使徒行传 5章17节 到 5章42节   背景资料  上一笔  下一笔
犹太人ê宗教众领袖「非常嫉妒」,因为án-ne,就展开对众使徒ê迫害。这kah当时in mā是因为「嫉妒」耶稣(参考马可福音十五:10),chiah kā伊送交hō͘彼拉多,并且煽动民众大喊钉耶稣tī十字架仝款。chit-má in mā是án-ne ê心态beh除掉众使徒。

In虽然掠使徒关入牢狱,m̄-koh「主ê天使」却到监狱去「phah开监门,kā使徒领了出来」,并且差派in去圣殿见证福音ê信息。

第22到26节,当警卫去监牢beh kā使徒提出审问ê时,chiah发见原本关tī监牢ê众使徒已经tī圣殿教导民众了,chit-ê惊m̄是小khóa。就án-ne in赶紧koh去圣殿kā众使徒带去见犹太宗教领袖。

第27到28节,这是大祭司ê控诉,认为众使徒beh kā杀害耶稣ê「血债归tī」in身上。这mā讲出in心中ê惊惶。

第29到32节,chit段经文是第五章ê中心信息。彼得kah其他门徒对大祭司ê回答,mā thang讲是in共同ê信仰宣言:服从上帝比服从人koh khah重要。
第33到35节,chit段经文是犹太出名ê宗教师迦玛列ê发言。

犹太人ê经学教师有两个派别,其一是比较保守ê「夏麦」(Shiammai),另外一个是比较自由派ê叫「希列」(Hilliel)。迦玛列是属tī「希列」学派ê大师,tī主后25年到50年代,tī耶路撒冷是siōng有影响力ê思想大师。当犹太人ê议员想beh杀害众使徒ê时chūn,伊出来替in讲话,伊ài大家办理审问使徒ê事,一定tio̍h小心谨慎。Tùi第39节看tio̍h迦玛列真受大家尊重,因为伊是经学大师。

第36到37节,迦玛列提起两件历史事件,一是发生tī主后第44到46年间,当时杜达bat带领四百名犹太人去约旦河,对众人讲家己有能力如摩西般,thang hō͘约旦河ê水分开。罗马总督法lóng司(Fadus)派兵打击伊ê时,伊kā跟随者讲免惊,讲伊有能力ē-tàng击溃罗马军。结果家己被罗马军队所俘,并且斩首送去耶路撒冷示众。另外有真chē跟tòe伊ê犹太人mā被斩首。

另外一件事,发生tī主后第6年罗马巡抚居里扭执行户口普查。因为chit pái户口普查ê目的是为tio̍h beh抽税,引起「加利利ê犹大」煽动民众,激进党派ê人就利用机会跟tòe煽动人民抗税。Án-ne thang知影犹大事件,是发生tī杜达事件chìn前,却m̄是第37节所讲ê「以后」。

第38到39节,迦玛列建议mài处置使徒,「chhut-chāi in去!」伊认为,若是出tī人ê作为,必定会失败,m̄-koh若是出tī上帝ê旨意,如果kā它阻止,等于是「对敌上帝」,án-ne就真危险。

第40到42节,众使徒虽然受tio̍h鞭phah,却iáu真欢喜,这就是传福音ê人siōng可爱ê所在,因为是为tio̍h福音ê缘故而tú-tio̍h苦难。Á照摩西律法,鞭phah之刑无法度超过四十下(参考申命记廿五:3)。众使徒虽然受tio̍h鞭phah,却iáu是继续「传扬有关基督耶稣ê福音」。


重新查询 专卷研经 使徒行传系列
错误回报,请联系