哥林多前书 6章12节 到 6章20节   背景资料  上一笔  下一笔
因为希腊人是轻视肉体,in将肉体看做是无好ê,因此对淫乱ê事并无在意,而且有真chē城市人民tī chit-ê性事顶面mā真随便。哥林多城就是一个典型ê「淫乱之lóng」。Mā因为án-ne,致使哥林多教会ê信徒mā tòe深受影响。使徒保罗将教会看做是基督ê身躯,每一个基督徒lóng是建立tī基督ê基础上(参考以弗所书二:20)。所以无法度随便做tāi-chì,致使基督ê圣洁受亵渎。做基督教会ê一份子,就无法度随便以家己ê意见做tāi-chì, tio̍h考虑ê是整体ê。

Tī chit段经文中,thang看tio̍h使徒保罗提供一个重要ê信仰认知:一个人无法度将身躯kah灵魂分开。性命是一体ê,无肉体kah灵魂分开chit款tāi-chì。希腊人就是有chit种观念,chiah会放纵情欲。In认为肉体是会朽pháiⁿ ê物体,灵魂chiah是圣洁ê。M̄-koh,使徒保罗tī chia强调讲m̄是án-ne,伊讲身躯就是圣神ê殿,圣神tòa tī身躯内面(参考罗马书八:9),mā所以咱是属tī上帝ê。

第12到14节,当有人为tio̍h beh表示家己真有信心,所以甚么事lóng thang做。这固然无错,m̄-koh却无一定lóng有「益处」。注意使徒保罗tī chia用「益处」chit-ê词,tī希腊文是由两个字合起来ê;前部分是「συμ」(sum),意思是「做伙」。后半字是「ψερω」(pherō),意思是「带」á是「堆置」。Án-ne,咱看tio̍h「益处」ê原文「συμψερω」(sumpherō)就是「Kā物件khǹg做伙」ê意思。基督ê教会是一个信仰团契,是beh聚集众人做伙,m̄是beh分散。所以ài做任何事,就beh想tio̍h怎样chiah ē-tàng将众人聚集做伙,m̄是hō͘人分开,这就是使徒保罗用「益处」chit-ê词ê意思。一个ê时常夸耀家己ê灵命真强ê人,却往往犯罪,而且所犯ê罪行是连异教ê人mā m̄敢做ê事,chit种人tī教会内,只会hō͘人离开,bē hō͘人聚集。

Chia ài beh特别注意ê是tī第13节,使徒保罗提出一个例,就是有关「食物」ê问题。伊引用哥林多人常常挂tī口边ê一句话:「食物是为腹肚,腹肚是为食物。」使徒保罗并m̄是反对人性上有chit种需要,伊反对ê是滥无顾忌地放纵,所讲ê暴饮暴食,á是放纵情欲ê行为。伊koh一pái提醒哥林多教会ê信徒一定tio̍h ân-ân记tiâu,信耶稣基督ê人,就是为tio̍h基督而生活。基督徒性命之可贵就是tī koh活,因为上帝已经hō͘耶稣基督tùi死里koh活,mā tio̍h hō͘信靠伊ê人仝款koh活。

第15到17节,这是继续teh诠释头前一段提出ê问题。使徒保罗tī chia提起保持洁净身躯ê重要性,因为基督徒是kah耶稣结合做伙ê,伊tī第16节套用了夫妻关系来形容基督徒kah耶稣之间ê关系,是连结做伙,无法度分开ê,ná亲像夫妻ê关系一般。Chit种观念一再出现tī伊所写ê书信中(参考以弗所书五:25—32)。

第18到20节,使徒保罗希望哥林多教会ê信徒tio̍h避免淫乱事件发生,是ài in坚持信仰上ê忠贞,因为信耶稣ê人如果犯淫乱罪,所象徵出来ê m̄-nā是身躯上ê问题,koh khah严肃ê,是心灵上ê。因为每一个基督徒lóng是身上带有耶稣ê记号,是上帝ê殿。这殿是为tio̍h beh敬拜上帝。所以每一个信徒lóng tio̍h「属tī上帝」ê chit种观念。Á第20节讲「用重价买来」ê,chit种「重价」指ê就是耶稣死tī十字架上ê性命。

重新查询 专卷研经 哥林多前书系列
错误回报,请联系