提起两个大灾难,就是第八个灾难—蝗虫之灾(第1到20节)kah第九个灾难—乌暗之灾(第21到29 节)。Á乌暗,tī圣经中表示死亡。因为án-ne,当chit-ê乌暗来临ê时,已经teh暗示to̍h是teh beh来临ê是koh khah大灾难—头胎者死。

Chit十个大灾难是真有秩序排列出现,而且严重性是渐渐升高;tùi水变成血→水鸡→虱母→胡蝇→瘟疫(kan-taⁿ限tī家畜身上)→疮→冰雹→草蜢→乌暗,然后是死亡。Á草蜢ê灾难,会hō͘ in陷入iau饿ê痛苦中。

第1到2节,上帝ài摩西koh一pái去见埃及国王,虽然国王kah伊ê臣仆心刚硬,m̄-koh上帝却ài in认bat对敌上帝会带来严重ê灾难。另外一方面,上帝mā ài摩西kā chiah-ê埃及人所领受tio̍h ê灾难,当做教材来教导了后代ê kiáⁿ孙,谨记一件事:bē-tàng对敌上帝,成做上帝ê敌人。

第3到6节,摩西每pái去见埃及国王,就是ài国王hō͘以色列人离开埃及,去旷野敬拜上帝。伊提出严厉ê警告,若国王iáu是拒绝,会面临严重ê草蜢灾难侵袭,致使全国寸草不留,而且chit种严重性,其恐怖情景是埃及国王ê「祖宗从来m̄-bat见过ê」。

第7到9节,chit-pái连过去hiah-ê国王身边ê鹰派臣仆mā建议国王hō͘以色列人离开,免得造成koh khah chē ê麻烦。第7节讲出埃及国内众官员心内ê惊惶,因为tī前几pái ê灾难中,in bat亲身体验上帝惩罚人ê威力,因为án-ne,当in听tio̍h摩西传出上帝koh beh惩罚in ,就惊惶(参考九:20),因为每pái灾难来临,连in mā受灾(参考八:3—4、21,九:14)。In提醒埃及国王tio̍h清楚知影,「埃及已经teh beh惨死à」。国王就án-ne叫摩西kah亚伦去问,到底是甚么人beh去敬拜上帝?其实伊问chit-,已经teh说明伊ê心内真m̄情愿,而且希望留落来一kóa人质tī手中。M̄-koh摩西ê回答真清楚,是全部ê包括所有ê cheng-seⁿ lóng tio̍h去,这表示in tio̍h离开,m̄是暂时ê、目nih-á ê,却是永远离开埃及。摩西强调he是「过节」,表示这是真重大ê节期,是全体以色列人lóng tio̍h参加ê宗教信仰活动,包括家畜mā在列,原因是需要献祭。Koh讲,守安息日,á是其他重大节期,连cheng-seⁿ动物lóng tio̍h跟tòe歇困。因为án-ne,带出去,in chiah ē-tàng知影tó一kóa thang活动,tó一kóa bē-tàng。

第10到11节,国王一听摩西án-ne讲,就清楚知影若放以色列人án-ne离开,就无可能tńg来à。因为án-ne,伊强烈反应,一定tio̍h kā妇女kah gín-á留落来,只准「男丁」离开。所讲ê「男丁」是指年满二十岁ê cha-po͘人。Chia讲埃及国王只准摩西带以色列人中ê男丁去,是非常奸巧ê计谋,因为只hō͘男丁离开埃及是无法度延续后代ê。换句话讲,伊chit种作法,kah灭族ê手段明明是同出一个法度。

第12到15节,就án-ne,上帝ài摩西施行神迹奇事,果然草蜢tùi四面八方飞到埃及,「盖tòa大地;地上一片乌暗」,真正是所谓「草蜢过境,寸草不留」,in ê厉害用脚头u想mā知。即使现今科技hiah-ni̍h发达,tú-tio̍h「草蜢过境」mā仝款束手无策。草蜢带hō͘人类siōng大ê威胁,就是食了了所有农作物会死亡,严重波及人类生存ê需要。

第16到20节,这是国王第二pái认错,第一pái是tī第九章27节。Chit-pái国王表示承认得罪上帝,mā失礼摩西。伊mā承认chit-pái ê灾难是「致命ê惩罚」,伊恳求摩西向上帝祈求「赦免」,解除chit-pái ê灾难。摩西接受埃及王ê道歉,就án-ne向上帝祈求,上帝就是hiah-ni̍h轻易就ē-tàng kā所有ê草蜢消灭殆尽。这mā说明,tùi上帝来,上帝收tńg来。M̄-koh想beh用人ê能力收tńg来上帝所创造之物、阻挡上帝命令之行为lóng是愚戆无知ê。



重新查询 专卷研经 出埃及记系列
错误回报,请联系