历代志下 20章20节 到 21章1节   背景资料  上一笔  下一笔
Chit段经文描写约沙法照雅哈悉传出ê信息,用欢喜ê方式统领军队前往战场提哥亚ê旷野去。果然上帝是亲手为犹大人民打击敌人。同时,Tī chit段经文中mā描写约沙法治理时代ê结束。

    第20到21节,当犹大军队准备ài出发去迎击敌军ê时chūn,约沙法koh一pái提醒犹大ê军队,一定会信靠上帝,án-ne就会phah赢。另外一方面,约沙法mā命令圣殿ê歌手穿特别节期ê衫裤,行tī军队面前,一面行,一面吟诗歌颂上帝ê伟大。这真无亲像军队beh出征ê样式,m̄-koh约沙法却是用chit种teh表达一个重要ê信息:这m̄是in ê战争,却是上帝亲自beh出手相战。Á世界上无任何力量ē-tàng阻挡上帝、对抗上帝。

	第22到24节,上帝果然亲自出手打击摩押、亚扪,kah以东ê联军,上帝先用摩押kah亚扪ê军队kā以东ê军队消灭,了后koh再反tńg来彼此残杀。因为án-ne,当犹大ê军队来到战场ê时,只看见到处lóng是尸体。

Chit pái ê战争ná亲像约书亚带祭司扛tio̍h约柜,命令pûn号筒ê祭司吹tio̍h号角,然后扛tio̍h约柜绕tio̍h耶利哥城,结果就hō͘ hit-ê城墙倒塌了(参考约书亚记第六章),koh像基甸率领三百人攻击米甸人仝款,上帝hō͘米甸人彼此攻击、自相残杀,基甸带领去ê人m̄免出力就战胜了(参考士师记第七章)。

	第25到30节,chit段经文真清楚讲tio̍h chit pái战役,是上帝亲自替犹大王约沙法kah伊ê人民相战。只要有上帝出手打击,阻挡ê气力一定会瓦解殆尽。摩押、亚扪,以及以东人ê军队溃败逃逸,留落来一大堆战利品随在约沙法kah伊ê军队夺取,结果是chē到开了三工时间iáu是the̍h不完,可见chit pái联军ê数量之大,莫怪犹大王约沙法kah伊ê人民lóng惊惶不安而走chhōe上帝ê庇护、带领。约沙法就án-ne带领军队凯旋归来,in是一路上唱歌跳舞tńg来到耶路撒冷圣殿,献上所得tio̍h ê战利品外,是一直歌颂上帝奇异ê恩典。Mā因为chit pái ê战争胜利,hō͘所有附近族群就此m̄敢koh来侵犯,chiah-ê外族人lóng非常惊惶,因为知影上帝亲手打击对手。因为án-ne,tī约沙法统治之下,真正达tio̍h国泰民安。

	第31到34节,约沙法án-ne共计统治二十五年,而伊是三十五岁继位ê,因为án-ne,伊总共活了六十岁。伊tī执政期间,lóng是kah老父亚撒仝款,不偏不倚地做上帝看做对ê事,唯一ê缺陷,是无kā偶像神明崇拜hō͘完全割除殆尽。

    第35节到第二十一章1节,chit段经文koh一pái讲约沙法重蹈覆辙。因为伊tī次kah北国以色列亚哈kiáⁿ亚哈谢来往。M̄-koh亚哈谢是kah in老父仝款,lóng是弃sak上帝,带领人民拜偶像。约沙法kah亚哈谢结盟,并同齐组成一支船队,结果被以利以谢提出警告,表示上帝beh摧毁伊ê船队。果然事实就án-ne如chit位以利以谢所警告ê,chit支船队并m̄是上帝所ài看见ê。因为án-ne,虽然有组成,却无出航过。约沙法往生后,伊ê kiáⁿ约兰继承王位。

	Koh讲,chia提起有一本taⁿ已经无法度chhōe获ê「哈拿尼ê kiáⁿ耶户史」。

重新查询 专卷研经 历代志下系列
错误回报,请联系