撒母耳记上 21章1节 到 21章9节   背景资料  上一笔  下一笔
Tùi第十九章18节开始记载大卫为tio̍h beh逃避扫罗ê追刣,四界逃亡并走chhōe别人帮助。大卫事(tāi)先chhōe先知撒母耳(参考十九:18—24节),然后koh继续走去chhōe kah伊结有「生死之交」ê扫罗kiáⁿ约拿单(参考二十)。chit-má第廿一章则记载大卫chhōe了挪伯ê祭司亚希米勒帮忙(参考廿一:1—9),续落来koh tùi挪伯到非利士人迦特城hia去bih起来(参考廿一:10—15)。顶面所讲chiah-ê并无一定是照前后秩序,chiah-ê资料有ê是出tī无仝来源,亲像第二十章chhōe约拿单帮助,ná亲像头前提过ê,hit时大卫iáu tī扫罗王宫中,koh tī固定时间kah扫罗kah其他官员同齐聚餐。M̄-koh tī第十九章10节就已经记载kah真清楚,大卫已经逃离家己ê居所,并离开了王宫,开始伊一连串ê逃亡生活。

Koh讲,有关大卫到挪伯chhōe亚希米勒帮忙ê故事,tī第廿一章只记载亚希米勒协助ê经过,续后ê事件则祭司亚希米勒家族惨遭扫罗报复chit件事,tī第廿二章9到23节,非常详细地叙述扫罗大屠杀亚希米勒家族ê kui个经过。圣经作者有意表达一件事:扫罗残刣上帝ê奴仆祭司,而且以大屠杀残酷手段之方式,tú好讲出扫罗已经无上帝ê灵同在,chiah会用chit种极端鄙视(siùⁿ)kah亵渎上帝ê方式,对待上帝ê奴仆。敬拜上帝ê所在,mā应该是一个提供庇护性命ê场所。当祭司teh敬拜上帝ê场所惨遭杀害ê时,mā表示杀害者心中已经无koh敬畏上帝à。

值得注意ê是chit段经文故事bat被耶稣引用回应法利赛人指责他ê门徒安息日摘麦穗来食ê问题(参考马可福音二:25—26)。

Chit段经文记载大卫逃到挪伯,伊tī chia chhōe-tio̍h祭司亚希米勒,请求hō͘ in伊食物ê协助。

第1节,「挪伯」是设tī耶路撒冷东北部大约五公里处,tī基比亚南部ê一座城市。是国王敬拜上帝ê场所。「亚希米勒」,伊是亚希突ê kiáⁿ,非尼哈ê孙á,以利ê曾孙。当伊看见大卫来到ê时,以「战战兢兢」地出来迎接大卫,伊是扫罗朝廷ê宗教师。Á chit句「战战兢兢」mā thang讲为第廿二ê大屠杀事件,预留了一个伏笔。伊问大卫为甚么独自到chia来chhōe伊,chit句话说明亚希米勒kah大卫真熟识。

第2到3节,非常清楚,大卫对祭司亚希米勒讲白贼,而且chit-ê谎讲得非常周密。伊以「特殊任务」(参考第5节)来说明chit pái单独行动ê原因。Koh讲,伊希望ē-tàng得tio̍h食物支援。M̄-koh有另外一种看法,认为大卫无kā亚希米勒讲实情,是为tio̍h beh保护伊,到时若是扫罗追问,伊thang因为全然m̄知,来免遭遇牵连,m̄-koh chit种讲法证明是错误。因为后来扫罗iáu是大屠杀死亚希米勒kah伊ê家族。大卫向亚希米勒希望有「五个饼」thang食。有另外一种讲法,认为这是大卫想beh the̍h chit五块饼 tī继续逃亡ê路上食用。

第4到6节,亚希米勒表示只有「圣饼」,而这是teh指陈设饼。照出埃及记第廿五章30节ê记载,圣幕内面ài有桌á tī约柜头前,tī chit-ê桌á顶面beh khǹg献hō͘上帝ê「供饼」。亚希米勒愿意分享chit种只有祭司chiah thang食ê饼(参考利未记廿四:9)。因为án-ne,伊问大卫是m̄是「最近无亲近过cha-bó͘人」,因为chit种饼是献祭hō͘上帝ê,属tī圣洁之祭物。Tī当时ê看法,有「亲近cha-bó͘人」就属tī一种「属世」、「世俗ê喜乐」,又koh是kah「性欲」有关,因为án-ne无法度kah神圣ê物件有任何接触。若无,会玷污了圣物ê洁净。大卫强调伊kah伊ê部下lóng因为有「特殊任务」在身,所以根本无可能发生chit种「亲近过cha-bó͘人」ê事。Chia所用ê「洁净」,意思是teh指性器官无进行任何性行为ê意思。可能是大卫ê解释hō͘祭司亚希米勒感觉thang信,因为án-ne,伊kā规定只有伊á是其他祭司chiah thang食用ê圣饼hō͘大卫。Chit种饼是每tú-tio̍h安息日,就beh更换新ê上去。因为án-ne,chia讲祭司亚希米勒kā「tú tùi圣桌顶换落来」ê陈设饼hō͘大卫。

Koh讲,为甚么祭司亚希米勒会询问大卫「最近有无亲近过cha-bó͘人」chit种问题?原来当大卫kā亚希米勒讲是为tio̍h「特别任务」,因为大卫是成功ê军事领袖,因为án-ne,tī亚希米勒ê了解里,「特殊任务」可能kah军事行动有关,根据摩西律法,军人tī营中á是tī军事行动ê时,bē-tàng亲近cha-bó͘人(参考申命记廿三:9—11),chit点tùi撒母耳记下第十一章thang看tio̍h大卫为tio̍h想beh夺取乌利亚ê bó͘拔示芭,kā乌利亚以前线调tńg来,并一再想出所有ê办法ài乌利亚tńg去kah bó͘同房,ē-sái讲是lóng被乌利亚拒绝,原因是看战争是神圣ê事,如果违背来致使战败,m̄-nā家己性命不保,连带ê是kui个民族lóng可能毁灭。因为án-ne,任何军事出发chìn前,lóng一定tio̍h有宗教仪式。Tī以色列人民,军人出征chìn前则一定tio̍h先举行洁净ê礼仪。

第7节,chit节是编者为tio̍h解释第廿二章9到10节、18节等等经文有ê解释。「以东人多益」,以东是以扫ê kiáⁿ孙,mā是替国王á是宫廷管理所属ê cheng-seⁿ,负责管理、放牧等工作ê主要官员「畜牧长」。伊tú好去挪伯「履行一件宗教上ê义务」,这是teh指多益可能tī某一kóa宗教行为上ê问题,去会幕进行一项宗教上ê「赎罪」礼仪。二是mā可能利用宗教上ê礼仪,掩盖(khàm)伊当扫罗线民ê角色,为tio̍h是beh查访大卫ê行踪。因为án-ne chiah会有chit句「hit工tú好在场」。Á chit句mā为后来多益检举祭司亚希米勒协助大卫逃走,以及后来扫罗命令由多益执行屠刣祭司亚希米勒kah其家族ê工作,作了伏笔。

第8到9节,chia讲大卫向祭司亚希米勒索取矛á是刀ê理由,是因为行动太匆促,致使无时间准备武器就上路。其实,chit种理由真薄弱。真正原因是:大卫真可能是看tio̍h多益tī祭司亚希米勒ê所在,因为án-ne,感觉不妙,chiah向祭司亚希米勒索取武器,为tio̍h是beh做为安全上ê防范ê路用。Á祭司亚希米勒the̍h被大卫刣死ê非利士人歌利亚ê hit支大刀hō͘大卫。

重新查询 专卷研经 撒母耳记上系列
错误回报,请联系