撒母耳记下 22章32节 到 22章51节   背景资料  上一笔  下一笔
Tī chit段诗歌中,诗人teh描述家己tī战场上kah仇敌奋战ê情景。因为有上帝ê保护kah支持,所有反对伊ê人lóng被伊消灭、击败à。

第32到35节,chia讲「除了上主,无别ê上帝」,这是非常重要ê信仰告白,mā是kui本圣经siōng中心ê经文。就ná十诫中ê第一诫—除了他,无别ê上帝。类似chit种话句tī旧约圣经中出现真chē pái,主要lóng是teh表明:独独耶和华上帝,chiah是真正神(参考出埃及记二十:3,申命记五:7、三十二:39,以赛亚书四十三:11、四十四:6、8、四十五:5、6、21,何西阿书十三:4,约珥书二:27)。因为án-ne,走chhōe chit位真正上帝帮助,ná亲像chhōe-tio̍h siōng安全ê所在一般,因为上帝ná亲像「堡垒」(á是「保障」),thang hō͘人得tio̍h安全保障。Chit种保障ná亲像「巩固ê避难所」,hō͘伊ê「道路安全」。大卫讲上帝赐福hō͘伊ê脚步有ná「母鹿」仝款,即使khiā tī高山顶mā仝款,bē摇动,而ē-tàng安稳健在。伊mā讲上帝教导伊知影怎样相刣,mā知影怎样「拉siōng强硬ê弓」,chit-ê意思是teh指伊ê手股头有够额ê气力。这表示因为有上帝帮助,chiah ē-tàng hō͘ chit种看起来siōng简单ê武器,也ē-tàng成做siōng强大ê攻击武器。

第36到42节,lóng teh描述大卫怎样得tio̍h上帝ê帮助而phah败危害伊性命ê敌人,伊用「盾牌」、「眷佑」、「路径宽敞」、「无跋倒」等来描述上帝就tī伊身边带领伊。并且赏赐hō͘伊有能力击败敌人,制伏仇敌,hō͘ chiah-ê敌人lóng奔逃伊去,ná亲像「风吹散尘埃」。因为上帝并无khiā tī in he边,却是kah伊同在。

第43节,是顶面所讲诗歌ê结尾,说明诗人得tio̍h上帝ê帮助,kā敌人完全制伏,甚至是kā它消灭到ná亲像土粉一般,thang khǹg tī脚下贱踏。

第44到46节,thang看出平定所有ê仇敌kah叛乱者了后,仇敌除了归降顺服之外,别无他途。这thang tùi大卫tī统治以色列全国了后,第一个起来反对伊ê,就是非利士人,大卫phah败in,续落来koh大败了摩押人,然后是琐巴、哈马、以东等族群,ná亲像撒母耳记下第八章14节b句讲:「大卫无论去 tó 位,上主 lóng hō͘ 伊khah 赢。(全民版)」chit句话tú好说明chit三节ê内容。第46节ê「惊惶战栗」,意思是iáu未相刣,就已经hō͘对方屈服了,因为in lóng「丧尽了勇气」。

第47到49节,tùi第47节开始是大卫teh o-ló上帝ê诗歌。伊歌颂上帝是「永远活着」,这mā是kui本圣经teh见证ê「永恒ê上帝」ê意思。只有chit位上帝chiah是真正性命拯救者。换句话讲,只要m̄是永恒ê上帝,就m̄是人所beh óa靠ê对象,chit点认bat是非常重要ê。Tī第48节用了chit-ê「赢过」ê重要词字,这原本表示「伸冤」、「复仇」。这清楚讲出大卫bat受tio̍h无妄之灾,hō͘人冤枉,m̄-koh上帝为伊所受tio̍h ê委屈伸冤。Á kui本圣经lóng tī传达一个重要信息,讲上帝是为人伸冤ê神(参考申命记十:17—19,诗篇一三五:14,箴言二十:22,耶利米书十一:20),对tī被冤屈ê人,上帝绝对bē袖手旁观。Án-ne,任何óa靠上帝ê人,就会知影上帝一定会替受tio̍h冤屈ê人伸冤,并且会伸出救助ê手帮助伊。

第50到51节,是chit首诗歌ê总结,就是hiah-ê人beh tī所有ê国家、族群中,歌颂上帝ê救恩。Chia提起上帝「所立ê王」,是teh指大卫,并无包括扫罗。大卫特别指出,上帝ê救恩m̄-nā会显chit-má大卫身上,mā会延续到伊ê kiáⁿ孙(参考七:16),hō͘ in永远lóng得tio̍h上帝ê慈爱。

重新查询 专卷研经 撒母耳记下系列
错误回报,请联系