Chit段经文是使徒保罗对提摩太ê劝勉，充满tio̍h鼓励kah期待。伊kā提摩太讲一定tio̍h谨记家己ê角色—上帝所重用ê奴仆。

第11节，使徒保罗提醒提摩太tio̍h积极追求「正义、敬虔、信心、疼心、忍耐，kah温柔」等这六件事。Tī使徒保罗看起来，chiah-ê lóng是做一个上帝忠心ê奴仆一定tio̍h认真学习ê功课。

正义，是teh指无偏私ê态度，表示这是处理教会事务应该持守ê态度。
敬虔，是不随便ê意思。

信心kah疼心，这两项thang讲无法度分开。因为无信心，疼心bē持久；仝款ê，无疼心ê信心，hit种ê信心siōng容易陷入贪婪ê中间，甚至对人缺乏怜悯ê疼。

忍耐kah温柔，这是基督徒面对苦难ê时一定tio̍h有ê要件，只有án-ne chiah ē-tàng hō͘家己承受各种压力kah迫害临身mā不惊惶。

第12节，ē-sái讲是提摩太前书siōng中心ê一节经文。Thang参考腓立比书第三章12到14节。Kā信仰看做像tī竞技场上赛走hit种子，这一直是使徒保罗惯用ê方式（参考哥林多前书九：24—27）。好ê信仰一定tio̍h继续往前行，无法度回头á是停留，若无，就会失去原本thang得tio̍h ê荣耀甚至koh khah严重ê，会失迷正确ê方向。

第13到14节，chit两节thang参考约翰福音第十八章33到37节。早期教会beh公开宣认耶稣基督是性命ê主，会有性命ê危险，因为罗马皇帝当teh推动「皇民化」，ài属下所有人民lóng kā皇帝看做是神。使徒保罗ài提摩太教导信徒，一定tio̍h tī信仰ê事顶面忠实，无法度因为迫害来临而改变信仰，mā bē-tàng因为受迫害就软弱。

第15节，使徒保罗指出上帝ê特性，就是「独一无二ê全能者」。这真清楚说明：全能ê上帝，chiah是真正上帝。因为án-ne，chit位独一无二ê全能上帝，是应该被歌颂、o-ló ê。使徒保罗tī chia用「万王ê王，万主ê主」，真清楚讲出创造ê上帝，是高高赢过所有君王ê上帝。

第16节，chit节thang参考出埃及记第三十三章17节到23节。上帝是绝对圣洁，m̄是有罪ê人ē-tàng kah上帝面对面相见。

第17到19节，chit段话是使徒保罗对提摩太另外一项ê劝勉，tī提醒伊牧会ê工作中，对tī hiah-ê有钱有势ê信徒，á是hiah-ê虽然已经信了耶稣基督，ē-sái讲是tī信仰上表现出来ê，却kah真实信仰有差别ê信徒，应该尽传道者ê职责hō͘ in纠正。Ná亲像耶稣基督教导门徒所讲ê，一定tio̍h tī上帝kah钱财之间清楚选择，看是beh óa靠ê是甚么人（参考马太福音六：24）。

第20到21节，这二节是结尾语，mā是使徒保罗对提摩太ê祝福。「Tio̍h持守所接受ê托付」，chit句话若是用今á日ê话来讲，就是teh劝勉提摩太一定tio̍h持守献身ê使命感。提摩太所接受ê托付，就是beh去禁止以弗所教会内部有人「传无正确ê教义」。传福音ê基本根据就是圣经，因为圣经就是上帝ê话，mā只有上帝ê话chiah是正确ê。「不敬虔ê空谈」kah「荒谬争论」，chiah-ê就是teh指hiah-ê不切实际ê空谈话题。所谓「不切实际」，就是kā信仰kah生活ê实务分开，这就会hō͘人感觉信仰是一种kah现实生活距离真遥远ê事。