使徒行传 17章1节 到 17章9节   背景资料  上一笔  下一笔
使徒保罗kah西拉离开腓立比城后就来到帖撒罗尼迦。Ná亲像往常仝款,in iáu是欢喜先去犹太人会堂见证、分享福音ê信息。M̄-koh真清楚,犹太人不时会teh听in ê讲道了后,kah in辩论。第3节,「我对lín传扬ê chit位耶稣,就是基督。」chit句话就是使徒保罗tī各地传福音siōng主要ê内容,mā是kui本新约圣经ê中心主题。m̄-koh beh说明chit句话,就一定tio̍h用koh khah chē ê时间解释:为甚么耶稣会受难tī十字架顶,以及伊koh活显现hō͘众人看见ê信息。耶稣如成(chiâⁿ)实是犹太人所期待来临ê基督,ná伊为甚么会受难?Chit-ê问题mā是早期教会众信徒共同ê问题,这mā是福音书作者们努力beh处理ê问题之一。

第4节,chit节讲:「有kóa敬拜上帝ê希腊人kah妇女界ê领袖mā信了」。Tī腓立比有贩卖紫色布匹ê妇女吕底亚kah伊ê全家同齐受洗信耶稣,chit-má tī帖撒罗尼迦chit-ê所在则有妇女界ê领袖信耶稣了,这说明妇女tī福音事工上扮演重要ê角色。M̄-nā án-ne,iáu有人mā加入了福音事工。

第5到9节,有福音ê所在,就有人反对福音ê事工。「当地ê犹太人心内嫉妒,召集了一kóa市井无赖,纠合成群,tī城内引起暴动」,想kā使徒保罗phah死。In冲进耶孙ê厝,真可能是伊ê厝已经成做聚会ê场所。In掠耶孙kah信徒去官府,控告in收留「搅乱天下ê人」。M̄-koh显然地,in并无充足ê证据,因为án-ne,官员只好ài in交保就tháu放。Ná亲像耶稣tī各地传福音,mā一定有反对福音ê人teh闹台。这说明圣神teh做工,魔鬼mā想beh teh破坏圣神所做ê事工。

重新查询 专卷研经 使徒行传系列
错误回报,请联系