列王纪上 3章1节 到 3章15节   背景资料  上一笔  下一笔
Tùi第三章开始teh绍介所罗门王朝ê兴旺kah堕落ê原因。有关所罗门继位,并且铲除了所有可能威胁tio̍h伊ê气力了后,伊kah老父大卫siōng大ê无仝,就是大卫是率领以色列军队扩大疆土,hō͘外敌侵犯ê气力削弱。Á所罗门是采取异国联婚ê策略,m̄-koh这策略mā为伊带来晚年背离上帝、拜偶像ê严重错误行为,结果致使后代分裂留落来了一个远因。

Chit章是有关所罗门王真出名ê故事,teh讲述所罗门向上帝祈求智慧ê经过。Tī第三章1到15节是讲伊祈求ê经过,而tùi第16到28节是用一篇故事来形容所罗门充满智慧ê表现。

Chit段经文mā同时记载tī历代志下第一章3到12节。Tī chia,列王记作者先交带所罗门tī国家政策ê态度kah大卫大无相仝。至少,chit段经文ê起头就讲,所罗门娶埃及国王ê cha-bó͘-kiáⁿ做bó͘,chit点mā讲出伊用政治联婚ê方式,扩张政治势力,m̄-koh却mā为伊后来弃sak上帝埋落来了一个伏笔。续落来,chia讲伊对上帝真忠实不贪心,只祈求上帝赏赐hō͘伊智慧,好治理以色列国。Chit种态度hō͘上帝深受感动soah大大赐福hō͘伊。 

第1到3节,chia一开始就讲「所罗门kah埃及王结盟,娶埃及王ê cha-bó͘-kiáⁿ作bó͘」。这是一种大略上ê陈述,主要teh说明所罗门ê国家政策,采取政治联婚ê方式,建构kah邻国ê外交关系。作者tī chia用当时只有圣幕,无圣殿,因为án-ne,以色列人民lóng会tī「丘坛上献祭」。Chit-ê「丘坛」一词,表示比较高ê所在。却mā是迦南地神明siōng普遍出现ê所在。因为án-ne,用「丘坛」一词,mā隐含tio̍h以色列人民有ê时分bē清楚敬拜上帝kah拜迦南地神明ê区别。这mā是后来申命记作者一再强调tio̍h拆毁chiah-ê祭坛ê原因(参考申命记七:5、十二:3)。不过,chia而且讲所罗门「敬疼上主,遵照in父亲大卫ê训示」,可惜是伊kah-ná mā分bē清楚「丘坛献祭」kah tī圣幕献祭之间ê差别。

第4到5节,讲所罗门到「基遍献祭」,这是设tī耶路撒冷西北pêng大约十公里ê所在,chia有「siōng出名ê丘坛」,所罗门mā bat tī chia「献过成千ê烧化祭」。照历代志下作者ê观点,所罗门会去基遍献祭,原因是当时圣幕tī基遍,虽然约柜是排tī耶路撒冷,m̄-koh圣幕iáu未迁徙到耶路撒冷。真可能是为tio̍h beh建造圣殿ê缘故,并无积极迁徙圣幕。Teh献祭后ê hit暗,上帝透过「梦」向所罗门显现,问所罗门想beh上帝祈求甚么。

	第6到9节,chit段是所罗门siōng重要ê一段信仰告白。伊表示因为老父大卫对上帝「忠心、诚实,有纯真ê心」,tùi án-ne得tio̍h上帝「大施慈爱」hō͘伊。chit-má所罗门表示家己少年,上帝就赏赐hō͘伊有chit种机会继承老父大卫ê王位,伊恳求上帝赏赐hō͘伊「一粒真gâu识别ê心,ē-tàng判断是非,好治理」人民。Chia所谓「一粒真gâu识别ê心」chit句话,意思是teh指「一粒遵守上帝旨意ê心」,这mā是kui本圣经ê主要信息,希望ē-tàng确实听从上帝ê旨意。

	第10到14节,因为所罗门chit种祈求,感动上帝,认为伊无亲像一般人祈求「长寿」、「财富」,kah强大ê军事武力,只祈求「明辨ê智慧,好公正治理人民」,因为án-ne,上帝决定beh成全伊所祈求ê。而且beh赏赐hō͘伊ê智慧,是前无古人,后无来者。M̄-koh上帝mā同时提醒所罗门一定tio̍h像in父亲大卫仝款,对上帝忠实。

第15节,所罗门终其尾知影这是上帝透过梦向伊讲话,因为án-ne,赶紧koh献上「烧化祭和平安祭」表示感谢上帝ê恩典,并且排设筵席款待所有跟tòe伊去基遍献祭ê臣仆。

重新查询 专卷研经 列王纪上系列
错误回报,请联系